Matiyu 14 - ALA KA KUMA

Zan batizelikɛla ka saya koo

¹ O waati la, Galile mara masacɛ *Erɔdi ye Yezu koo mɛn.

² A y'a fɔ a ka baaradenw ye ko: «Zan batizelikɛla yɛrɛ yɛrɛ lo. Ale lo kununna. O le y'a to a be se ka kabakow kɛ.»

³ Tiɲɛ na, Erɔdi tun ye Zan minɛ k'a siri k'a don kaso la a dɔgɔcɛ Filipu ka muso Erodiyadi kama,

⁴ bari Zan tun b'a fɔ a ye ko: «I man kan k'a furu.»

⁵ Erɔdi tun b'a fɛ ka Zan faga, nga a tun be siran zuwifuw ɲa, bari u bɛɛ tun be Zan jati kira ye.

⁶ O bɛɛ la, Erɔdi ka wololon sanyɛlɛma ɲanagwɛ la, Erodiyadi ka denmuso wilila ka dɔɔn kɛ ɲanagwɛ dumunikɛlaw ɲana. O diyara Erɔdi ye kosɔbɛ,

⁷ fɔɔ a kalila ko n'a ye fɛɛn min daali ale fɛ, ko ale bena o d'a ma.

⁸ A bamuso ye kuma min fɔ a ye, a y'o le ta k'a fɔ Erɔdi ye ko: «Zan batizelikɛla kuun di ne ma minan dɔ kɔnɔ.»

⁹ Masacɛ ɲaa sisira. Nga a kalila minkɛ mɔgɔ weleninw ɲana, a sɔnna.

¹⁰ O la, a ye mɔgɔ dɔ ci ko ka taga Zan kuun tigɛ kasobon na ka na n'a ye.

¹¹ U ye Zan kuun tigɛ k'a bila minan dɔ kɔnɔ ka n'a di sunguru nin ma. Ale fana y'a ta ka taga di a bamuso ma.

¹² Zan ka kalandenw tagar'a suu ta k'a don. O kɔ, u tagar'a ɲafɔ Yezu ye.

Yezu be dumuni di mɔgɔ waa duuru ma

¹³ Yezu ye Zan fagako mɛn tuma min na, a bɔra o yɔrɔ la. A kelen donna kurun kɔnɔ ka taga yɔrɔlakolon dɔ la. Nga, mɔgɔw bɔra a taatuma kala ma, u bɔra duguw kɔnɔ ka ta'a fɛ u seen na.

¹⁴ Yezu bɔra kurun kɔnɔ tuma min na, ka jamaba ye, u hinɛ donna a la, a y'u ka banabagatɔw kɛnɛya.

¹⁵ Wulafɛ, kalandenw gwɛrɛla a la k'a fɔ a ye ko: «Suu be ɲini ka ko, yan do ye yɔrɔlakolon ye, e te sira di jama ma u ka taga dafɛduguw la ka dumuni san u yɛrɛw ye wa?»

¹⁶ Yezu y'u jaabi ko: «A daganin te u ka taga yɔrɔ dɔ la, aw yɛrɛ ka dumuni d'u ma.»

¹⁷ U y'a fɔ a ye ko: «Burukun duuru ni jigɛ deen fila le b'an fɛ yan.»

¹⁸ Yezu y'a fɔ u ye ko: «Aw ye na n'u ye yan.»

¹⁹ O kɔ, a y'a fɔ jama ye k'u ka sigi biin kan. A ye burukun duuru ni jigɛ deen fila nunu ta, k'a ɲaa kɔrɔta sanfɛ ka barika la Ala ye, ka burukun nunu karikari k'u di a ka kalandenw ma, kalandenw y'u tilan jama cɛ.

²⁰ U bɛɛ ye dumuni kɛ fɔɔ ka fa, u ye dumuni tɔɔ cɛ ka segi tan ni fila fa n'o ye.

²¹ Mɔgɔ minw ye dumuni kɛ, cɛɛw tun ye mɔgɔ waa duuru ɲɔgɔn ye, musow ni denmisɛnw ma jati.

Yezu be taamana baji kan

²² O koo kɛnin kɔ dɔrɔn, Yezu y'a fɔ a ka kalandenw ye ko u ka don kurun kɔnɔ ka taga ale ɲa baa kɔfɛ, sanni ale be sira di jama ma u ka taga.

²³ Yezu ye sira di ka ban jama ma waati min na, a yɛlɛla kulu kan waasa ka Ala daali. Suu kora k'a sɔrɔ a kelen tun be o yɔrɔ la.

²⁴ O y'a sɔrɔ kurun yɔrɔ tun jaɲana ka ban dugukolo la. Kalandenw tun te se ka kurun boli jikuru fɛ, bari fɔɲɔ tun b'u kunbɛnna.

²⁵ Dugu tun be ɲini ka gwɛ waati min na, Yezu taamana baji kan ka taga u faan fɛ.

²⁶ Kalandenw ye Yezu taamatɔ ye jii kan, u jaa tigɛra fɔɔ u b'a fɔra ko suja lo, u y'a daminɛ ka kule.

²⁷ O yɔrɔnin bɛɛ, Yezu kumana u fɛ k'a fɔ ko: «Aw k'aw jaa gwɛlɛya, ne lo, aw kana siran.»

²⁸ Piyɛri y'a fɔ Yezu ye ko: «Matigi, ni ele lo tiɲɛ na, a fɔ ko ne ka na e fɛ yen jii kan.»

²⁹ Yezu y'a fɔ a ye ko: «Na.» Piyɛri bɔra kurun kɔnɔ ka taama jii kan n'a be tagara Yezu fɛ.

³⁰ Nga Piyɛri y'a ye ko fɔɲɔ fanga ka bon minkɛ, siranya y'a minɛ. A daminɛna ka jigi jii jukɔrɔ, o la, a kulera ko: «Matigi, n dɛmɛ.»

³¹ O yɔrɔnin kelen, Yezu y'a minɛ k'a fɔ a ye ko: «I ma la ne la wa? Mun na i sigasigara?»

³² U donna kurun kɔnɔ tuma min na, fɔɲɔ lɔra.

³³ Kalanden tɔɔ minw tun be kurun kɔnɔ, olu y'u kunbiri gwan Yezu kɔrɔ k'a fɔ a ye ko: «Tiɲɛ na, i ye Ala Deen ye.»

Yezu be banabagatɔ caaman kɛnɛya

³⁴ U ye baa tigɛ ka se Zenezarɛti mara la.

³⁵ O yɔrɔ mɔgɔw ye Yezu lɔn minkɛ, u ye mɔgɔw ci ka taga yɔrɔ bɛɛ la, k'a fɔ ko Yezu nana. U y'u ka banabagatɔw bɛɛ ta ka na n'u ye a fɛ.

³⁶ U ye Yezu daali ko a ka sɔn u be maga a ka fani dakun dama na. Minw bɛɛ magara o la, olu kɛnɛyara.