Matiyu 9 - ALA KA KUMA

Yezu be muruku dɔ kɛnɛya

¹ Yezu donna kurun kɔnɔ ka segi ka baa tigɛ ka ta'a ka dugu la.

² O yɔrɔ la, mɔgɔ dɔw tagara Yezu fɛ ni muruku dɔ ye dilan kan. Yezu y'a ye k'o mɔgɔw lara ale la minkɛ, a y'a fɔ muruku nin ye ko: «N teri, kana i jigi tigɛ. I ka hakɛw yafara.»

³ O tuma na, sariya karamɔgɔ dɔw y'a daminɛ k'a fɔ u kɔnɔ ko: «Cɛɛ nin be Ala tɔgɔ cɛn.»

⁴ Yezu y'u kɔnɔna ta lɔn minkɛ, a ko: «Mun na miiriyajugu b'aw kɔnɔ ten?

⁵ K'a fɔ muruku ye ko: ‹I ka hakɛw yafara›, walima k'a fɔ a ye ko: ‹Wili ka taama›, o kuma fila la, jumɛn fɔ ka nɔgɔ?

⁶ Ayiwa, n b'a fɛ aw k'a lɔn ko see be Mɔgɔ Dencɛ ye diɲɛ na ka mɔgɔw ka hakɛw yafa.» O la, a y'a fɔ muruku nin ye ko: «Wili k'i ka dilan ta ka taga soo.»

⁷ Cɛɛ wilila ka taga soo.

⁸ Jama y'o ye tuma min na, u siranna kosɔbɛ. U ye Ala tanu bari ale lo ye see di adamaden ma ka koo nin ɲɔgɔn kɛ.

Yezu be Matiyo wele

⁹ Yezu bɔra o yɔrɔ la n'a be tagara ɲafɛ. A ye cɛɛ dɔ siginin ye lɛnpominɛlaw ka baarakɛyɔrɔ la, a tɔgɔ ko Matiyo. Yezu y'a fɔ a ye ko: «Tugu ne kɔ.» Matiyo wilila ka tugu a kɔ.

¹⁰ O kɔ, Yezu tagara Matiyo ka soo. K'u to dumuni na, lɛnpominɛlaw ni hakɛkɛlaw nana sigi n'u be dumuni kɛra ni Yezu n'a ka kalandenw ye. U tun ka ca.

¹¹ *Fariziɲɛw y'o ye tuma min na, u y'a fɔ a ka kalandenw ye ko: «Mun na aw ka karamɔgɔ be dumuni kɛ ni lɛnpominɛlaw ani hakɛkɛlaw ye?»

¹² Yezu y'u ka kuma mɛn minkɛ, a y'a fɔ ko: «Mɔgɔ minw ka kɛnɛ, olu mako te furakɛla la, banabagatɔw le mako b'a la.

¹³ Aw ye taga miiri Ala ka kuma nin kɔrɔ la. A tun y'a fɔ ko: ‹Ne be makari le fɛ, ne te saraka fɛ,› bari ne ma na mɔgɔtilenninw wele, nga ne nana hakɛkɛlaw le wele.»

Yezu be ladili di suun koo la

¹⁴ O kɔ, Zan batizelikɛla ka kalandenw gwɛrɛla Yezu la k'a ɲininga ko: «Mun na anw ni *Fariziɲɛw be to ka suun don k'a sɔrɔ e ka kalandenw te suun don?»

¹⁵ A y'u jaabi ko: «Kɔɲɔcɛ teriw ɲa be se ka sisi k'u ni kɔɲɔcɛ to ɲɔgɔn fɛ wa? Nga, loon dɔ bena se, kɔɲɔcɛ bena bɔsi u la. U bena suun don o tuma na.

¹⁶ Mɔgɔ si te fani kunkurunkura bari fani kɔrɔman na, bari, kunkurunkura nin bena fani kɔrɔman sama k'a faran. A faranyɔrɔ bena boɲa ni fɔlɔta nin ye.

¹⁷ O cogo kelen na, mɔgɔ si te duvɛnkɛnɛ kɛ foroko kɔrɔman na. N'o kɛra, foroko bena cɛn, duvɛn bena bɔn. Mɔgɔw be duvɛnkɛnɛ kɛ forokokura le kɔnɔ. N'u y'a kɛ ten, o si tena cɛn.»

