Marika 6 - ALA KA KUMA

Nazarɛtikaw ma la Yezu la

¹ Yezu bɔra yen ka ta'a ka dugu la. A ka kalandenw tugura a kɔ.

² Lafiɲɛlon sera minkɛ, a donna kalanso kɔnɔ ka mɔgɔw kalan. A lamɛnbagaw bɛɛ kabakoyara kosɔbɛ. U tora k'a fɔ ko: «Haan! A bɔra ni nin ye min? Hakili min b'a fɛ, a y'o sɔrɔ min? A be kabako minw kɛ, a b'o kɛ cogo di?

³ Miniziye tɛ wa? Mariyamu dencɛ nin tɛ wa? A dɔgɔcɛw te Zaki ni Zoze ni Zude ani Simɔn ye wa? A dɔgɔmusow t'an fɛ yan wa?» O miiriya le y'a to u ma la a la.

⁴ Nga Yezu y'a fɔ u ye ko: «Kira be boɲa sɔrɔ yɔrɔ bɛɛ, fɔɔ a ka dugumɔgɔw n'a balimaw an'a ka somɔgɔw cɛma.»

⁵ Yezu y'a bolo la banabagatɔ dɔw kan k'u kɛnɛya. A ma se ka kabako si kɛ yen ka fara o kan.

⁶ U ma la Ala la minkɛ, o y'a kabakoya. O kɔ, a tagara u lamini duguw la ka mɔgɔw kalan.

Yezu b'a ka kalanden tan ni fila ci

⁷ Yezu y'a ka kalanden tan ni fila wele k'u ci fila fila. A ye see d'u ma ka jinaw gwɛn.

⁸ A y'a fɔ u ye ko: «Aw kana fɛɛn si ta bere dama kɔ. K'a ta dumuni ma, ni dugutagaminan, ani wari, aw kana taga n'o si ye.

⁹ Aw ka sanbara don nga aw kana deleke fila don.»

¹⁰ A y'a fɔ u ye fana ko: «N'aw sera dugu o dugu la, n'aw jigira mɔgɔ min fɛ, aw ka to o tigi fɛ fɔɔ aw ka bɔ o dugu nin la.

¹¹ Ni yɔrɔ dɔ mɔgɔw banna ka jigiyɔrɔ d'aw ma, n'u ma sɔn k'aw ka kuma lamɛn, aw ka bɔ o dugu la. Aw bɔtɔ, aw k'aw sennabuguri furanfuran. O bena kɛ lasɔmiko ye u fɛ.»

¹² Kalanden tan ni fila tagara mɔgɔw waaju k'u ka nimisa ka faran u ka kojuguw la.

¹³ U ye jina caaman gwɛn ka bɔ mɔgɔw la ka tulu bɔn banabagatɔ caaman kuun na k'u kɛnɛya.

Zan batizelikɛla ka sayako

¹⁴ O waati la, masacɛ *Erɔdi fana ye Yezu koo mɛn, bari Yezu tɔgɔ tun bɔra yɔrɔ bɛɛ la. Mɔgɔ dɔw tun b'a fɔ ko: «Zan batizelikɛla le kununna a sanin kɔ. O le y'a to a be se ka kabakow kɛ.»

¹⁵ Dɔw tun ko kira Eli lo. Dɔw fana tun ko fɔlɔfɔlɔ kiraw ɲɔgɔn lo.

¹⁶ Nga Erɔdi y'o mɛn tuma min na, a y'a fɔ ko: «Ne tun ye Zan min kuun tigɛ, ale lo kununna.»

¹⁷ Bari Erɔdi tun ye Zan minɛ k'a siri k'a don kaso la a dɔgɔcɛ Filipu ka muso Erodiyadi kama, Erɔdi tun ye min furu.

¹⁸ Zan tun be to k'a fɔ Erɔdi ye o tuma na ko: «I man kan k'i dɔgɔcɛ ka muso furu.»

