Nahɔmu 2 - ALA KA KUMA

¹ Ciden filɛ nin ye kuluw kan, a be hɛrɛ koo fɔra! Zuda mara mɔgɔw, aw k'aw ka ɲanagwɛw kɛ, aw k'aw ka dajuruw sara! Bari mɔgɔjugu nin tena segi aw fɛ tugu abada! A halakila pewu!

² Kɛlɛbolo dɔ be nana e Ninivu kama. Kɔlɔsilikɛlaw bila u ka dugu barikaman kɔlɔsi. Aw ye sira kɔlɔsi, k'aw cɛɛ siri, k'aw seko bɛɛ kɛ.

³ Tiɲɛ na, Masaba bena Yakuba kɔmɔgɔw ka kunkɔrɔta segi u ma, a bena boɲa la Isirayɛlidenw kan. Bari, benkannikɛla dɔw tun benna u kan, k'u bolo lakolonya.

Ninivu halakiko

⁴ Dugu kɛlɛbagaw ka nigɛkunbɛnnanw wulennin lo, u ka faniw wulennin lo fana. Wotorow be manamana, u taatɔ kɛlɛ la. Tamanw be yuguyugura!

⁵ Wotorow be girinna bɔlɔnw cɛ, ani dugu ka ɲɔgɔn kunbɛnyɔrɔw la! N'i y'u ye, i b'a fɔ ko tasumaba manatɔ lo. U be yan, u be yan, i ko saan manamanatɔ.

⁶ Masacɛ hakili jigir'a ka kɛlɛkuntigi farimanw la. Nga u taamatɔ be yɛrɛyɛrɛla. U be girinna ka dugu laminikogo sɛgɛrɛ, u b'u tangafɛn bila.

⁷ Dugu donda minw sinnin be baji ma, olu yɛlɛla. Masaso benna.

⁸ U y'a ka joo ye k'a ta ka taga n'a ye. Muso minw tun b'a bato, olu tora ka kasi kosɔbɛ, ka ŋunan, ka to k'u disi gosi.

⁹ Ninivu tun kɛra i ko dalan, min jii ka ca. Nga a jii be bolila. U be kule ko: «Aw ye lɔ! Aw ye lɔ!» Nga u si te lɔra ka kɔsegi!

¹⁰ Aw ye wari cɛ, ka sanu cɛ! Nafolo banta tɛ! Minanɲuman sifa bɛɛ le tonnin be yen!

¹¹ A bɛɛ cɛra ka ban, k'a lakolon bila, a bɛɛ cɛnna. U jaa tigɛra, u kunbiriw bɛɛ magayala, u fari bɛɛ be yɛrɛyɛrɛla, u bɛɛ ɲaa yɛlɛmana.

Waraba benna

¹² Jaraw ka layɔrɔ be min sa? U be dumuni di u deenw ma yɔrɔ min na. Ni jaracɛ tun bɔra ka taga sogo yaala, mɔgɔ si tun te maga a deenw na.

¹³ Jaracɛ tun be sogo faranfaran a deenw ye, ka dɔw kaan kari a muso ye. A tun b'a ka layɔrɔ fa ni sogo ye, a tun b'a ka dogoyɔrɔ fa n'a ka fɛnsɔrɔninw ye.

¹⁴ Masaba, Setigi ko: «Ne ye i jugu ye. Tiɲɛ na, n bena i ka wotorow jɛni. Murujan le bena i ka kɛlɛdenw faga. I ye fɛɛn min bɛɛ bɔsi tɔw fɛ dugukolo kan, ne bena o bɔsi i la. E ka cidenw kumakan tena mɛn tugu.»