Matiyu 23 - ALA KA KUMA

Yezu be kangari la a ka kalandenw ye

¹ Yezu tun be kumana a ka kalandenw ni jama fɛ. A tun y'a fɔ u ye ko:

² «Ala ye sariya min di Musa ma, sariya karamɔgɔw ni *Fariziɲɛw le ka kan ka mɔgɔw kalan o la.

³ N'u y'aw kalan ni sariya koo min ye, aw k'o kɛ. Nga aw kana u ka kɛwali filɛ, bari u be min fɔ, u t'o kɛ.

⁴ U be doni gwiliman siri k'o la mɔgɔw kuun na, nga olu yɛrɛ te sɔn k'u dɛmɛ haali dɔɔni.

⁵ U ka koo bɛɛ kɛra tɔgɔɲini ye. O le y'a to u be sɛbɛ minw bɛɛ siri u teen na, ani u bolo la, u bɛɛ ka bonbon. U b'u ka faniw kalan ka masirifɛn kɛ u la.

⁶ A ka d'u ye ka sigi ɲafɛ dumuni kɛyɔrɔw la ni kalansow kɔnɔ.

⁷ Forobayɔrɔw la, u b'a fɛ mɔgɔw k'u fo, ani k'u wele karamɔgɔ.

⁸ Nga aw kɔni, aw kana sɔn u b'aw wele karamɔgɔ, bari aw bɛɛ ye balimaw ye, aw bɛɛ ka karamɔgɔ ye kelen ye.

⁹ Aw kana mɔgɔ si wele ko aw facɛ dugukolo kan, bari aw Facɛ ye kelen ye, Ala min be sankolo la.

¹⁰ Aw kana sɔn u b'aw wele ko kuntigi, bari aw kuntigi ye kelen ye, o ye Ala ka Mɔgɔ wolomanin nin ye.

¹¹ Mɔgɔ min ye mɔgɔbaba ye aw cɛma, o ka kan ka kɛ aw ka baaraden ye.

¹² Mɔgɔ o mɔgɔ b'a yɛrɛ boɲa, o tigi bena majigi. Mɔgɔ o mɔgɔ b'a yɛrɛ majigi, o tigi bena boɲa sɔrɔ.

Yezu be sariya karamɔgɔw ni Fariziɲɛw kɔrɔfɔra

¹³ «Bɔnɛ y'aw ta ye, aw sariya karamɔgɔw ni *Fariziɲɛ namaramɔgɔw, bari aw be *sankolo masaya donda tugu, aw tena don, minw b'a fɛ ka don fana, aw t'a to olu ka don. [

¹⁴ Bɔnɛ y'aw ta ye, aw sariya karamɔgɔw ni Fariziɲɛ namaramɔgɔw, bari aw be firiyamusow bololafɛnw bɛɛ bɔsi u la, o kɔ, aw be mɛn Aladali la janko mɔgɔw k'aw filɛ mɔgɔɲumanw ye. O la, aw ka jalaki tɔɔrɔ bena juguya kosɔbɛ.]

¹⁵ Bɔnɛ y'aw ta ye, aw sariya karamɔgɔw ni Fariziɲɛ namaramɔgɔw, aw be kɔgɔji tigɛ ka taga dugukolo faan bɛɛ la ka tuubiden ɲini. Ni dɔ sɔrɔla, aw b'a kɛ jahanamaden ye ka tɛmɛ aw yɛrɛ kan fɔɔ siɲɛ fila.

¹⁶ Aw sirayirabaga fiɲɛntɔw, bɔnɛ y'aw ta ye. Aw b'a fɔ ko ni mɔgɔ dɔ kalila Alabatosoba la, k'o te jati, nga ko ni mɔgɔ min kalila Alabatosoba kɔnɔ sanu na, k'o le be jati.

¹⁷ Naloman ni fiɲɛntɔw, jumɛn le ka fisa u fila la: sanu wa, walima Alabatosoba?

¹⁸ Aw b'a fɔ fana ko ni mɔgɔ kalila sarakabɔlan na, k'o te jati, nga ko saraka min b'a kan, ko ni mɔgɔ kalila o la, k'o le be jati.

¹⁹ Fiɲɛntɔ nunu, jumɛn ka fisa u fila la: saraka wa, walima sarakabɔlan?

²⁰ Ayiwa, mɔgɔ min be kali sarakabɔlan na, o tigi kalila a sanfɛ saraka fana na.

²¹ Mɔgɔ min be kali Alabatosoba la, o tigi kalila Ala fana na.

²² Mɔgɔ min be kali sankolo la, o tigi kalila Ala ka masasigilan na, ani Ala min siginin be o kan.

