Matiyu 4 - ALA KA KUMA

Sutana be Yezu nigɛ ka dɛsɛ

¹ O kɔ, Nii Senuman y'a kɛ Yezu tagara kongokolon kɔnɔ janko Sutana k'a kɔrɔbɔ.

² Yezu ye tile bi naani ni suu bi naani kɛ a ma dumuni kɛ, kɔngɔ y'a minɛ.

³ Sutana gwɛrɛla a la k'a fɔ a ye ko: «N'i ye Ala Deen ye, a fɔ ko kabakuru nunu ka yɛlɛma ka kɛ buru ye.»

⁴ Yezu y'a jaabi ko: «A fɔra Ala ka kuma na ko: ‹Mɔgɔ te balo ni dumunifɛn dama ye, nga a be balo ni Ala ka kuma fana ye.› »

⁵ O kɔ, Zeruzalɛmu min ye dugu senuman ye, Sutana tagara n'a ye o kɔnɔ Alabatosoba kuun na

⁶ k'a fɔ a ye ko: «N'i ye Ala Deen ye, pan ka cun bari a fɔra Ala ka kuma na ko: ‹A bena ci di a ka mɛlɛkɛw ma i koo la. U bena i ta u bolo janko i seen kana gosi kabakuru la.› »

⁷ Yezu ko a ma: «A fɔra Ala ka kuma na fana ko: ‹I kana Matigi i ka Ala kɔrɔbɔ.› »

⁸ O kɔ, Sutana tagara n'a ye kulu jamanjan dɔ kan ka diɲɛ jamanaw bɛɛ n'u ka nɔɔrɔ yira a la,

⁹ k'a fɔ a ye ko: «N'i y'i kunbiri gwan ne kɔrɔ ka ne bato, ne bena nunu bɛɛ d'i ma.»

¹⁰ Yezu y'a fɔ a ye ko: «Taga ka bɔ yan Sutana, bari a fɔra Ala ka kuma na ko: ‹E ka Matigi i ka Ala bato ka baara kɛ ale kelenpe ye.› »

¹¹ O tuma na, Sutana tagara k'a to yen. Mɛlɛkɛ dɔw nan'a mako ɲa.

Yezu b'a ka waajuli daminɛ

¹² Yezu y'a mɛn tuma min na ko Zan donna kaso la, a tagara Galile mara la.

¹³ Nga a ma sigi Nazarɛti, a tagara sigi Kafaranamu Galile baa daa la Zabulɔn ni Nɛfutali mara la.

¹⁴ A tagara sigi o yɔrɔ la janko kira Ezayi ye min fɔ, o ka dafa. A tun ko:

¹⁵ «Zabulɔn ni Nɛfutali mara mɔgɔw, kɔgɔji faan mara mɔgɔw, Zurudɛn baji kɔfɛ mara mɔgɔw Galile mara lonanw,

¹⁶ jama min siginin be dibi la, yeelenba bɔra u ye. Minw siginin be dibiba la, yeelen bɔra u ye.»

¹⁷ Kabini o tuma, Yezu y'a daminɛ ka waajuli kɛ. A tun b'a fɔ mɔgɔw ye ko: «Aw ye nimisa ka faran aw ka kojuguw la bari *sankolo masaya waati surunyana.»

Yezu ka kalanden fɔlɔw

¹⁸ Yezu yaalatɔ Galile baa daa la, a ye balimacɛ fila dɔ ye. Simɔn min tɔgɔ ko Piyɛri fana, a n'a dɔgɔcɛ Andere tun lo. U tun be jɔɔ filila baji la, mɔnikɛlaw tun lo.

¹⁹ Yezu y'a fɔ u ye ko: «Aw ka tugu ne kɔ. Ne bena aw kɛ diɲɛ mɔlaw ye ka mɔgɔw sɔrɔ.»

²⁰ O yɔrɔnin kelen, u y'u ka jɔɔw to yen ka tugu a kɔ.

²¹ A tagara ɲafɛ tugu, a ye balimacɛ fila wɛrɛ ye, olu tun ye Zebede ka deenw ye, Zaki n'a dɔgɔcɛ Zan. U tun b'u ka jɔɔw lalagara kurun kɔnɔ n'u facɛ Zebede ye. Yezu y'u wele.

²² O yɔrɔnin bɛɛ, u ye kurun n'u facɛ to yen ka tugu a kɔ.

Yezu be banabagatɔw kɛnɛya

²³ Yezu tun be Galile mara bɛɛ yaala ka mɔgɔw kalan zuwifuw ka kalansow kɔnɔ. A tun be *sankolo masaya kibaru diman fɔ u ye, ani ka banabagatɔ sifa bɛɛ kɛnɛya jama cɛma.

²⁴ Yezu tɔgɔ bɔra u ka mara bɛɛ la fɔɔ ka taga se Siri jamana na. O la, mɔgɔw tun be taga sɛgɛrɛ n'u ka banabagatɔw bɛɛ ye: jinatɔw, ni kirikirimasiɲɛtɔw ani namaraw Yezu tun b'u kɛnɛya.

²⁵ Jamaba tugura a kɔ. U dɔw bɔra Galile mara la, dɔw bɔra Dugu Tan mara la, dɔw fana bɔra Zude mara la. Zurudɛn baji kɔfɛ mɔgɔw ni Zeruzalɛmukaw tun be yen fana.