Matiyu 28 - ALA KA KUMA

Yezu kununko

¹ Lafiɲɛlon tɛmɛna, lɔgɔkun daminɛlon sɔgɔmadafɛ, Mariyamu ka bɔ Magidala ni Mariyamu dɔ nin tagara kaburu yɔrɔ la.

² O yɔrɔnin bɛɛ, dugukolo yɛrɛyɛrɛla kosɔbɛ. Ala ka mɛlɛkɛ dɔ jigira ka kabakuru kolonkolon k'a bɔ kaburu daa la, ka sigi a kan.

³ Mɛlɛkɛ nin ɲada tun be manamana i n'a fɔ saan manamanatɔ, a ka fani tun gwɛnin lo parapara.

⁴ Kɔlɔsilikɛbagaw siranna kosɔbɛ fɔɔ u yɛrɛyɛrɛla ka kirin.

⁵ Mɛlɛkɛ y'a fɔ muso nunu ye ko: «Aw kana siran, bari ne y'a lɔn ko aw be Yezu le yɔrɔ ɲinina, u tun ye min gwengwen lɔgɔ kan.

⁶ A te yan tugu, bari a kununna i n'a fɔ a tun y'a fɔ cogo min na. Aw ye na a layɔrɔ filɛ.

⁷ Aw ye teliya ka taga fɔ a ka kalandenw ye ko a kununna, a ko a be taga aw ɲa Galile mara la. Aw bena taga sɔrɔ o yɔrɔ la. Koo min tun be ne fɛ k'a fɔ aw ye, o le ye nin ye.»

⁸ Musow sirannin n'u nisɔndiyanin teliyara ka bɔ kaburu la. U bolila ka taga o kibaru fɔ Yezu ka kalandenw ye.

⁹ O yɔrɔnin bɛɛ, Yezu y'u kunbɛn k'a fɔ u ye ko: «Aw dansɛ.» U gwɛrɛla a la k'u kunbiri gwan a kɔrɔ, k'a bato.

¹⁰ Yezu y'a fɔ u ye ko: «Aw kana siran, aw ye taga fɔ n balimaw ye k'u ka taga Galile, k'u bena n ye o yɔrɔ le la.»

Kaburu kɔlɔsibagaw

¹¹ Ka muso nunu to sira la, kɔlɔsilikɛbaga nunu dɔw tagara dugu kɔnɔ, k'o koow bɛɛ lakali sarakalasebagaw ye.

¹² Olu ni cɛkɔrɔbaw ye ɲɔgɔnye kɛ, ka bɛn a la, ka wari caaman di kɔlɔsilikɛbagaw ma,

¹³ k'a fɔ u ye ko: «Aw ka to k'a fɔ ko k'aw to sinɔgɔ la sufɛ, a ka kalandenw nan'a suu bɔ ka taga n'a ye.

¹⁴ O koo mana se masacɛ ka lasigiden ma tuma min na, an bena koo bɛɛ kɛ k'a dusu suma, waasa a kana kojugu kɛ aw la.»

¹⁵ Kɔlɔsilikɛbagaw y'o wari minɛ, k'a daminɛ k'o kibaru jɛnsɛn i n'a fɔ u tun y'a ɲini u fɛ cogo min na. A kɛra ten, o kibaru sera yɔrɔ bɛɛ la zuwifuw cɛma fɔɔ ka na se bii ma.

Yezu b'a yɛrɛ yira a ka kalandenw na

¹⁶ Yezu ka kalanden tan ni kelen nunu tagara Galile, A tun ye kulu min koo fɔ u ye, u tagara ale kan.

¹⁷ U ye Yezu ye tuma min na, u y'a bato, nga u dɔw sigasigara.

¹⁸ Yezu gwɛrɛla u la k'a fɔ u ye ko: «Ala ye sebagaya bɛɛ di ne ma sankolo la ani dugukolo kan.

¹⁹ O la, aw ye taga siyaw bɛɛ kɛ ne ka kalandenw ye k'u batize Faa, ni Dencɛ ni Nii Senuman tɔgɔ la,

²⁰ k'u kalan, waasa u ka ne ka kuma bato. Ne kɔni bena to n'aw ye loon o loon fɔɔ ka taga diɲɛ wili.»