Luka 23 - ALA KA KUMA

U be taga ni Yezu ye Pilati fɛ

¹ O tuma na, kititigɛlaw bɛɛ sinna ka wili ka taga ni Yezu ye Pilati fɛ.

² U y'a daminɛ ka Yezu jalaki ko: «An y'a ye ko cɛɛ nin b'an ka siya kunnacɛnna. A b'u bali ka lɛnpo sara Ɔrɔmu masacɛ ma. A ko ale ye Ala ka Mɔgɔ wolomanin nin ye, ko ale ye masa ye.»

³ Pilati y'a ɲininga ko: «I ye zuwifuw ka masa ye wa?» Yezu y'a jaabi ko: «E ko ten.»

⁴ Pilati y'a fɔ sarakalasebagaw kuntigiw ni jama ye ko: «Ne ma kuun ye cɛɛ nin be se ka jalaki min na.»

⁵ Nga u segira k'a fɔ ko: «A be mɔgɔw kalan an ka jamana yɔrɔ bɛɛ la. O le b'a to mɔgɔw be muruti. A y'a daminɛ Galile mara la fɔɔ ka na se yan Zude mara la.»

Pilati be Yezu ci Erɔdi ma

⁶ Pilati ye Galile tɔgɔ mɛn mɔgɔw daa la minkɛ, a ye ɲiningali kɛ ko yala ni Yezu ye Galileka ye.

⁷ A y'a lɔn ko Yezu bɔra *Erɔdi ka mara la tuma min na, a y'a fɔ u ye k'u ka taga n'a ye Erɔdi fɛ, bari Erɔdi fana tun be Zeruzalɛmu o loon nin na.

⁸ Erɔdi ye Yezu ye minkɛ, o diyara a ye kosɔbɛ. A tun b'a fɛ ka Yezu ye kabini tumajan bari a tun y'a ka koo mɛn. A tun be miiri fana ko Yezu bena kabako dɔ kɛ ale ɲana.

⁹ A ye Yezu ɲininga koo caaman na, nga Yezu m'a jaabi.

¹⁰ Sarakalasebagaw kuntigiw ni sariya karamɔgɔw tun be yen. U tun b'a la ka kumajugu fɔ waasa k'a ka koo juguya.

¹¹ Erɔdi n'a ka sɔlidasiw ye Yezu lɔgɔbɔ kosɔbɛ ka delekeɲuman dɔ don a kaan na. O kɛnin kɔ, a y'u bila ka segi ni Yezu ye Pilati fɛ.

¹² O loon nin na, Pilati ni Erɔdi kɛra teriw ye k'a sɔrɔ u tun ye ɲɔgɔn juguw ye fɔlɔ la.

Yezu ka kiti laban

¹³ Pilati ye sarakalasebagaw kuntigiw, ni zuwifuw ka kuntigiw ani jama wele

¹⁴ k'a fɔ u ye ko: «Aw le nana ni cɛɛ nin ye k'a fɔ ne ye ko a be mɔgɔw kunnacɛn. Ayiwa, ne y'a ɲininga aw ɲana. Aw ye koo minw fɔ k'olu y'a jalakikun ye, ne y'a ye ko jalakita tɛ.

¹⁵ *Erɔdi fana m'a jalakikun ye, bari a segira k'a bila ka na anw fɛ. O la, ne ma koo si ye cɛɛ nin ka kan ka faga min kama.

¹⁶ O la, ne ben'a to u b'a bugɔ ni golokami ye. O kɔ, ne ben'a bila ka taga.» [

¹⁷ Saan o saan, *Hɔrɔnya ɲanagwɛ tuma, Pilati tun ka kan ka kasoden dɔ labila.]

¹⁸ U bɛɛ pɛrɛnna ko: «Cɛɛ nin faga, ka Barabasi labila.»

¹⁹ Barabasi tun donna kaso la murutili ni mɔgɔfaga kosɔn. O murutili tun kɛra dugu kɔnɔ.

²⁰ Pilati tun b'a fɛ ka Yezu bila minkɛ, a kumana jama fɛ tugu.

²¹ Nga u pɛrɛnna ko: «A gwengwen lɔgɔ kan! A gwengwen lɔgɔ kan!»

²² Pilati kumana u fɛ a siɲɛ sabanan na ko: «A ye kojugu jumɛn kɛ? A ye koo min kɛ n'o b'a fagakun bɔ, ne m'o ye. O la, ne ben'a to u b'a bugɔ ni golokami ye. O kɔ, ne ben'a to a be taga.»

²³ Nga u tora ka pɛrɛn ko Pilati ka Yezu gwengwen lɔgɔ kan. U ka mankan boɲana fɔɔ ka see sɔrɔ.

²⁴ O tuma na, Pilati y'a fɔ ko u ye min daali, k'o bena kɛ u ye.

