Marika 5 - ALA KA KUMA

Yezu be jinatɔ dɔ kɛnɛya

¹ Yezu n'a ka kalandenw sera baa kɔ Gadare mara la.

² Kabini a jigira ka bɔ kurun kɔnɔ, jinatɔcɛ dɔ bɔra kaburutu la ka n'a kunbɛn.

³ Kaburutu tun kɛra o cɛɛ nin sigiyɔrɔ ye. Mɔgɔ si tun te se k'a minɛ k'a siri tugu, hali n'u y'a siri ni jɔrɔkɔ ye, a b'o tigɛ.

⁴ Siɲɛ caaman u y'a seenw n'a bolow siri ni jɔrɔkɔ ye, nga a y'o tigɛtigɛ. Mɔgɔ si ma se k'a kolo.

⁵ A tun be yaalayaala kaburutu la ani kuluw kan suu ni tile ka to ka kule ani k'a yɛrɛ mandimi ni kabakuruw ye.

⁶ A ye Yezu ye k'a to yɔrɔjan minkɛ, a bolila ka taga kunbiri gwan a kɔrɔ.

⁷ A pɛrɛnna ko: «Mun b'an cɛ, Fɛɛn bɛɛ kuntigi Ala Dencɛ Yezu? N b'i daali Ala kama, i kana n tɔɔrɔ.»

⁸ A y'o kuma fɔ, bari Yezu tun b'a fɔra jina ye ko a ka bɔ cɛɛ la.

⁹ O tuma na, Yezu y'a ɲininga ko: «I tɔgɔ be di?» A y'a jaabi ko: «Jamaba, bari an ka ca.»

¹⁰ A ye Yezu daali kosɔbɛ ko a kana u gwɛn ka bɔ o mara kɔnɔ.

¹¹ O y'a sɔrɔ lɛkuluba dɔ tun be dumuni kɛra kulu gɛrɛfɛ.

¹² Jinaw ye Yezu daali ko: «Sabali k'an bila ka taga don lɛɛ nunu na.»

¹³ Yezu sɔnna. Jinaw bɔra cɛɛ la ka taga don lɛɛw la. Lɛkulu girinna ka jigi kulu jigijigijugu fɛ ka taga don baji la. O lɛɛw tun be waa fila ɲɔgɔn bɔ, u sara jii la.

¹⁴ U dɛndɛbagaw bolila ka taga o kibaru fɔ dugu kɔnɔ ni dafɛduguw la. Koo min kɛra, mɔgɔw bɔra ka taga o filɛ.

¹⁵ Jina caaman tun be cɛɛ min na, mɔgɔw sera Yezu fɛ k'o jinatɔkɔrɔ siginin ye. Sisan fani b'a kaan na, a ɲamalɔnin lo. U siranna.

¹⁶ Koo min kɛra jinatɔkɔrɔ ye, ani min kɛra lɛɛw la, mɔgɔ minw y'o ye, u y'o lakali tɔw ye.

¹⁷ O koow mɛnnin kɔ, mɔgɔw y'a ɲini Yezu fɛ ko a ka taga ka bɔ u ka mara la.

¹⁸ Yezu dontɔ kurun kɔnɔ, jinatɔkɔrɔ nin y'a daali ko a ka sɔn ale ka taga n'a ye.

¹⁹ Yezu ma sɔn, nga a y'a fɔ a ye ko: «Taga soo. Matigi Ala hinɛna i la ka koba min kɛ i ye, i ka taga o lakali i ka somɔgɔw ye.»

²⁰ Yezu ye koba min kɛ a ye, a tagara o kibaru jɛnsɛn Dugu Tan mara la. O koo mɛnbagaw bɛɛ kabakoyara.

Zayirisi ka denmuso kununko ani muso min magara Yezu ka fani na

²¹ Yezu kɔsegira kurun kɔnɔ ka taga baa kɔ. Mɔgɔ caaman tagara lajɛn a kɔrɔ bada la.

²² Kalanso dɔ kuntigi tagara yen. A tɔgɔ tun ko Zayirisi. A ye Yezu ye tuma min na, a y'a kunbiri gwan a kɔrɔ,

²³ k'a daali kosɔbɛ ko: «N denmuso be ɲini ka sa. Sabali ka na i bolo la a kan janko a ka kɛnɛya ka to nii na.»

