Matiyu 25 - ALA KA KUMA

Yezu be talen la sunguru tan koo la

¹ «*Sankolo masaya donko bena kɛ i n'a fɔ sunguru tan dɔw ka koo. U tun y'u ka fitinɛw ta k'u be taga kɔɲɔcɛ kunbɛn.

² Mɔgɔ duuru tun ye hakilitanw ye, duuru tun ye hakilitigiw ye.

³ Minw tun ye hakilitanw ye, olu y'u ka fitinɛw ta, u ma tulu dɔ ta minan wɛrɛw kɔnɔ.

⁴ Nga hakilitigiw y'u ka fitinɛw ta, ka tila ka tulu dɔ ta minan wɛrɛw kɔnɔ.

⁵ Kɔɲɔcɛ mɛnna a tun te nana minkɛ, sinɔgɔ ye sunguru tan nunu minɛ, u bɛɛ sinɔgɔra.

⁶ Dugutilama, pɛrɛnkan dɔ bɔra ko: ‹Kɔɲɔcɛ filɛ, a be nana, aw ye bɔ ka taga kunbɛn.›

⁷ O tuma na, sunguru tan nunu wilila k'u ka fitinɛw labɛn.

⁸ Hakilitan nunu y'a fɔ hakilitigiw ye ko: ‹Aw y'an sɔn ni tulu dɔɔni dɔɔni ye, bari an ka fitinɛw b'a fɛ ka faga.›

⁹ Hakilitigi nunu y'a fɔ u ye ko: ‹Ayi, bari an ka tulu tena se k'an bɛɛ labɔ. Min ka fisa, aw ye taga tulufeerebagaw fɛ, ka dɔ san aw yɛrɛ ye.›

¹⁰ Hakilitan nunu tagara tulu sanyɔrɔ la tuma min na, kɔɲɔcɛ sera. Hakilitigiw donna ni kɔɲɔcɛ ye kɔɲɔbon na. U ye daa tugu.

¹¹ O kɔ, hakilitan nunu kɔsegira ka na tuma min na, u ye daa kɔkɔ k'a fɔ ko: ‹Matigi, Matigi, daa yɛlɛ an ye.›

¹² Nga kɔɲɔcɛ y'u jaabi ko: ‹Tiɲɛ na, ne b'a fɔ aw ye, ne te aw lɔn.›

¹³ O la, aw labɛnnin ka to, bari aw t'o loon n'a waati lɔn.

Yezu be talen la baaraden saba koo la

¹⁴ «A bena kɛ i n'a fɔ cɛɛ dɔ, min tun be tagara taama na. A y'a ka baaradenw wele k'a ka nafolo kalifa u ma.

¹⁵ A ye sanukuru kɛmɛ duuru di kelen ma, ka kɛmɛ fila di kelen wɛrɛ ma, ani ka kɛmɛ di tɔ kelen nin ma, ka kɛɲɛ n'u kelen kelen bɛɛ seko ye. O kɔ, a tagar'a ka taama na.

¹⁶ Baaraden min tun ye sanukuru kɛmɛ duuru sɔrɔ, ale tagara jago kɛ ka kɛmɛ duuru wɛrɛ sɔrɔ tɔnɔ ye.

¹⁷ Min tun ye kɛmɛ fila sɔrɔ, ale fana tagara ka jago kɛ ka kɛmɛ fila wɛrɛ sɔrɔ tɔnɔ ye.

¹⁸ Nga baaraden min tun ye sanukuru kɛmɛ sɔrɔ, ale tagara dingɛ sogi k'a kuntigi ka wari nin dogo yen.

¹⁹ Baaraden nunu kuntigi mɛnna kosɔbɛ, o kɔ, a nana k'u wele waasa u ka na n'a ka nafolo ye a k'a jati.

²⁰ Baaraden min tun ye sanukuru kɛmɛ duuru sɔrɔ, ale gwɛrɛla ni kɛmɛ duuru wɛrɛ ye, k'a fɔ ko: ‹Matigi, e tun ma sanukuru kɛmɛ duuru le di ne ma wa? A filɛ, ne ye kɛmɛ duuru wɛrɛ sɔrɔ tɔnɔ ye.›

²¹ A kuntigi y'a fɔ a ye ko: ‹O ɲana, i ye baaradenɲuman ani mɔgɔsɔbɛ ye. I kɛra mɔgɔsɔbɛ ye kofitini nin na, o la, ne bena koo caaman kalifa i ma. Na, an ka nisɔndiya ɲɔgɔn fɛ.›

²² Min tun ye kɛmɛ fila sɔrɔ, ale fana gwɛrɛla k'a fɔ ko: ‹Matigi, e tun ma sanukuru kɛmɛ fila le kalifa ne ma wa? A filɛ, ne ye kɛmɛ fila wɛrɛ sɔrɔ tɔnɔ ye.›

²³ A kuntigi y'a fɔ a ye ko: ‹A ɲana, mɔgɔɲuman ani mɔgɔsɔbɛ. I kɛra mɔgɔsɔbɛ ye kofitini nin na, o la, ne bena koo caaman kalifa i ma. Na, an ka nisɔndiya ɲɔgɔn fɛ.›

²⁴ Ayiwa, baaraden min tun ye sanukuru kɛmɛ sɔrɔ, ale fana gwɛrɛla k'a fɔ ko: ‹Matigi, ne tun y'a lɔn ko e ka koo ka gwɛlɛ, e ma danni kɛ foro min na, e b'o yɔrɔ suman tigɛ, e ma serili kɛ yɔrɔ min na, e b'o yɔrɔ suman ladon.

