Marika 4 - ALA KA KUMA

Sumankisɛ talen

¹ Siɲɛ wɛrɛ, Yezu y'a daminɛ ka mɔgɔw kalan tugu bada la. Mɔgɔw tagara lajɛn a kɔrɔ. Jama nana boɲa fɔɔ a donna kurun dɔ kɔnɔ ka sigi. Jama bɛɛ lɔra bada la.

² A y'u kalan koo caaman na ni talenw ye. A y'a fɔ u ye a ka kalan na ko:

³ «Aw ka lamɛnni kɛ. Sɛnɛkɛla dɔ bɔra ka taga sumansi seri.

⁴ K'a to serili la, kisɛ dɔw tagara ben sira daa la. Kɔnɔw nana olu kunu.

⁵ Kisɛ dɔw fana tagara ben farayɔrɔ la, bɔgɔ bɛrɛ tun te yen. U falenna joona bari u ma don dugumakola la ka se yɔrɔjan.

⁶ Nga tile fariyara tuma min na, u jɛnina ka ja bari lili ɲanaman tun t'u la.

⁷ Kisɛ dɔw fana tagara ben ŋɔni yɔrɔ la. Ŋɔni wilila k'u degun fɔɔ u ma ɲa hali dɔɔni.

⁸ Nga kisɛ dɔw tagara ben dugukoloɲuman na. U falenna ka boɲa ka ɲa kosɔbɛ. U dɔw ye deen bi saba kɛ, dɔw bi wɔɔrɔ, dɔw fana kɛmɛ.»

⁹ O kɔ, Yezu y'a fɔ ko: «Tulo be min fɛ ka mɛnni kɛ, o ka mɛnni kɛ.»

Yezu ka talen lakun

¹⁰ Yezu bɔra jama kɔrɔ tuma min na, a kɔfɛmɔgɔw n'a ka kalanden tan ni fila y'a ɲininga o talen nin kɔrɔ la.

¹¹ A y'u jaabi ko: «See dira aw ma ka Ala ka masaya gundo lɔn, nga tiɲɛ bɛɛ be fɔ mɔgɔ tɔw ye talen na.

¹² O cogo la, ‹u bena filɛli kɛ ka ɲa, u tena foyi ye, u bena u tulo malɔ, u tena foyi faamu. N'u tun b'a faamu, u tun bena nimisa ka faran u ka kojuguw la, Ala tun bena yafa u ma. Nga u te miiri o la.› »

Serilikɛla talen kɔrɔ

¹³ Yezu tagara ɲa ni kuma ye k'a fɔ u ye ko: «Aw ma talen nin faamu wa? Aw do bena talen tɔw bɛɛ faamu cogo di?

¹⁴ Serilikɛla be Ala ka kuma le seri.

¹⁵ Kuma serituma na, mɔgɔ dɔw be i n'a fɔ sirada. N'u y'o kuma mɛn dɔrɔn, Sutana be na k'o kuma bɔ u kɔnɔ.

¹⁶ O cogo la, fana mɔgɔ dɔw bɔnin be farayɔrɔ fɛ. N'u y'o kuma mɛn, o yɔrɔnin bɛɛ, u be sɔn a ma ni nisɔndiya ye.

¹⁷ Nga o kuma te sigiyɔrɔ sɔrɔ u kɔnɔ. U te muɲu, ni gwɛlɛya nana, walima ni mɔgɔw b'u tɔɔrɔ o kuma kosɔn dɔrɔn, u be sin ka ban Ala ma.

¹⁸ Mɔgɔ dɔw fana be i n'a fɔ ŋɔni yɔrɔ. Ni olu y'o kuma mɛn,

¹⁹ diɲɛ hamikow, ni nafoloko, ani fɛɛn wɛrɛw nigɛ b'o kuma nagasi fɔɔ nafa dɔɔni yɛrɛ te sɔrɔ a la.

²⁰ Mɔgɔ dɔw fana bɔnin be dugukoloɲuman fɛ. Ni olu y'o kuma mɛn, u be sɔn a ma. U be deen kɛ Ala ye. Dɔw b'u ɲɔgɔn bi saba kɛ, dɔw bi wɔɔrɔ, dɔw kɛmɛ.»

