Mise 3 - ALA KA KUMA

Mise be faamajuguw kɔrɔfɔ

¹ Ne ko: «Yakuba ka soo kuntigiw, Isirayɛli ɲamɔgɔw, aw ye mɛnni kɛ! Aw le man kan ka tilenninyakow sira lɔn wa?

² Nga aw le be kojugu kanu, ka ɲumanya to. Aw le be ne ka mɔgɔw ka fɛɛnw bɔsi k'u lakolonya pepewu, i ko mɔgɔ ye sogo ɲimi k'a kolo to.

³ Ɔnhɔn, aw be ne ka mɔgɔw sogo dumu, k'u golo bɔ, k'u kolo karikari, k'u tigɛtigɛ i ko u bena sogo min tobi, i ko sogo min be dibi kan.»

⁴ Ni o kɛbagaw nana kule Masaba nɔɔ fɛ, a tena u jaabi. O tuma na, a ben'a yɛrɛ dogo u la. Bari u ye kojugu kɛ.

Kiraw ka kojugu

⁵ Masaba y'a fɔ ko: «Kira minw b'a kɛ ne ka mɔgɔw be fili, ni min ye dumuni d'u ma, u be hɛrɛko fɔ. Ni min ma dumuni d'u ma, u be kɛlɛba labɛnko fɔ o tigi kama.

⁶ O koo nunu kama, a banna, aw tena yelifɛn ye tugu. Aw ɲaa bena dibi, aw tena lagwɛli kɛ tugu. Aw bena to dibi la i ko sufɛ. Aw tena foyi ye tugu.

⁷ Maloya bena filɛlikɛlaw sɔrɔ. Lagwɛlikɛlaw kuun bena surun. U bɛɛ bena u ɲaa datugu maloya kosɔn. Bari Ala tena u jaabi.»

⁸ Aa! Masaba ka Nii barika la, ne kɔni ye barika sɔrɔ, n tilennin lo, ne jaa ka gwɛlɛ ka Yakuba kɔmɔgɔw ka murutikow fɔ u ye, ka Isirayɛlidenw ka hakɛ fɔ u ye.

Zeruzalɛmu halakiko

⁹ Yakuba ka soo kuntigiw, Isirayɛli ɲamɔgɔw ka mɛnni kɛ! Tilenninya koo ka go aw minw ye. Koo o koo tilennin lo, aw minw b'o bɛɛ cɛn,

¹⁰ aw minw be *Siyɔn dugu lɔ ni mɔgɔfaga ye, aw minw be Zeruzalɛmu lɔ ni juguya ye!

¹¹ Dugu ɲamɔgɔw be kiti tigɛ k'a jɛngɛ daa sanfɛn kama, sarakalasebagaw be mɔgɔw kalan nafa kama, kiraw b'u ka kiraya kɛ wari kama. O bɛɛ la, u ko u b'o kɛ Masaba tɔgɔ la. Fɔɔ u be to k'a fɔ ko: «Masaba te n'an ye wa? Kojugu tena an sɔrɔ fewu!»

¹² O le y'a to Siyɔn dugu bena sɛnɛ i ko foro, Zeruzalɛmu bena kɛ tomo ye aw sababu la. Alabatoso be kulu min kan, o bena kɛ tuba le ye.