²⁵ Ne siranna, n tagara i ka wari dogo dingɛ kɔnɔ, i ka wari filɛ, a minɛ.›

²⁶ A kuntigi y'a jaabi ko: ‹Baaradenjugu, salabagatɔ, e tun y'a lɔn ko ne ma danni kɛ foro min na, ne b'a fɛ o suman ka kɛ n ta ye, k'a lɔn fana ko ne ma serili kɛ yɔrɔ min na, ne b'a fɛ o suman ka kɛ n ta ye,

²⁷ o la, e tun ka kan ka ne ka wari di jagokɛlaw ma. Ne tun bena segi ka na n ka nafolo n'a tɔnɔ sɔrɔ.

²⁸ Aw ye sanukuru nunu bɔsi a la k'a di sanukuru waa tan tigi ma,

²⁹ bari fɛɛn be mɔgɔ min fɛ, dɔ bena d'o tigi ma ka fara a ta kan k'a caya, nga fɛɛn te min fɛ, hali dɔɔni min b'a fɛ, o bena bɔsi a la.

³⁰ Baaradenjugu nin kɔni, aw y'ale minɛ k'a fili kɛnɛma dibi la. A bena kasi ka kule yen.›

Diɲɛ laban kiti

³¹ «Tuma min na Mɔgɔ Dencɛ bena na a ka nɔɔrɔ la ni mɛlɛkɛw ye, a bena sigi a ka masasigilan kan.

³² Siyaw bɛɛ bena lajɛn a ɲafɛ, a bena mɔgɔw faran k'u bɔ ɲɔgɔn na i n'a fɔ sagadɛndɛbaga be sagaw faran ka bɔ baaw la cogo min na.

³³ A bena mɔgɔtilenninw bila a kinibolo la, ka mɔgɔjuguw bila a numanbolo la.

³⁴ O kɔ, a ben'a fɔ a kinibolo la taw ye ko: ‹Aw ye na ne Faa ka dubadenw, ka don a ka masaya la min tun labɛnna aw ye kabini diɲɛ dantuma.

³⁵ Bari kɔngɔ tun be ne la, aw ye dumuni di ne ma, minnɔgɔ tun be ne la, aw ye jii di ne ma. Ne tun ye lonan ye, aw ye jigiyɔrɔ di ne ma.

³⁶ Fani tun te ne fɛ, aw ye fani di ne ma. Ne tun bananin lo, aw y'aw janto ne la. Ne tun be kaso la, aw nana ne filɛ yen.›

³⁷ Mɔgɔtilenninw ben'a fɔ ko: ‹Matigi, an y'i ye tuma jumɛn ni kɔngɔ b'i la, n'an ye dumuni d'i ma? An y'i ye tuma jumɛn ni minnɔgɔ b'i la n'an ye jii d'i ma?

³⁸ An y'i lonanman ye tuma jumɛn ka jigiyɔrɔ d'i ma, ani k'i fari lakolon ye n'an ye fani d'i ma?

³⁹ Tuma jumɛn an y'i ye n'i bananin be, walima n'i be kaso la n'an tagara bɔ i ye k'i dɛmɛ?›

⁴⁰ A bena u jaabi ko: ‹Tiɲɛ na, ne b'a fɔ aw ye, ko aw y'o koo nunu kɛ ne balima o balima ye, aw y'o kɛ ne le ye.›

⁴¹ O kɔ, a ben'a fɔ a numanbolo la mɔgɔw ye ko: ‹Aw ye taga ka bɔ ne kɔrɔ, mɔgɔjuguw. Aw ye taga jahanama na, min labɛnna Sutana n'a kɔmɔgɔw ye,

⁴² bari kɔngɔ tun be ne la, aw ma dumuni di ne ma. Minnɔgɔ tun be ne la, aw ma jii di ne ma.

⁴³ Ne tun ye lonan ye, aw ma jigiyɔrɔ di ne ma. Ne fari lakolon tun lo, aw ma fani di ne ma. Ne bananin tun lo ani ne tun be kaso la, aw ma na bɔ ne ye ka ne mako ɲa.›

⁴⁴ Olu fana ben'a jaabi ko: ‹Matigi, an tun y'i ye tuma jumɛn ni kɔngɔ b'i la, walima minnɔgɔ, walima n'i ye lonan ye, walima ni fani t'i fɛ, walima n'i bananin lo, walima kaso la, n'an m'i mako ɲa?›

⁴⁵ A bena u jaabi ko: ‹Tiɲɛ na, ne b'a fɔ aw ye, ko aw banna k'o koo nunu kɛ mɔgɔw la dɔgɔmani dɔ ye minkɛ, aw banna k'o kɛ ne yɛrɛ le ye.› »

⁴⁶ Yezu y'o kuma laban ko: «O mɔgɔjugu nunu bena taga tɔɔrɔ banbali yɔrɔ la, mɔgɔtilenninw bena don Ala ka hɛrɛ banbali yɔrɔ la.»