Fitinɛ talen

²¹ O kɔ, Yezu y'a fɔ u ye ko: «Mɔgɔ si te fitinɛ mana k'a bila gongo jukɔrɔ, walima kalaka jukɔrɔ. A t'a bila fɛɛn dɔ le kan wa?

²² Koo o koo dogonin be, Ala bena o yira. Gundo si te yen ni Ala ten'a bɔ kɛnɛ kan.

²³ Ni tulo be min fɛ ka mɛnni kɛ, o ka mɛnni kɛ.»

²⁴ Yezu y'a fɔ u ye tuguni ko: «Aw be kuma min mɛn, aw k'aw janto o la kosɔbɛ. Ala bena aw sɔn ka kɛɲɛ n'aw ka lamɛnni kɛcogo ye. A bena dɔ fara aw ta kan yɛrɛ,

²⁵ bari fɛɛn be min fɛ, dɔ bena fara o kan, nga fɛɛn te min fɛ, hali dɔɔni min b'a fɛ, o bena bɔsi a la.»

Kisɛ be falen ka boɲa cogo min na

²⁶ Yezu y'a fɔ tuguni ko: «Ala ka masaya be cogo min na, o filɛ nin ye. A be i n'a fɔ cɛɛ dɔ min ye sumansi seri a ka foro la.

²⁷ O kɔ, cɛɛ be to ka sinɔgɔ sufɛ ka kunun sɔgɔma. O waati la, kisɛ be falencogo min na ka boɲa k'a sɔrɔ cɛɛ m'a falen n'a boɲacogo lɔn.

²⁸ Kisɛ be falen a yɛrɛ ma ka bɔ dugukolo la. A be wili dɔɔni dɔɔni fɔɔ ka na kuun bɔ, o kɔ, a be fa ni kisɛ ye.

²⁹ Ni suman mɔna dɔrɔn, cɛɛ b'a tigɛ ni wɔrɔsɔ ye, bari suman tigɛtuma sera.»

Mutaridikisɛ talen

³⁰ Yezu y'a fɔ tugu ko: «An be se ka Ala ka masaya suma ni mun ye tugu?

³¹ A bɔnin be mutaridikisɛ fɛ. O kisɛ nin ka dɔgɔ ni diɲɛ kɔnɔ dannifɛnw bɛɛ ye.

³² Nga n'a serila ka ban, a be falen ka boɲa ka tɛmɛ nankɔ fɛɛn sɛnɛta tɔw bɛɛ kan. A bolow be boɲa fɔɔ kɔnɔw be se k'u ka ɲagaw la a suma na.»

³³ Yezu tun be mɔgɔw kalan n'o bɔɲɔgɔnko talen caaman ye ka kɛɲɛ n'a lamɛnbagaw ka faamuli danyɔrɔ ye.

³⁴ A tun te kuma mɔgɔw fɛ n'a ma talen la u ye. Nga ni Yezu n'a ka kalandenw b'u danna, a b'o talenw bɛɛ kɔrɔ fɔ olu ye.

Yezu be fɔɲɔ lalɔ

³⁵ O loon yɛrɛ wulafɛ, Yezu y'a fɔ a ka kalandenw ye ko: «An ka taga baa kɔ.»

³⁶ U tagara ka jama to yen. Yezu tun be kurun min kɔnɔ, a ka kalandenw tagara n'a ye o kɔnɔ. Kurun dɔ wɛrɛw tun b'u kɔ.

³⁷ U taatɔ, fɔɲɔba wilila. Jikuruw tun be ben kurun kɔnɔ fɔɔ kurun tun be ɲini ka fa jii la.

³⁸ Yezu tun be sinɔgɔra kurun kɔfɛla la, a kuun lanin tun be piti kan. A ka kalandenw y'a kunun k'a fɔ a ye ko: «Karamɔgɔ, an bena halaki jii la, i te hami o la wa?»

³⁹ Yezu kununna ka kuma fɔɲɔ kunna, k'a fɔ baji ye ko a ka mankan dabila. Fɔɲɔ lɔra, yɔrɔ malara tɔntɔntɔn.

⁴⁰ O kɔ, a y'a fɔ a ka kalandenw ye ko: «Mun na aw be siran ten? Aw ma la ne la halibi wa?»

⁴¹ U siranna kosɔbɛ fɔɔ u ye ɲɔgɔn ɲininga ko: «Cɛɛ nin ye jɔn ye? Hali fɔɲɔ ni baji be sɔn a ta ma.»