Luka 5 - ALA KA KUMA

Yezu b'a ka kalanden fɔlɔw wele

¹ Loon dɔ la, ka Yezu to Zenezarɛti baa daa la, jama tun y'a lamini n'u be ɲɔgɔn ɲɔtiɲɔtira waasa ka Ala ka kuma lamɛn.

² A ye kurun fila ye bada la. Mɔnikɛlaw tun bɔra u kɔnɔ, u tun be u ka jɔɔw kora.

³ Yezu donna o kurun nunu kelen kɔnɔ min tun ye Simɔn ta ye. A y'a ɲini Simɔn fɛ ko a ka taga ni kurun ye jii cɛmancɛ la dɔɔni. O kɔ, k'a siginin to kurun kɔnɔ, a y'a daminɛ tugu ka mɔgɔw kalan.

⁴ A tilara kuma na tuma min na, a y'a fɔ Simɔn ye ko: «Jii ka dun yɔrɔ min na, taga ni kurun ye o yɔrɔ la k'aw ka jɔɔ fili.»

⁵ Simɔn y'a jaabi ko: «Karamɔgɔ, an ye baara kɛ ka dugu gwɛ, an ma foyi sɔrɔ. Nga i ka kuma kosɔn, ne bena jɔɔ fili jii la.»

⁶ O la, u ye jɔɔ fili. U ka jɔɔ ye jigɛ caaman minɛ fɔɔ jɔɔ daminɛna ka faranfaran.

⁷ U y'u bolo kɛ ka u tɔɲɔgɔnw wele kurun dɔ nin kɔnɔ ko u ka na u dɛmɛ. Olu tagara, u ye kurun fila nunu bɛɛ fa jigɛ la fɔɔ kurunw tun be ɲini ka jigi jii jukɔrɔ.

⁸ Simɔn Piyɛri y'o ye minkɛ, a y'a kunbiri gwan Yezu kɔrɔ k'a fɔ ko: «Matigi, kana gwɛrɛ n na, bari ne ye hakɛkɛla ye.»

⁹ A y'o fɔ bari a tun siranna. Ale ni minw tun be ɲɔgɔn fɛ kurun kɔnɔ, u bɛɛ tun siranna bari u ye jigɛ caaman sɔrɔ.

¹⁰ Zebede dencɛw, Zaki ni Zan tun ye Simɔn baarakɛɲɔgɔnw ye, olu fana tun siranna. Nga Yezu y'a fɔ Simɔn ye ko: «Kana siran. Kabini sisan, i bena mɔgɔw le ɲini Ala ye.»

¹¹ O tuma na, u segira ka na u ka kurunw bila bada la, k'u ka fɛɛnw bɛɛ to yen ka tugu Yezu kɔ.

Yezu be farisogobanatigi dɔ kɛnɛya

¹² Ka Yezu to dugu dɔ la, cɛɛ dɔ fana tun be yen, farisogobana diginin tun b'a la. A ye Yezu ye tuma min na, a tagara biri a kɔrɔ k'a daali ko: «Matigi, n'i sɔnna, i be se ka ne kɛnɛya.»

¹³ Yezu magara a la, k'a fɔ ko: «N sɔnna, kɛnɛya.» O yɔrɔnin bɛɛ, cɛɛ kɛnɛyara.

¹⁴ O kɔ, Yezu y'a gwɛlɛya a ma kosɔbɛ ko: «Kan'a fɔ mɔgɔ si ye ko ne le y'i kɛnɛya dɛ. Nga taga i yɛrɛ yira sarakalasebaga la. Musa ye saraka min koo fɔ saniyali faan fɛ, i k'o bɔ k'a yira mɔgɔw la ko i kɛnɛyara.»

¹⁵ O bɛɛ n'a ta, Yezu tɔgɔ bɔra ka taga ɲa fɔɔ mɔgɔ caaman tun be to ka taga u lajɛn a kɔrɔ waasa k'a ka kuma lamɛn, walima a k'u kɛnɛya.

¹⁶ Yezu tun be to ka taga kongo kɔnɔ a kelen ka Ala daali yen.

Yezu be muruku dɔ kɛnɛya

¹⁷ Loon dɔ, ka Yezu to mɔgɔw kalan na, *Fariziɲɛw ni sariya karamɔgɔ dɔw siginin tun be yen. U tun nana ka bɔ Galile ni Zude mara dugudenninw bɛɛ la, ani Zeruzalɛmu. Matigi Ala ka sebagaya tun be Yezu fɛ n'a be banabagatɔw kɛnɛya.

¹⁸ Cɛɛ dɔw tagara ni muruku dɔ ye o yɔrɔ la. A lanin tun be dilan kan. U tun be cogo ɲinina ka don n'o cɛɛ ye soo kɔnɔ k'a bila Yezu ɲakɔrɔ.