²³ Bɔnɛ b'aw ye, aw sariya karamɔgɔw ni Fariziɲɛ namaramɔgɔw, aw be nanaye, ani nanfuraburu sifa bɛɛ jaka bɔ. Nga sariya koo minw ka gwɛlɛ, i n'a fɔ tilenninya, ni makari ani kantigiya, aw te olu bato. Aw tun ka kan ka olu le kɛ ka dɔ nunu fara o kan.

²⁴ Sirayirabaga fiɲɛntɔw, aw b'aw ka minji sɛnsɛn ka limɔgɔmisɛnw bɔ, ka sɔrɔ k'o min, k'a sɔrɔ aw be ɲɔgɔmɛ kunu.

²⁵ Bɔnɛ b'aw ye, aw sariya karamɔgɔw ani Fariziɲɛ namaramɔgɔw, aw be jifilen ni tasa kɔfɛlaw ko k'o gwɛ, k'a sɔrɔ benkanni ni miirijuguw le fanin be aw kɔnɔ.

²⁶ Fariziɲɛ fiɲɛntɔ, i ka filen kɔnɔ ko fɔlɔ, ka sɔrɔ k'a kɔfɛla ko.

²⁷ Bɔnɛ b'aw ye, aw sariya karamɔgɔw ni Fariziɲɛ namaramɔgɔw, aw minw be i n'a fɔ kaburu, u ye min dilan k'a kɛ gwɛman ye. Kɛnɛmala filɛ ka di ɲaa na, nga a kɔnɔna bɛɛ fanin lo kolo, ni ɲamaɲama sifa bɛɛ la.

²⁸ Aw fana be ten, kɛnɛma aw kɛra mɔgɔɲumanw ye, nga namara, ani juguya fanin be aw kɔnɔ.

Yezu be halakiko fɔ

²⁹ «Bɔnɛ y'aw ta ye, aw sariya karamɔgɔw ni *Fariziɲɛ namaramɔgɔw, aw minw be kiraw ka kaburuw lalaga k'u lɔ. Mɔgɔ minw tun kɛra mɔgɔtilenninw ye Ala sira la, aw be olu ka kaburuw masiri ni feerenɲumanw ye.

³⁰ Aw be sɔrɔ k'a fɔ ko n'aw tun be yen aw bɛmaw ka waati la, ko aw tun tena sɔn k'u dɛmɛ ka kira nunu faga.

³¹ O cogo la, aw b'a yira aw yɛrɛ ma ko aw kɛra kira nunu fagabagaw deenw ye.

³² O ka ɲi, aw ka taga ɲa ka aw bɛmaw ka kɛwali tɔɔ dafa.

³³ Aw be i n'a fɔ saaw, fɔnfɔnniden nunu, aw ben'a kɛ cogo jumɛn na ka tila jahanama tasuma ma?

³⁴ Ayiwa, aw ye mɛnni kɛ. Ne bena n ka cidenw ci aw ma, hakilitigiw ani mɔgɔkalanninw. Aw bena dɔw faga ka dɔw gwengwen lɔgɔ kan, ka dɔw bugɔ ni golokami ye kalansow kɔnɔ, ani aw bena tugu dɔw kɔ ka taga u tɔɔrɔ dugu wɛrɛw la.

³⁵ Mɔgɔtilennin minw fagara, olu fagako jalaki bena ben aw kan, k'a ta Abɛli ma, ale min tun ye mɔgɔtilennin ye, fɔɔ ka na se Barasi dencɛ Zakari ma, aw tun ye min faga Alabatosoba yɔrɔ senuman ni sarakabɔyɔrɔ cɛ.

³⁶ Ne b'a fɔ aw ye tiɲɛ na k'olu fagako kunkow bena la bii mɔgɔw kan.»

Zeruzalɛmukaw koo ka di Yezu ye

³⁷ Yezu y'a fɔ ko: «Zeruzalɛmukaw, Zeruzalɛmukaw, aw minw be kiraw faga, ka Ala ka cidenw bon ni kabakuru ye k'u faga, siɲɛ joli ne tun b'a fɛ k'aw lajɛn n kɔrɔ, i n'a fɔ sisɛ b'a deenw lajɛn a gaman kɔrɔ cogo min na, aw ma sɔn.

³⁸ Ayiwa, aw ka boon lakolon bena to aw fɛ.

³⁹ O la, ne b'a fɔ aw ye ko aw tena ne ye tugu, fɔɔ loon min na aw ben'a fɔ ko: ‹Mɔgɔ min be nana Matigi tɔgɔ la, Ala ka barika don o la.› »