Matiyu 26 - ALA KA KUMA

Cɛkɔrɔbaw be namara siri Yezu la

¹ Yezu tilanin kɔ a ka kuma na, a y'a fɔ a ka kalandenw ye ko:

² «Aw b'a lɔn ko yanni tile fila, *Hɔrɔnya ɲanagwɛ bena se, u bena Mɔgɔ Dencɛ don mɔgɔjuguw bolo, waasa u k'a gwengwen lɔgɔ kan.»

³ O waati la yɛrɛ, sarakalasebagaw kuntigiw ni cɛkɔrɔbaw tun ye ɲɔgɔn lajɛn sarakalasebagaw kuntigiba ka luu kɔnɔ, min tɔgɔ tun ko Kayifu.

⁴ Olu bɛnn'a la k'u bena Yezu minɛ dogo la k'a faga.

⁵ U tun b'a fɔra k'u man kan k'a minɛ ɲanagwɛ tuma na, ko n'o tɛ, mɔgɔw bena muruti.

Muso dɔ be Yezu boɲa

⁶ Ka Yezu to farisogobanatigi Simɔn ka soo Betani,

⁷ muso dɔ gwɛrɛla a la, daga cɛɲumanin dɔ tun b'a bolo. O daga nin tun dilannin be ni kabakuru ye min be wele alabatiri. A fanin tun be tulu kasadiman dɔ la min sɔngɔ ka gwɛlɛ. Ka Yezu to dumuni na, a ye tulu nin bɔn a kuun na.

⁸ Kalandenw y'o ye minkɛ, u dimina k'a fɔ ko: «Mun na a ye tulu kasadiman nin cɛn ten?

⁹ A tun be se ka feere sɔngɔgwɛlɛn na k'a wari di fantanw ma.»

¹⁰ Yezu y'o kuma mɛn u fɛ minkɛ, a y'a fɔ u ye ko: «Mun na aw b'a dusu kasi? A ye koɲuman le kɛ ne ye ten.

¹¹ Aw bena to ni fantanw ye tuma bɛɛ. Nga ne tena to n'aw ye tuma bɛɛ.

¹² Muso nin ye tulu nin bɔn ne fari kan, waasa ka ne fari labɛn ne suu donlon kama.

¹³ Tiɲɛ na, ne b'a fɔ aw ye ko kibaru diman nin mana fɔ diɲɛ yɔrɔ o yɔrɔ, muso nin ye min kɛ ne ye, a tɔgɔ bena fɔ, mɔgɔw hakili be to a la.»

Zuda b'a fɛ ka Yezu don bolo la

¹⁴ O tuma na, Yezu ka kalanden tan ni fila la kelen, min tɔgɔ ko Zuda Isikariyɔti, ale tagara sarakalasebagaw kuntigiw fɛ,

¹⁵ k'a fɔ u ye ko: «Aw bena mun le di ne ma, ni ne y'aw dɛmɛ ka Yezu minɛ?» Olu ye warigwɛ bi saba d'a ma.

¹⁶ Kabini o waati la Zuda tun be cogoɲuman ɲinina waasa ka Yezu don u bolo.

Yezu ko kalanden fila ka taga Hɔrɔnya ɲanagwɛ dumuni labɛn

¹⁷ *Buru funubali ɲanagwɛ loon fɔlɔ, Yezu ka kalandenw y'a ɲininga ko: «I b'a fɛ an ka taga *Hɔrɔnya ɲanagwɛ dumuni labɛn i ye yɔrɔ jumɛn?»

¹⁸ Yezu y'a fɔ u ye ko: «Aw ye taga dugu kɔnɔ, karimasina fɛ, k'a fɔ a ye ko karamɔgɔ ko ale taawaati sera, ko ale n'a ka kalandenw bena Hɔrɔnya ɲanagwɛ dumuni kɛ a fɛ.»

¹⁹ Kalandenw y'a kɛ i ko Yezu tun y'a fɔ u ye cogo min na. U ye Hɔrɔnya ɲanagwɛ dumuni labɛn yen.

Yezu ko dɔ bena ale janfa

²⁰ Sufɛ, Yezu n'a ka kalanden tan ni fila nunu tun siginin be dumuni na.