²⁴ U ye Zayirisi ka soo sira ta. Jamaba tugura Yezu kɔ k'a degun.

²⁵ O y'a sɔrɔ muso dɔ tun be jama cɛma min ka koli tun b'a sigɛnna kabini saan tan ni fila, joli te lɔ ka ye.

²⁶ A tun tɔɔrɔla kosɔbɛ furakɛla caaman bolo. A bololafɛn bɛɛ banna. O n'a ta bɛɛ, a ka bana ma nɔgɔya, nga a tun be juguya ka taga.

²⁷ A ye Yezu kibaru mɛn minkɛ, a donna jama cɛma Yezu kɔfɛ ka maga a ka fani na.

²⁸ A tun y'a fɔ a yɛrɛ kɔnɔ ko: «Ni n sera ka maga a ka fani dɔrɔn na, n bena kɛnɛya.»

²⁹ A magara Yezu ka fani na tuma min na, o yɔrɔnin bɛɛ, joli lɔra, a y'a lɔn ko a ka bana banna.

³⁰ O yɔrɔnin kelen, Yezu y'a lɔn a yɛrɛ ma ko sebagaya dɔ bɔra ale la. A y'a ɲaa yɛlɛma jama cɛma k'a fɔ ko: «Jɔn le magara n ka fani na?»

³¹ A ka kalandenw y'a jaabi ko: «I ɲaa b'a la jama y'i degun, i be tila k'a fɔ tugu ko jɔn magara i la.»

³² Yezu y'a daminɛ k'a gɛrɛfɛmɔgɔw filɛ janko a k'o kɛbaga ye.

³³ Muso nin tun be yɛrɛyɛrɛla siranya bolo, bari koo min kɛr'a yɛrɛ la, a y'o lɔn. A tagar'a kunbiri gwan Yezu kɔrɔ ka tiɲɛ bɛɛ fɔ a ye.

³⁴ Nga Yezu y'a fɔ a ye ko: «N balimamuso, i kisira i ka lanaya barika la. Taga hɛrɛ la, i kɛnɛyanin ka to.»

³⁵ Ka Yezu to o kuma na, mɔgɔ dɔw bɔra kuntigi Zayirisi ka soo ka n'a fɔ a ye ko: «I denmuso banna. Mun na i be karamɔgɔ sigɛn tugu?»

³⁶ Nga Yezu ma u ka kuma jati, a y'a fɔ Zayirisi ye ko: «I kana siran, la Ala la dɔrɔn.»

³⁷ O kɔ, a ma sɔn mɔgɔ si ka taga n'a ye Zayirisi ka soo, fɔɔ Piyɛri ni Zaki ani Zaki dɔgɔcɛ Zan.

³⁸ U sera kalanso kuntigi nin ka soo tuma min na, Yezu y'a ye ko mankanba be yen. Mɔgɔw tun be kasira ka kule.

³⁹ Yezu donna soo kɔnɔ k'a fɔ u ye ko: «Nin ye mun mankan ye? Mun na aw be kasi? Deen ma sa, a be sinɔgɔra le.»

⁴⁰ U yɛlɛla Yezu ma. O tuma na, a ye mɔgɔ bɛɛ bɔ kɛnɛma. Deen suu lanin tun be boon min kɔnɔ, a donna yen ni deen faa n'a baa an'a yɛrɛ ka kalanden saba ye.

⁴¹ A y'a bolo minɛ k'a fɔ a ye u ka kaan na ko: «Talita kumi,» o kɔrɔ ko: «Sungurunin, n b'a fɔ i ye, wili!»

⁴² O yɔrɔnin bɛɛ, sungurunin wilila ka taama. A sii tun ye saan tan ni fila ye. U kabakoyara ka dama tɛmɛ.

⁴³ Yezu y'a fɔ u ye k'a gwɛlɛya k'u kan'a fɔ mɔgɔ si ye. O kɔ, a y'a fɔ u ye k'u ka dumuni d'a ma.