Matiyu 7 - ALA KA KUMA

Yezu ko an kana ɲɔgɔn kiti

¹ «Aw kana tɔw kiti, janko Ala kana aw kiti.

² Aw be tɔw kiti cogo min na, Ala bena aw kiti ten. Aw be tɔw ta suma ni sumanikɛfɛn min ye, Ala fana bena aw ta suma n'o le ye.

³ Kalafitini min b'i balima ɲaa na, mun na i b'o filɛ k'a sɔrɔ lɔgɔkuru b'i ta la, i t'o ye wa?

⁴ I do be se k'a fɔ i balima ye cogo di ko: ‹A to n be kala nin bɔ i ɲaa na›, k'a sɔrɔ lɔgɔkuru b'i ta la?

⁵ Namaramɔgɔ, lɔgɔkuru min b'i ta la, o bɔ fɔlɔ. O la, i bena yeli kɛ ka ɲa, ka kala bɔ i balima ɲaa na.

⁶ «Aw kana fɛɛn senuman di wuluw ma, n'o tɛ, u bena yɛlɛma k'aw cin. Aw kana aw ka kɔnɔkisɛ sɔngɔgwɛlɛnw bila lɛɛw kɔrɔ, n'o tɛ, u bena na u dɔn k'u cɛn.

Aw k'aw makoyafɛnw daali Ala fɛ

⁷ «Aw k'aw ka makoyafɛn daali Ala fɛ, a bena o d'aw ma. Aw mako be fɛɛn min na, aw k'o ɲini, aw ben'a sɔrɔ. Aw ka daa kɔkɔ, daa bena yɛlɛ aw ye.

⁸ Bari mɔgɔ o mɔgɔ man'a makoyafɛn daali Ala fɛ, Ala bena o di o tigi ma. Min man'a makoyafɛn ɲini, o tigi b'o sɔrɔ. Daa bena yɛlɛ daa kɔkɔbaga ye.

⁹ Denfa jumɛn be sɔn ka kabakuru d'a deen ma k'a sɔrɔ a ye buru le daali a fɛ?

¹⁰ Walima n'a ye jigɛ daali a fɛ, n'a bena sɔn ka saa d'a ma?

¹¹ Aw minw ka jugu, n'aw be sɔn ka fɛnɲumanw di aw deenw ma, aw Faa min be sankolo la, ale tena fɛnɲuman di a daalibagaw ma ka tɛmɛ aw ta kan wa?

¹² «Aw b'a fɛ mɔgɔ tɔw ka koo min kɛ aw ye, aw fana k'o ɲɔgɔn kɛ u ye. O le fɔra sariya ni kiraw ka sɛbɛw kɔnɔ.

Sirafitini ni siraba

¹³ «Aw ka sirafitini ta. Siraba kɔni taama ka di, nga a be taga ni mɔgɔ ye halakiyɔrɔ la. Mɔgɔ caaman do b'o le ta.

¹⁴ Aw ka sirafitini ta ka taga don ni dafitini ye, a taama kɔni ka gwɛlɛ, a taabagaw man ca, nga a be taga ni mɔgɔ ye hɛrɛ yɔrɔ la.

Yiri be lɔn a deen fɛ

¹⁵ «Mɔgɔ minw be galon tigɛ k'olu ye kiraw ye, aw k'aw yɛrɛ kɔlɔsi olu la. N'u be na aw fɛ, u b'u yɛrɛ kɛ sagaw ye k'a sɔrɔ waraw lo.

¹⁶ Aw bena u lɔn u ka kɛwaliw fɛ. Mɔgɔ te pekun tigɛ ŋɔniyiri kan. Toro fana te sɔrɔ balansanyiri la.

¹⁷ Yiriɲuman deen le ka di, nga yirijugu deen man di.

¹⁸ Yiriɲuman te se ka denjugu kɛ, yirijugu fana te se ka denɲuman kɛ.

¹⁹ Yiri o yiri te denɲuman kɛ, u bena o tigɛ k'a fili tasuma na.

²⁰ O cogo kelen la, mɔgɔ minw be galon tigɛ k'olu ye kira ye, aw bena u lɔn u ka kɛwaliw fɛ.

Jɔn le bena don arijana na?

²¹ «Mɔgɔ minw be ne wele ko ‹Matigi, Matigi,› olu bɛɛ tena don *sankolo masaya la, fɔɔ ne Faa min be sankolo la, ale sagokɛlaw.

²² Ni Ala ka kitilon nana se, mɔgɔ caaman ben'a fɔ ne ye ko: ‹Matigi, an ye kiraya kɛ e tɔgɔ la, ka jinaw gwɛn ka bɔ mɔgɔw la e tɔgɔ la, ka kabako caaman kɛ e tɔgɔ la.›

²³ O loon na, ne ben'a fɔ u ye ko: ‹Ne t'aw lɔn, aw kojugukɛlaw ka bɔ n kɔrɔ.›

Boon min lɔra fara kan ani min lɔra cɛncɛn kan

²⁴ «Ne ye kuma minw fɔ sisan, ni mɔgɔ min y'o bato, o tigi be i n'a fɔ hakilitigi min y'a ka boon lɔ fara kan.

²⁵ Sanjiba nana ni fɔɲɔba ye, jii cayara, nga o si ma se ka boon nin ben, bari a juu siginin tun be fara kan.

²⁶ Nga, mɔgɔ min b'o kuma mɛn, n'a t'a bato, o tigi be i n'a fɔ naloman min y'a ka soo lɔ cɛncɛn kan.

²⁷ Sanjiba nana ni fɔɲɔba ye, jii cayara, boon benna ka mugumugu.»

²⁸ Yezu y'o kumaw fɔ ka ban tuma min na, jama bɛɛ kabakoyara a ka mɔgɔ kalancogo la,

²⁹ bari a tun t'u kalan i n'a fɔ sariya karamɔgɔw be to k'u kalan cogo min na. Nga a tun b'u kalan i n'a fɔ koo tigi.