²¹ K'u to dumuni na, Yezu y'a fɔ u ye ko: «Tiɲɛ na, ne b'a fɔ aw ye ko aw dɔ bena ne don mɔgɔjuguw bolo.»

²² Kalandenw dusu kasira kosɔbɛ, fɔɔ u be Yezu ɲininga kelen kelen ko: «Ne lo wa, Matigi?»

²³ Yezu y'u jaabi ko: «Mɔgɔ min y'a bolo don ni ne ye minan kɔnɔ, ale lo bena ne don mɔgɔjuguw bolo.

²⁴ Mɔgɔ Dencɛ bena sa i ko a fɔra Ala ka kuma na a ka koo la cogo min na. Nga min bena Mɔgɔ Dencɛ don mɔgɔjuguw bolo, bɔnɛ bena o tigi sɔrɔ. N'a tigi yɛrɛ tun ma wolo, o tun ka fisa a ma.»

²⁵ Zuda min tun b'a la k'a janfa, ale y'a ɲininga ko: «Ne lo wa, karamɔgɔ?» Yezu y'a jaabi ko: «E yɛrɛ le y'a fɔ.»

Yezu ka dumuni laban

²⁶ Ka Yezu n'a ka kalandenw to dumuni na, a ye buru ta ka barika la Ala ye. O kɔ, a y'a karikari k'a di a ka kalandenw ma, k'a fɔ u ye ko: «Aw k'a minɛ k'a dumu, nin ye ne fari ye.»

²⁷ O kɔ, a ye duvɛn ta ka barika la Ala ye, k'a d'u ma k'a fɔ ko: «Aw bɛɛ k'a min,

²⁸ bari nin ye ne joli ye, joli min be Ala ka layidu dafa, joli min bena bɔn mɔgɔ bɛɛ ka hakɛw yafa kosɔn.

²⁹ Ne b'a fɔ aw ye ko ne tena duvɛn min tugu, fɔɔ loon min na ne bena duvɛnkɛnɛ min n'aw ye ne Faa ka masaya la.»

³⁰ U ye dɔnkiliw la Ala ye ka ban tuma min na, u bɔra ka taga Olivuyirikulu kan.

Yezu ko Piyɛri ben'a fɔ ko a t'ale lɔn

³¹ O kɔ, Yezu y'a fɔ a ka kalandenw ye ko: «Bii suu nin na, aw bɛɛ bena boli ka ne to, bari a fɔra Ala ka kuma na ko: ‹Ni bena sagadɛndɛbaga bugɔ, sagaw be jɛnsɛn.› »

³² Yezu tagara ɲa ni kuma ye k'a fɔ ko: «Ni ne kununna n sanin kɔ tuma min na, ne bena bila aw ɲa Galile mara la.»

³³ Piyɛri y'a fɔ a ye ko: «Hali ni bɛɛ bolila k'i to, ne kɔni tena boli abada.»

³⁴ Yezu y'a fɔ a ye ko: «Tiɲɛ na, ne b'a fɔ i ye ko bii suu nin na yɛrɛ, sanni dondo ka kasi, i ben'a fɔ siɲɛ saba ko i te ne lɔn.»

³⁵ Piyɛri y'a fɔ a ye ko: «Hali ni ne ka kan ka sa n'i ye, ne kɔni ten'a fɔ ko n t'i lɔn fewu.» Kalanden tɔ nunu fana ko ten.

Yezu be Ala daali Zɛtisemane

³⁶ Yezu n'a ka kalandenw tagara yɔrɔ dɔ la u be min wele ko Zɛtisemane. A y'a fɔ u ye ko: «Aw ye sigi yan, ne bena taga ɲafɛ ka Ala daali.»

³⁷ A tagara ni Piyɛri ni Zebede dencɛ fila nunu ye. A dusu daminɛna ka kasi, a kɔnɔ gwanna.

³⁸ A y'a fɔ u ye ko: «Dusukasi bena n faga. Aw ye to yanni ne ye, aw kana sinɔgɔ.»

³⁹ A tagara ɲafɛ dɔɔni k'a kunbiri gwan k'a ɲaa biri duguma, ka Ala daali ko: «N Faa, ne kisi tɔɔrɔ nin ma n'a be se ka kɛ. Nga o kana kɛ ne sago la fɔɔ e sago.»