Yezu be sungurunin dɔ suu kunun

¹⁸ Ka Yezu to o kuma nunu na, zuwifuw ka kuntigi dɔ nana a kunbiri gwan a kɔrɔ k'a fɔ a ye ko: «N denmuso banna sisan sisan. Nga, sabali ka na i bolo la a kan, a bena kunun.»

¹⁹ Yezu n'a ka kalandenw wilila ka tugu a kɔ.

²⁰ O y'a sɔrɔ, muso dɔ tun be yen, a ka koli tun b'a tɔɔrɔla kabini saan tan ni fila. Joli tun te lɔ ka ye. A gwɛrɛla Yezu la a kɔfɛ ka maga a ka fani dakun na,

²¹ bari a tun y'a fɔ a yɛrɛ kɔnɔ ko: «Ni n sera ka maga a ka fani dɔrɔn na, n bena kɛnɛya.»

²² Yezu y'a ɲaa yɛlɛma kɔfɛ ka muso nin ye. A y'a fɔ a ye ko: «N balimamuso, i jigi kana tigɛ. I kisira i ka lanaya kosɔn.» O yɔrɔnin bɛɛ, muso nin kɛnɛyara.

²³ Yezu tagara se zuwifuw ka kuntigi nin ka soo tuma min na, a ye jamaba ye. Dɔw tun be fɔli kɛra, dɔw tun be kasira.

²⁴ A y'a fɔ u ye ko: «Aw ye bɔ yan, bari sungurunin nin ma sa, nga a be sinɔgɔra le.» U yɛlɛla Yezu ma.

²⁵ U ye jama bɔ kɛnɛma tuma min na, Yezu donna ka suu bolo minɛ, a kununna.

²⁶ Mɔgɔw y'o koo lakali o yɔrɔ mara bɛɛ la.

Yezu be fiɲɛntɔ fila dɔ ɲaa yɛlɛ

²⁷ Yezu bɔra o yɔrɔ la n'a be tagara. Fiɲɛntɔ fila wilila ka tugu a kɔ, n'u b'a fɔ ko: «Makari an na, Dawuda dencɛ!»

²⁸ Yezu sera soo tuma min na, fiɲɛntɔ nunu gwɛrɛla a la. A y'u ɲininga ko: «Aw lanin b'a la ko ne be se k'aw ɲaa yɛlɛ wa?» U y'a jaabi ko: «Ɔnhɔn Matigi, an lanin b'a la.»

²⁹ O kɔ, Yezu magara u ɲaa na k'a fɔ ko: «Aw jigi b'a la ko ne be se ka fɛɛn min kɛ aw ye, o ka kɛ aw ye.»

³⁰ U ɲaa yɛlɛla. Yezu y'a gwɛlɛya u ma k'u kan'a fɔ mɔgɔ si ye ko ale lo y'u ɲaa yɛlɛ.

³¹ Nga, u tagara dɔrɔn, u y'a daminɛ ka Yezu koo fɔ mɔgɔw ye u ka mara bɛɛ la.

Yezu be bobo dɔ kɛnɛya

³² U bɔra n'u be taga, mɔgɔ dɔw nana ni bobo jinatɔ dɔ ye Yezu fɛ.

³³ Yezu ye jina gwɛn ka bɔ a la dɔrɔn, cɛɛ y'a daminɛ ka kuma. Jama kabakoyara, u tora k'a fɔ k'u ma deli ka nin ɲɔgɔn ye Isirayɛli jamana na fɔlɔ.

³⁴ Nga *Fariziɲɛw y'a fɔ ko: «A be jinaw gwɛn jinaw kuntigi le barika la.»

Jama hinɛ be Yezu la

³⁵ Yezu tun be taga dugubaba ni dugudenninw na ka mɔgɔw kalan zuwifuw ka kalansow kɔnɔ. A tun be *sankolo masaya koo fɔ, ani ka banabagatɔ sifa bɛɛ kɛnɛya.

³⁶ N'a ye jama ye, u hinɛ be don a la, bari u sigɛnnin tun lo, u dusu kasinin tun lo fana. U tun be i ko sagaw, dɛndɛbaga te minw na.

³⁷ O le y'a to a y'a fɔ a ka kalandenw ye ko: «Suman tigɛta ka ca, nga baarakɛlaw man ca.

³⁸ Aw ka forotigi daali a ka baarakɛlaw ci ka ta'a ka suman tigɛ.»