Mas 2nan 5 - ALA KA KUMA

Sirika Naaman ka kɛnɛyako

¹ Naaman tun ye Siri masacɛ ka kɛlɛdenw kuntigi ye. A koo tun ka di a matigi ye kosɔbɛ, a tun b'a jati fana, bari Masaba tun ye see di Sirikaw ma ale lo barika la. Nga cɛɛ nin n'a ka kɛlɛden fariya bɛɛ, farisogobana tun b'a la.

² O y'a sɔrɔ Sirika dɔw tun bɔra ka taga ben Isirayɛlidenw kan, ka sungurunin dɔ minɛ. A tagara kɛ Naaman muso ka baaraden ye.

³ Loon dɔ, ale y'a fɔ a kuntigi, Naaman muso ye ko: «Ni ne matigi tun be kira gɛrɛfɛ Samari dugu kɔnɔ kɔni, kira nin tun be se k'a kɛ a ka bana be ban.»

⁴ Naaman tagara o fɔ masacɛ ye ko Isirayɛli sunguru nin ko ten.

⁵ Siri masacɛ y'a fɔ a ye ko a ka taga Samari, ko ale bena bataki ci Isirayɛli mara masacɛ ma. Naaman tagara ni warigwɛ kilo kɛmɛ saba, ni sanu kilo bi wɔɔrɔ ɲɔgɔn ye, ani fani ɲanaman deen tan.

⁶ A tagara ni bataki min ye Isirayɛli mara masacɛ fɛ, a tun fɔra o kɔnɔ ko: «Ne be n ka kɛlɛdenw kuntigi Naaman ci i fɛ ni bataki nin ye janko i k'a kɛ a ka bana be ban.»

⁷ Isirayɛli mara masacɛ ye bataki nin kalan ka ban tuma min na, a y'a ka faniw faran k'a fɔ ko: «Ne ye Ala ye wa? Min be to ka mɔgɔw faga, ani ka mɔgɔ kunun wa, n'a be mɔgɔ ci ko n k'o tigi ka farisogobana ban? Aw ka l'a la ko a be sababu le ɲinina ka ne kɛlɛ.»

⁸ Ala ka mɔgɔ Elize y'a mɛn tuma min na ko Isirayɛli mara masacɛ y'a ka faniw faran, a ye cii bila ko u ka ta'a fɔ masacɛ ye ko mun na a y'a ka faniw faran. Ko a k'a bila a ka na ale fɛ, ko a ben'a lɔn ko kira be Isirayɛli mara la.

⁹ O la, Naaman nana n'a ka soow n'a ka wotoro ye, ka na lɔ Elize ka soo daa la.

¹⁰ Elize ye mɔgɔ bila ka ta'a fɔ a ye ko: «Taga ko Zurudɛn baji la siɲɛ wolonwula, i farisogo bena kɛ a cogokɔrɔ la, i bena saniya.»

¹¹ Naaman diminin ye sira minɛ n'a be tagara ka to k'a fɔ ko: «Ne tun b'a miiri ko a tun bena bɔ ka na lɔ ka Masaba a ka Ala daali, ka maga bana nin yɔrɔ la ka ne kɛnɛya.

¹² O tuma na, Damasi baaw Abana ni Paripari man fisa ni Isirayɛli mara taw ye wa? Ne tun te se ka ko olu kɔnɔ ka kɛnɛya wa?» A kɔsegira n'a be tagara, a dimininba.

¹³ Nga a ka baaradenw gwɛrɛl'a la k'a fɔ a ye ko: «An faa, ni kira tun y'a fɔ i ye ko i ka kogwɛlɛn kɛ, e tun tena o kɛ wa? Sankofɛrɛ a ko i ka taga ko, ko i bena saniya.»

¹⁴ O la, a jigira ka don Zurudɛn baji kɔnɔ k'a yɛrɛ tunu jii la siɲɛ wolonwula ka kɛɲɛ ni Ala ka mɔgɔ ka fɔta ye. A farisogo kɛra i n'a fɔ denmisɛn ta, a saniyara.