¹⁹ O kuma kosɔn, Erodiyadi tun dimina Zan kɔrɔ kosɔbɛ. A tun b'a fɛ Erɔdi ka Zan faga nga a dɛsɛra Erɔdi kɔrɔ,

²⁰ bari Erɔdi tun be siran Zan ɲa. Erɔdi tun y'a lɔn ko Zan ye mɔgɔɲuman ni mɔgɔtilennin ye. A tun be Zan tanga kojugu ma. N'a ye Zan ka kuma lamɛn tuma o tuma, a hakili be ɲagami. O n'a ta bɛɛ, a tun ka d'a ye k'a lamɛn.

²¹ Erɔdi y'a wololon sanyɛlɛma ɲanagwɛ kɛ loon min na, o kɛra Erodiyadi ka lonɲuman ye. O loon nin na, Erɔdi y'a kɔfɛmɔgɔw ni sɔlidasi kuntigiw ani Galile mara mɔgɔbabaw wele ka dumuniba d'u ma.

²² K'u to dumuni na, Erodiyadi denmuso donna u fɛ ka dɔɔn kɛ. O diyara Erɔdi n'a ka mɔgɔ weleninw ye, Erɔdi y'a fɔ sunguru nin ye ko: «I be fɛɛn min fɛ, o fɔ ne ye, ne bena o d'i ma.»

²³ Erɔdi kalil'a ye ko: «I mana fɛɛn o fɛɛn daali ne fɛ, ne bena o d'i ma, hali ne ka jamana tilancɛ.»

²⁴ Sunguru bɔra ka taga bamuso ɲininga ko: «I b'a fɛ ne ka mun daali?» A y'a jaabi ko: «Zan batizelikɛla kuun.»

²⁵ O yɔrɔnin bɛɛ, sunguru teliyara ka kɔsegi ka taga masacɛ fɛ k'a fɔ a ye ko: «N b'a fɛ i ka Zan batizelikɛla kuun di n ma minan dɔ kɔnɔ sisan sisan.»

²⁶ Masacɛ ɲaa sisira. Nga a kalila minkɛ mɔgɔ weleninw ɲana, a tun te se ka ban.

²⁷ O yɔrɔnin kelen, a ye sɔlidasi dɔ ci ko a ka taga Zan kuun tigɛ ka na n'a ye. Sɔlidasi nin tagara Zan kuun tigɛ kasobon na,

²⁸ k'a bila minan dɔ kɔnɔ, ka n'a di sunguru nin ma. O fana tagar'a d'a bamuso ma.

²⁹ Zan ka kalandenw y'o mɛn tuma min na, u tagar'a suu ta k'a don.

Yezu be dumuni di cɛɛ waa duuru ma

³⁰ Yezu tun ye mɔgɔ minw ci, olu kɔsegira ka taga lajɛn a kɔrɔ. U ye mɔgɔw kalan fɛɛn minw na ka koo minw kɛ, u y'o bɛɛ lakali a ye.

³¹ A y'a fɔ u ye ko: «Aw ye na an ka taga danna yɔrɔ dɔ la janko aw ka lafiɲɛ dɔɔni.» A y'o fɔ bari mɔgɔ caaman tun be taga u fɛ, dɔw be taga ni dɔw be segi fɔɔ Yezu n'a ka kalandenw tun te waati yɛrɛ sɔrɔ ka dumuni kɛ.

³² U donna kurun kɔnɔ k'u be taga u danna yɔrɔlakolon dɔ la.

³³ Mɔgɔ caaman y'u taatɔ ye k'u lɔn. Mɔgɔw bɔra dafɛdugu bɛɛ la ka boli ka kɔn u ɲa u taayɔrɔ la.

³⁴ Yezu bɔra kurun kɔnɔ tuma min na, ka jamaba ye, u hinɛ donna a la, bari u tun be i ko sagaw, dɛndɛbaga te minw na. A y'a daminɛ k'u kalan fɛɛn caaman na.

³⁵ A ka kalandenw gwɛrɛla a la wuladafɛ k'a fɔ a ye ko: «Suu be ɲini ka ko, yan do ye yɔrɔlakolon ye.

³⁶ Sira di jama ma u ka taga dafɛduguw la ka dumuni san u yɛrɛ ye.»