⁴⁰ O kɔ, a segira ka na kalanden saba nunu fɛ, ka u sɔrɔ sinɔgɔ la. A y'a fɔ Piyɛri ye ko: «Aw ma se ka to ɲaa na ni ne ye hali waati dɔɔni yɛrɛ wa?

⁴¹ Aw ye to ɲana ka Ala daali waasa aw kana don kɔrɔbɔli la. Koɲumankɛ miiriya be mɔgɔw kɔnɔ, nga a kɛ see t'u ye.»

⁴² A bɔra u kɔrɔ tugu siɲɛ filanan na ka taga Ala daali ko: «N Faa, n'a kɛra ko ne te se ka kisi o tɔɔrɔ nin ma, e sago ka kɛ.»

⁴³ A kɔsegira tugu ka n'a sɔrɔ u be sinɔgɔra, bari sinɔgɔ tun b'u la kosɔbɛ.

⁴⁴ Yezu y'u to yen ka kɔsegi ka taga Ala daali a siɲɛ sabanan na n'o kuma kelen ye.

⁴⁵ O kɔ, a kɔsegira a ka kalandenw yɔrɔ la, k'a fɔ u ye ko: «Aw be sinɔgɔra ka lafiɲɛ halibi wa? Ayiwa, waati surunyana. U bena Mɔgɔ Dencɛ don hakɛkɛlaw bolo.

⁴⁶ Aw ye wili an ka taga. Min be ne donna u bolo, ale natɔ filɛ.»

Yezu minɛko

⁴⁷ Ka Yezu t'o kuma na, Zuda min tun ye kalanden tan ni fila nunu dɔ ye, ale sera ni jamaba ye. Murujanjan ni berew tun b'u bolo. Sarakalasebagaw kuntigiw ni cɛkɔrɔbaw le tun y'u ci.

⁴⁸ Yezu janfabaga Zuda tun y'a fɔ jama ye ko: «Ne bena cɛɛ min fo ka n bolo meleke a kaan na, o le ye Yezu ye. Aw k'a minɛ.»

⁴⁹ O yɔrɔnin kelen, Zuda sinna Yezu ma k'a fɔ a ye ko: «I ni suu, karamɔgɔ.» O kɔ, a y'a bolo meleke Yezu kaan na.

⁵⁰ Yezu y'a fɔ a ye ko: «N teri, i b'a fɛ ka koo min kɛ, o kɛ.» Mɔgɔ nunu gwɛrɛla ka Yezu minɛ.

⁵¹ Mɔgɔ minw tun be ni Yezu ye, olu dɔ y'a ka murujan bɔ ka sarakalasebagaw kuntigiba ka baaraden tulo tigɛ.

⁵² Yezu y'a fɔ o tigi ye ko: «I ka murujan don a nɔɔ na, bari mɔgɔ minw be kɛlɛ kɛ ni murujan ye, murujan le bena u faga fana.

⁵³ E m'a lɔn ko ne be se k'a fɔ n Faa ye ko a ka n dɛmɛ wa? O yɔrɔnin bɛɛ fana, a be se ka mɛlɛkɛ waa caaman ci ka na n dɛmɛ.

⁵⁴ N'o kɛra, Ala ka kuma min b'a fɔ k'o koow ka kan ka kɛ, o bena dafa cogo di?»

⁵⁵ O kɔ, Yezu y'a fɔ jama ye ko: «Aw nana ni murujanjan ni berew ye ka ne minɛ, i n'a fɔ ne ye benkannikɛla ye. Ne tun be to ka sigi Alabatosoba kɔnɔ loon bɛɛ ka mɔgɔw kalan, aw ma ne minɛ

⁵⁶ Nga, o koo bɛɛ kɛra waasa min fɔra kiraw ka sɛbɛw kɔnɔ, o ka dafa.» O la, kalandenw bɛɛ bolila k'a to.

Yezu be kititigɛlaw ɲafɛ

⁵⁷ Mɔgɔ minw tun ye Yezu minɛ, olu tagara ni Yezu ye sarakalasebagaw kuntigiba Kayifu ka luu kɔnɔ. Sariya karamɔgɔw ni cɛkɔrɔbaw tun ye ɲɔgɔn lajɛn o yɔrɔ la.