¹⁵ Naaman n'a kɔmɔgɔw bɛɛ segira ka na Ala ka mɔgɔ fɛ. U sera tuma min na, a tagara lɔ a ɲakɔrɔ k'a fɔ a ye ko: «Sisan, ne y'a lɔn ko Ala wɛrɛ te yɔrɔ si dugukolo kan ni Isirayɛli ta tɛ. O la, i ka boɲafɛn nin minɛ i ka baaraden bolo.»

¹⁶ Elize y'a jaabi ko: «Ne be baara kɛra Masaba min ye, ale kosɔn, ne tena sɔn ka foyi minɛ.» Naaman y'a daali kosɔbɛ, nga a banna.

¹⁷ Naaman y'a fɔ a ye ko: «I do banna ko i t'o minɛ. O tuma na, i ka sira di u be bɔgɔ cɛ k'a di ne ma, sofali fila bena se min kɔrɔ. Bari ne, i ka baaraden tena saraka jɛnita, walima saraka wɛrɛ bɔ batofɛn wɛrɛ ye tugu fɔɔ Masaba.

¹⁸ Masaba ka yafa i ka baaraden ma koo kelen na: Tuma min na ni ne kuntigi be don joo Irimɔn ka soo kɔnɔ janko k'a kunbiri gwan a ɲakɔrɔ, ne fana ka kan ka n kunbiri gwan, bari a b'a bolo tintin ne bolo le kan, ka sɔrɔ k'a kunbiri gwan, Masaba ka sabali ka yafa i ka baaraden ma o la.»

¹⁹ Elize y'a fɔ a ye ko: «Taga, Ala ka hɛrɛ kɛ i ye.» Naaman bɔnin kɔ Elize kɔrɔ ka janfa dɔɔni,

Farisogobana be Geyazi minɛ

²⁰ Ala ka mɔgɔ Elize ka baaraden Geyazi y'a fɔ a yɛrɛ kɔnɔ ko: «Ne kuntigi y'a nɔgɔya Sirika Naaman nin ye, a tun nana ni boɲafɛn minw ye, a ma sɔn ka foyi minɛ. Masaba kosɔn, ne bena tugu a kɔ, ka dɔ minɛ a fɛ.»

²¹ Geyazi ye sira minɛ ka tugu a kɔ. Naaman y'a bolitɔ ye a kɔ dɔrɔn, a jigira joona joona ka bɔ a ka wotoro kɔnɔ k'a kunbɛn, k'a fɔ a ye ko: «Kɔni a ka di?»

²² Geyazi y'a jaabi ko: «A ka di. Ne kuntigi le ye n ci ka n'a fɔ i ye ko kanbelen mɔgɔ fila nana ka bɔ kiraw jɛnkulu la Efarayimu mara kuluyɔrɔ la ka na jigi a fɛ. K'o la, ale b'i daali, i ka warigwɛ kilo bi saba, ani fani ɲanaman fila d'ale ma.»

²³ Naaman y'a fɔ ko a ka kilo bi wɔɔrɔ minɛ. A y'a wajibiya, ka warigwɛ kilo bi wɔɔrɔ ni fani fila siri bɔɔrɔ fila kɔnɔ, k'o di a ka baaraden fila ma. Olu bilara Geyazi ɲafɛ ka taga n'o ye.

²⁴ U tagara se Ofɛli tintin kan tuma min na, Geyazi y'u minɛ u fɛ ka don n'u ye soo kɔnɔ k'u bila. O kɔ, a ye sira di mɔgɔ nunu ma, u tagara.

²⁵ A fana tagar'a kuntigi fɛ. Elize y'a ɲininga ko: «I bɔra min, Geyazi?» A ye Elize jaabi ko: «I ka baaraden tun ma taga yɔrɔ si.»

²⁶ Elize y'a fɔ a ye ko: «Cɛɛ nin tun be jigira joona joona ka bɔ a ka wotoro kɔnɔ ka na i kunbɛn tuma min na, ne ɲaa tun te aw la wa? Warigwɛ, ni faniw, ani olivuyiriw ni ɛrɛzɛnsunw, ani sagaw ni misiw, ani baaraden cɛmanw ni musomanw minɛwaati le ye nin ye wa?

²⁷ Naaman ka farisogobana bena i minɛ, an'i kɔmɔgɔw, tuma bɛɛ.» Sanni Geyazi ka bɔ Elize kɔrɔ, bana nin y'a minɛ, a fari gwɛra parapara.