³⁷ A y'u jaabi ko: «Aw yɛrɛ ka dumuni d'u ma.» U y'a ɲininga ko: «O tuma na, i b'a fɛ an ka taga buru san ni kalo seegi baara wari ye ka n'a d'u ma wa?»

³⁸ Yezu y'a fɔ u ye ko: «Burukun joli b'aw fɛ? Aw ka taga lajɛ.» U tagar'a filɛ minkɛ, u segira ka taga fɔ a ye ko: «Burukun duuru ni jigɛ deen fila.»

³⁹ A y'a fɔ u ye ko: «Aw ka mɔgɔw tilantilan k'u sigi binkɛnɛ kan.»

⁴⁰ U dɔw sigira mɔgɔ kɛmɛ kɛmɛ, u dɔw bi duuru duuru.

⁴¹ Yezu ye burukun duuru ni jigɛ deen fila nunu ta, k'a ɲaa kɔrɔta sanfɛ ka barika la Ala ye, ka burukun nunu karikari k'u di a ka kalandenw ma, k'u k'u tilan mɔgɔw cɛ. A ye jigɛ deen fila fana tilan u bɛɛ cɛ.

⁴² U bɛɛ ye dumuni kɛ fɔɔ ka fa.

⁴³ Buru ni jigɛ tɔɔ min tora, kalandenw y'o cɛ ka segi tan ni fila fa n'o ye.

⁴⁴ Mɔgɔ minw tun y'o dumuni kɛ, cɛɛw tun ye mɔgɔ waa duuru ye.

Yezu be taama baji kan

⁴⁵ O yɔrɔnin bɛɛ, Yezu y'a fɔ a ka kalandenw ye k'u ka don kurun kɔnɔ ka taga ale ɲa baa kɔ Bɛtisayida faan fɛ, yanni ale be sira di jama ma u ka taga.

⁴⁶ Yezu y'a fɔ jama ye k'u ka taga soo. O kɔ, a tagara yɛlɛ kulu dɔ kan ka Ala daali.

⁴⁷ Suu kora ka kalandenw to kurun kɔnɔ baji cɛmancɛ la. O waati la, Yezu kelenpe tun be duguma.

⁴⁸ A y'a ye ko a ka kalandenw tɔɔrɔnin be kurun boli fɛ, bari fɔɲɔ tun b'u kunbɛnna. Dugu tun be ɲini ka gwɛ waati min na, a taamana baji kan ka taga u faan fɛ. A tun be ɲini ka tɛmɛ u kan.

⁴⁹ U y'a taamatɔ ye baji kan minkɛ, u y'a miiri ko suja lo. U kulera,

⁵⁰ bari u bɛɛ tun y'a ye, ani u jaa tun tigɛra. O yɔrɔnin bɛɛ, Yezu kumana u fɛ k'a fɔ ko: «Aw k'aw jaa gwɛlɛya, ne lo, aw kana siran.»

⁵¹ A sɔrɔla ka don u fɛ kurun kɔnɔ. Fɔɲɔ lɔra. U kabakoyara ka dama tɛmɛ,

⁵² bari Yezu tun ye kabako min kɛ ni burukunw ye, u tun m'o faamu, u hakili tun ka dɔgɔ o faamuli ma.

Yezu be banabagatɔ dɔw kɛnɛya

⁵³ U ye baa tigɛ ka se Zenezarɛti mara la. U y'u ka kurun lɔ bada la.

⁵⁴ U bɔra kurun kɔnɔ dɔrɔn, mɔgɔw ye Yezu lɔn.

⁵⁵ U bolila ka taga fɔ yɔrɔ bɛɛ. Ni mɔgɔw y'a mɛn ko Yezu be yɔrɔ o yɔrɔ, u be banabagatɔw ta lafɛn dɔw kan ka ta'a fɛ.

⁵⁶ Yezu mana taga yɔrɔ o yɔrɔ, dugubabaw, wala dugudenninw na, walima togodaw la, mɔgɔw tun be taga ni banabagatɔw ye kɛnɛgwɛ yɔrɔw la k'a daali ko a ka sɔn u be maga a ka fani dakun dama na. Minw bɛɛ magara o la, olu kɛnɛyara.