¹⁹ U ma cogo sɔrɔ ka don n'a ye jama kosɔn. O la, u yɛlɛla soo kunna k'o yɔrɔ dɔ walaka. Ka muruku nin to a ka dilan kan, u y'a jigi o woo fɛ jama cɛma ni juru ye Yezu ɲakɔrɔ.

²⁰ Yezu y'a ye k'o mɔgɔw lara ale la minkɛ, a y'a fɔ ko: «Cɛɛ, i ka hakɛw yafara.»

²¹ Sariya karamɔgɔw ni Fariziɲɛw y'a daminɛ ka miiri ko: «Nin ye jɔn ye n'a be Ala tɔgɔ cɛn ten? Jɔn le be se ka mɔgɔ ka hakɛw yafa a ma ni Ala kelen tɛ?»

²² Nga Yezu y'u ka miiriya lɔn k'a fɔ u ye ko: «Mun na aw be miiri ten?

²³ K'a fɔ muruku ye ko: ‹I ka hakɛw yafara,› walima k'a fɔ a ye ko: ‹Wili ka taama,› o kuma fila la, jumɛn fɔ ka nɔgɔ?

²⁴ Nga ne b'a fɛ aw k'a lɔn ko see be Mɔgɔ Dencɛ ye ka mɔgɔ ka hakɛw yafa k'a to diɲɛ na.» O la, a y'a fɔ muruku ye ko: «N b'a fɔ i ye, wili k'i ka dilan ta ka taga soo.»

²⁵ O yɔrɔnin bɛɛ, cɛɛ nin wilila mɔgɔw ɲana k'a ka dilan ta ka taga soo. A tun be Ala tanu n'a be taga.

²⁶ U bɛɛ kabakoyara. U ye Ala tanu. U siranninba y'a fɔ ko: «An ye kabako ye bii dɛ!»

Yezu be Levi wele

²⁷ O kɔ, Yezu bɔra yen, a ye lɛnpominɛla dɔ ye min tɔgɔ ko Levi, a siginin tun be lɛnpominɛlaw ka baarakɛyɔrɔ la. Yezu y'a fɔ a ye ko: «Tugu ne kɔ.»

²⁸ Levi y'a ka baara to yen ka wili ka tugu a kɔ.

²⁹ O kɔ, Levi ye dumuniba labɛn a ka soo Yezu ye. Lɛnpominɛlaw ni mɔgɔ wɛrɛw tun be yen caaman. U tun be dumuni kɛra ni Yezu n'a kɔmɔgɔw ye.

³⁰ *Fariziɲɛw n'u ka sariya karamɔgɔw tun be ŋunuŋununa. U ye Yezu ka kalandenw ɲininga ko: «Mun na aw be dumuni kɛ ka minni kɛ ni lɛnpominɛlaw ani hakɛkɛlaw ye?»

³¹ Yezu ye kuma ta k'u jaabi ko: «Mɔgɔ minw ka kɛnɛ, olu mako te furakɛla la, banabagatɔw le mako b'a la.

³² Ne ma na mɔgɔtilenninw wele, nga ne nana hakɛkɛlaw le wele waasa u ka nimisa ka faran u ka kojuguw la.»

Yezu be kuma suun koo la

³³ Mɔgɔ dɔw y'a fɔ Yezu ye ko: «Zan ka kalandenw ni *Fariziɲɛw ka kalandenw be suun don tuma caaman ka Ala daali, k'a sɔrɔ e taw be dumuni kɛ ka minni kɛ.»

³⁴ Yezu y'u jaabi ko: «Yala aw be se ka kɔɲɔcɛ teriw wajibiya ka suun don k'u ni kɔɲɔcɛ to ɲɔgɔn fɛ wa?

³⁵ Nga loon dɔ bena se, kɔɲɔcɛ bena bɔsi u la, u bena suun don o loon na.»

³⁶ Yezu ye talen nin la u ye fana ko: «Mɔgɔ si te fanikura faran ka fani kɔrɔman bari n'a ye. N'o kɛra, fanikura cɛnna, kunkurunnin nin fana tena bɛn ni fani kɔrɔman ye.

³⁷ Mɔgɔ si te duvɛnkɛnɛ don foroko kɔrɔman kɔnɔ. N'o kɛra, duvɛnkɛnɛ bena foroko faran, foroko bena cɛn, duvɛn bena bɔn.

³⁸ Duvɛnkɛnɛ ka kan ka don forokokuraw le kɔnɔ.

³⁹ Ni mɔgɔ min delila duvɛnkɔrɔ min na, o tigi te duvɛnkɛnɛ fɛ, bari a b'a fɔ ko duvɛnkɔrɔ le ka di.»