⁵⁸ Piyɛri tugura a kɔ ka furancɛba to u ni ɲɔgɔn cɛ fɔɔ ka se sarakalasebagaw kuntigiba ka luu kɔnɔ. A donna ka sigi ni yɔrɔ kɔlɔsibagaw ye k'a filɛ, koo nin bena laban cogo min na.

⁵⁹ O y'a sɔrɔ sarakalasebagaw kuntigiw ni zuwifuw ka kititigɛlaw bɛɛ tun be galon dɔ ɲinina k'a la Yezu kan, waasa ka se k'a faga.

⁶⁰ Mɔgɔ caaman nana galon tigɛ ka la a kan, nga u ma se k'a jalakita sɔrɔ. O kɔ, mɔgɔ fila dɔ nana,

⁶¹ olu y'a fɔ ko: «Cɛɛ nin tun y'a fɔ ko ale be se ka Alabatosoba ci, ka tila k'a lɔ tile saba kɔnɔ.»

⁶² Sarakalasebagaw kuntigiba wilila ka Yezu ɲininga ko: «Mɔgɔ nunu be kuma min fɔra i koo la, i te foyi fɔ o la wa?»

⁶³ Nga Yezu jera, a ma foyi fɔ. Sarakalasebagaw kuntigiba y'a fɔ a ye ko: «Ni ele lo ye Ala ka Mɔgɔ wolomanin, ni Ala Dencɛ ye, a fɔ an ye Ala kosɔn.»

⁶⁴ Yezu y'a jaabi ko: «Ele yɛrɛ le y'a fɔ, nga ne b'a fɔ aw ye ko k'a ta sisan ma, aw bena Mɔgɔ Dencɛ siginin ye Setigi Ala kinibolo fɛ, o kɔ, aw ben'a natɔ ye sankaba kan.»

⁶⁵ Sarakalasebagaw kuntigiba dimina fɔɔ a y'a ka fani faran k'a fɔ ko: «A ye Ala tɔgɔ cɛn! An mako te mɔgɔ la tugu k'a jalaki. Aw ye Ala tɔgɔ cɛnkuma mɛn a daa la kɛ!

⁶⁶ Aw be mun le miiri o la?» U y'a jaabi ko: «A ka kan ka faga.»

⁶⁷ O kɔ, dɔw y'u daji tu a ɲaa na, k'a bugɔ ni bolokuruw ye. Dɔw y'a tulo ci n'u b'a fɔra ko:

⁶⁸ «Ala ka Mɔgɔ wolomanin, jɔn y'i bugɔ?»

Piyɛri ko a te Yezu lɔn

⁶⁹ Piyɛri tun siginin be kɛnɛma luu kɔnɔ. Sarakalasebagaba ka baaraden musoman dɔ gwɛrɛla Piyɛri la k'a fɔ a ye ko: «Ele fana tun be ni Galileka Yezu ye.»

⁷⁰ Nga Piyɛri y'a sɔsɔ u bɛɛ ɲana ko: «E be min fɔra, ne t'o lɔn.»

⁷¹ Piyɛri bɔra o yɔrɔ la ka taga luda faan fɛ. Sarakalasebagaba ka baaraden musoman dɔ wɛrɛ nana tugu. Ale y'a fɔ o yɔrɔ mɔgɔw ye ko: «Cɛɛ nin tun be ni Nazarɛtika Yezu ye.»

⁷² Piyɛri y'a fɔ tugu ko: «Ala kama, n te cɛɛ nin lɔn.»

⁷³ Yanni dɔɔni mɔgɔ minw tun b'o yɔrɔ la, olu gwɛrɛla Piyɛri la k'a fɔ a ye ko: «Tiɲɛ na, ele ye mɔgɔ nunu dɔ ye. Hali i ka kuma yɛrɛ b'a yira.»

⁷⁴ Nga Piyɛri ko: «Ni ne be galon tigɛra, Ala kana n to, ne te cɛɛ nin lɔn fewu.» O yɔrɔnin bɛɛ, dondo kasira.

⁷⁵ O tuma na, Piyɛri hakili jigira Yezu ka kuma na a tun ye min fɔ a ye ko: «Sanni dondo ka kasi, i ben'a fɔ siɲɛ saba ko i te ne lɔn.» Piyɛri bɔra luu kɔfɛ ka kasi kosɔbɛ.