Nahɔmu 3 - ALA KA KUMA

Ninivu be bila ɲagwan na

¹ Ele dugu min fanin be mɔgɔfagalaw la! Bɔnɛ y'i ta ye. Galontigɛ le be sanga la yen, ni janfa, benkanni te ban yen!

² Busan mankan be bɔra ni wotorow mankan, ni soow bolitɔ mankan, wotorow pantɔ mankan!

³ Sotigiw be girin, murujanjanw ni tamanw be manamana! Mɔgɔ faganinw ka ca! Suuw tonna ɲɔgɔn kan! Suuw daa yɛrɛ te lɔn! Mɔgɔw be talon suuw la!

⁴ Jantaramuso nin ka kakalaya dantɛmɛnin kama, a ka cɛɲumanya kuntan, n'a ka subagaya kama. A tun be siyaw kɛ jɔɔnw ye a ka kakalaya sababu la, a tun be siyaw sɔrɔ a ka subagaya barika la.

⁵ Masaba, Setigi ko: «Ne ye i jugu ye. N bena i kannafani sama fɔɔ ka se i ɲada ma, n bena i julakolon yira siyaw la, fɛɛn min b'i maloya, ne bena o yira u la.

⁶ N bena ɲamaɲama bɔn i kan, n bena i maloya, k'i kɛ filɛlifɛn ye.

⁷ Mɔgɔ o mɔgɔ mana i ye, o tigi bena boli k'a fɔ ko: ‹Ee! Ninivu cɛnna!› Jɔn bena kasi a kosɔn tugu? Ne ben'a dusu saalobaga sɔrɔ min?»

Ninivu ka tɔɔrɔ nata

⁸ Ele Ninivu ka fisa ni Tɛbɛ dugu ye wa? Ale min tun siginin be Nili babolo fila cɛma, jii kɛra k'a lamini. Baa nin tun kɛr'a tangafɛn ye kɛlɛ loon, baji tun kɛr'a laminikogo ye.

⁹ Etiyopi ni Ezipiti jamana mɔgɔw, o jamaba nin le tun y'a fangaba bɔyɔrɔ ye. Putikaw ni Libikaw tun y'a dɛmɛbagaw ye.

¹⁰ Ale fana mɔgɔw minɛna ka taga jamana wɛrɛ la, ka to jɔnya la yen. Denmisɛnw kuun cira sirakunw bɛɛ la. U kɛlɛbagaw ye u ka ɲamɔgɔw tilan u yɛrɛw cɛ. U ka mɔgɔbabaw bɛɛ sirisirila ni jɔrɔkɔw ye.

¹¹ Aw fana bena tɔɔrɔ kosɔbɛ! Aw fana bena dogoyɔrɔ ɲini aw juguw ɲasiran kosɔn!

Barinako

¹² Aw ka yɔrɔ barikamanw bɛɛ ye torosun ye, toro mɔnin be minw kan. N'i y'a yuguyugu dɔɔni, a be ben a dumubaga daa la.

¹³ E ka jama filɛ, a bɛɛ muso. E ka jamana donda yɛlɛnin be i juguw ye dɔrɔn. Tasuma y'i ka koonw jɛni.

¹⁴ Aw ye jii bɔ k'o mara aw datugulon kama ka barika don dugu tangayɔrɔw la! Aw ye bɔgɔ nɔɔni, k'a dɔn ka biriki gosifɛn labɛn.

¹⁵ O yɔrɔ la, tasuma bena aw jɛni, murujan bena aw bɔ baara la i ko tɔɔn be suman dumu cogo min na. Aw cayara i ko tɔnwulen, aw cayara i ko samiɲatɔn.

¹⁶ Aw ka jagokɛlaw cayara ka tɛmɛ lolow kan! U be i ko tɔɔn minw panna.

¹⁷ Aw ka kɔlɔsibagaw be i ko tɔɔnw, aw ka ɲamɔgɔw ka ca i ko pannifɛnw. U be taga sigi yiri kan, yɔrɔ suma kosɔn. Ni tile gwanna, u bɛɛ be pan. U taayɔrɔ te lɔn. U tagara min?

Asiri jamana ka bɔnɛ

¹⁸ Asiri masacɛ, e ka jamana ɲamɔgɔw sinɔgɔra kɛ! E ka mɔgɔbabaw lara tɛtɛtɛ! E ka jama jɛnsɛnnin be kulu kan. Mɔgɔ te yen k'u lajɛn!

¹⁹ Fura te sɔrɔ min be kɛ k'i ka yɔrɔ mandiminin furakɛ, joli banta tɛ! Ni mɔgɔ o mɔgɔ y'i ka koo kibaru mɛn, u bɛɛ bena tɛgɛrɛ fɔ i ka bɔnɛ kosɔn. Tiɲa! Jɔn le be yen n'i ka juguya ma se a ma?