Marika 11 - ALA KA KUMA

Yezu be taga Zeruzalɛmu faliden kan

¹ Yezu n'a kɔfɛmɔgɔw surunyana Bɛtifaze ni Betani na Olivuyirikulu gɛrɛfɛ. U yɔrɔ tun man jan Zeruzalɛmu na tugu. A y'a ka kalandenw fila ci

² k'a fɔ u ye ko: «Aw ye taga aw ɲafɛ dugu nin na. Aw dontɔ, aw bena faliden dɔ sirinin ye, mɔgɔ si ma deli ka yɛlɛ min kan fɔlɔ. Aw k'a foni ka na n'a ye.

³ Ni mɔgɔ dɔ y'aw ɲininga ko mun na aw b'a foni, aw k'o tigi jaabi ko aw ka Matigi mako le b'a la, ko yanni dɔɔni, ko a bena mɔgɔ bila ka segi n'a ye.»

⁴ O la, u tagara faliden nin sirinin sɔrɔ boon dɔ daa la sira gɛrɛfɛ. U y'a daminɛ k'a foni.

⁵ Mɔgɔ minw tun b'o yɔrɔ la, u dɔw y'u ɲininga ko: «Mun na aw be faliden nin fonina?»

⁶ Kalandenw y'u jaabi i ko Yezu tun y'a fɔ u ye cogo min na. O mɔgɔ nunu sɔnna k'u ka taga ni faliden nin ye.

⁷ U tagara ni faliden ye Yezu fɛ. U y'u ka faniw la a kɔɔ kan. Yezu yɛlɛla a kan.

⁸ Mɔgɔ caaman y'u ka faniw la sira kan, dɔw ye furaburuw tigɛ waga kɔnɔ k'u lala sira kan fana.

⁹ Mɔgɔ minw tun be Yezu ɲafɛ ani minw tun b'a kɔfɛ, olu tun be pɛrɛn ko: «An be Ala tanu! Mɔgɔ min be nana Matigi tɔgɔ la, Ala ka barika don o la!

¹⁰ An faa Dawuda ka masaya ɲɔgɔn min bena sigi, Ala ka barika don o la. An be Ala tanu!»

¹¹ Yezu donna Zeruzalɛmu kɔnɔ tuma min na, a tagara don Alabatosoba kɔnɔ ka fɛɛn bɛɛ filɛ. O kɔ, tilekun tun be ɲini ka don minkɛ, a n'a ka kalanden tan ni fila bɔra ka taga Betani.

Yezu ye torosun min danga

¹² O dugusagwɛ, Yezu n'a ka kalandenw bɔtɔ Betani, kɔngɔ y'a minɛ.

¹³ K'a to yɔrɔjan, a ye torosun dɔ ye, furaburu tun b'a la. A tagar'a filɛ yala n'a bena deen sɔrɔ a la. Nga a gwɛrɛla a la tuma min na, a ma foyi sɔrɔ a la furaburu kɔ, bari toro denwaati tun tɛ.

¹⁴ Yezu y'a fɔ yiri nin ye ko: «Mɔgɔ si tena i deen dumu tugu abada.» A ka kalandenw y'o kuma mɛn.

Yezu be jagokɛlaw gwɛn Alabatosoba kɔnɔ

¹⁵ Yezu n'a ka kalandenw sera Zeruzalɛmu tuma min na, a donna Alabatosoba kɔnɔ. Jagokɛla ni sannikɛla minw tun be yen, a y'a daminɛ k'olu gwɛn, ka warifalenbagaw ka tabaliw ni tubani feerebagaw ka sigilanw ɲɔti k'u benben.

¹⁶ A ma sɔn tugu mɔgɔ si ka tɛmɛ Alabatosoba luu kɔnɔ ni feerefɛn ye.

¹⁷ O kɔ, a ye mɔgɔw kalan ko: «A fɔra Ala ka kuma na ko: ‹Ne ka soo bena kɛ siyaw bɛɛ ka daalilikɛyɔrɔ ye.› Nga aw kɔni y'a kɛ soonw ka yɔrɔ ye.»

¹⁸ Sarakalasebagaw kuntigiw ni sariya karamɔgɔw y'o mɛn tuma min na, u y'a daminɛ ka fɛɛrɛ ɲini Yezu fagako la. U siranna Yezu ɲa, bari a ka kalan tun diyara mɔgɔ caaman ye.

¹⁹ Tilekun donnin kɔ, Yezu n'a ka kalandenw bɔra dugu kɔnɔ.

Ala be sɔn daalili min na

²⁰ O dugusagwɛ sɔgɔma, Yezu n'a ka kalandenw tɛmɛtɔ torosun danganin nin yɔrɔ la, u ye torosun nin ye. A jara fɔɔ ka se a liliw ma.

²¹ Yezu tun ye kuma min fɔ, Piyɛri hakili jigira o la minkɛ, a y'a fɔ Yezu ye ko: «Karamɔgɔ, a filɛ, i tun ye torosun min danga, a jara.»

²² Yezu y'a fɔ u ye ko: «Aw ye la Ala la.

²³ Tiɲɛ na, ne b'a fɔ aw ye ko ni mɔgɔ dɔ y'a fɔ kulu nin ye ko: ‹Wili ka bɔ yan ka taga ben kɔgɔji kɔnɔ,› n'o tigi ma sigasiga a dusu la, n'a lara a la ko a ye min fɔ, k'o bena kɛ, o bena kɛ a ye.

²⁴ O le y'a to, ne b'a fɔ aw ye ko n'aw ye fɛɛn o fɛɛn daali Ala fɛ, aw ka la a la ko aw bena o sɔrɔ, aw ben'a sɔrɔ.

²⁵ K'aw lɔnin to Ala daalili la, n'o y'a sɔrɔ dɔ ye aw hakɛ ta, aw ka yafa o ma janko aw Faa min be sankolo la, o k'aw ka hakɛw yafa fana. [

²⁶ Nga n'aw ma yafa tɔw ma, aw Faa min be sankolo la, o tena aw ka hakɛw yafa fana.]»

Jɔn ye fanga di Yezu ma?

²⁷ Yezu n'a ka kalandenw segira Zeruzalɛmu tuguni. Ka Yezu to yaalayaala la Alabatosoba kɔnɔ, sarakalasebagaw kuntigiw ni sariya karamɔgɔw ani cɛkɔrɔbaw tagar'a sɛgɛrɛ.

²⁸ U y'a ɲininga ko: «I be koo minw kɛ, jɔn le y'o sira d'i ma? Jɔn y'o kɛ see d'i ma?»

²⁹ Yezu y'u jaabi ko: «Ne bena aw ɲininga koo kelen dɔrɔn na. N'aw ye ne jaabi, o tuma na, min ye sira di ne ma ka koo nunu kɛ, ne bena o fɔ aw ye.

³⁰ Jɔn le ye Zan ci ko a ka mɔgɔw batize, Ala lo wa, walima mɔgɔw lo? Aw ka ne jaabi.»

³¹ O tuma na, u y'u ka miiriya fɔ ɲɔgɔn ye ko: «N'an y'a jaabi ko Ala lo, a bena an ɲininga ko mun na an ma la a la.

³² N'an y'a fɔ ko mɔgɔw lo fana, haya!» U tun be siran jama ɲa, bari mɔgɔ bɛɛ tun be Zan jati kira tigitigi ye.

³³ O la, u ye Yezu jaabi ko: «An t'a lɔn.» Yezu y'a fɔ u ye ko: «N'o lo, mɔgɔ min ye sira di ne ma ka koo nunu kɛ, ne fana tena o fɔ aw ye.»