²⁵ Barabasi min tun donna kaso la murutili ni mɔgɔfaga kosɔn, a y'ale labila i n'a fɔ u y'a ɲini cogo min na. Nga a ye Yezu don u bolo waasa u k'u sago kɛ a la.

Yezu ka gwengwenko

²⁶ U taatɔ ni Yezu ye, u ye cɛɛ dɔ kunbɛn min tun bɔr'a ka foro la. Sirɛnika tun lo, a tɔgɔ tun ko Simɔn. U y'ale karaba ko a ka Yezu gwengwenlɔgɔ ɲun ka tugu a kɔ.

²⁷ Jamaba tugunin tun be Yezu kɔ. Muso caaman ɲaa sisinin tun be, ani u tun b'u disi gosi dusukasi bolo Yezu ka tɔɔrɔ kosɔn.

²⁸ Nga Yezu y'a ɲaa yɛlɛma k'a fɔ u ye ko: «Zeruzalɛmu musow, aw kana kasi ne kosɔn. Aw ye kasi aw yɛrɛw n'aw ka deenw kosɔn,

²⁹ bari loon dɔ bena se, mɔgɔw ben'a fɔ ko: ‹Muso minw ma deen sɔrɔ ka ye, ni minw te se ka deen sɔrɔ, ani minw ma siin di deen ma ka ye, olu dagamunin lo.›

³⁰ O tuma na, mɔgɔw ben'a daminɛ k'a fɔ kuluw ye ko: ‹Aw ka ben an kan!› U ben'a fɔ tintinw ye ko: ‹Aw k'an datugu!›

³¹ Ne be kuma ten bari aw yɛrɛ y'a ye u be nin kɛra yirikɛnɛ na, yiri jalan ta bena kɛ cogo di?»

³² U tun be tagara ni kojugukɛla fila fana ye k'olu ni Yezu faga ɲɔgɔn fɛ.

³³ U tagara se kulunin dɔ kan, u be min wele ko Kungolokolo. U ye Yezu gwengwen lɔgɔ kan yen, ka kojugukɛla fila nunu fana gwengwen lɔgɔ dɔw kan, kelen a kinibolo fɛ, kelen a numanbolo fɛ.

³⁴ Nga Yezu y'a fɔ ko: «N Faa, yafa u ma bari u be min kɛra, u m'o lɔn.» U ye kala la ka Yezu ka faniw tilan ɲɔgɔn cɛ.

³⁵ Mɔgɔw tun lɔra n'u be filɛli kɛ. Zuwifuw ka kuntigiw kɔni tun be yɛlɛla Yezu ma. U ko: «A ye mɔgɔ wɛrɛw kisi, a k'a yɛrɛ kisi sa. N'a ye Ala ka Mɔgɔ wolomanin nin ye tigitigi, a k'a yɛrɛ kisi.»

³⁶ Sɔlidasiw fana tun be yɛlɛla a ma. U gwɛrɛla a la k'u be vinɛgiri d'a ma.

³⁷ U y'a fɔ ko: «N'i ye zuwifuw ka masa ye, i yɛrɛ kisi.»

³⁸ U y'a sɛbɛn fɛɛn dɔ kan k'a dulon gwengwenlɔgɔ la Yezu kunna ko: «Nin ye zuwifuw ka masa ye.»

³⁹ Kojugukɛla minw tun gwengwenna fana, olu kelen tun b'a nɛnina ko: «I te Ala ka Mɔgɔ wolomanin nin ye wa? I yɛrɛ kisi k'an fana kisi kɛ!»

⁴⁰ Nga kojugukɛla tɔ kelen nin ye dɔ nin sɔngɔ ko: «E min b'o tɔɔrɔ ɲɔgɔn na, i te siran Ala ɲa!

⁴¹ An kɔni ka kan ni tɔɔrɔ nin ye bari an ye kojugu kɛ, nga ale ma kojugu si kɛ.»

⁴² O kɔ, a y'a fɔ Yezu ye ko: «Matigi, n'i nana sigi i ka masaya la tuma min na, i k'i hakili to ne la.»

⁴³ Yezu y'a jaabi ko: «Tiɲɛ na, ne b'a fɔ i ye, i bena kɛ ne fɛ arijana na bii yɛrɛ.»

Yezu ka sayako

⁴⁴ Tilegwangwanfɛ, dibi donna yɔrɔ bɛɛ fɔɔ ka lɛrɛ saba kɛ.

⁴⁵ Alabatosoba cɛtigɛfani faranna fila ye.

⁴⁶ Yezu pɛrɛnna kosɔbɛ ko: «N Faa, ne be n nii segi i ma.» A y'o fɔ ka ban tuma min na, a nii bɔra.

⁴⁷ Sɔlidasiw kuntigi ye koo nunu ye ten, a ye Ala boɲa k'a fɔ ko: «Siga t'a la, cɛɛ nin tun ye mɔgɔɲuman ye.»

⁴⁸ Koo minw tun kɛra, mɔgɔ minw tun tagara olu filɛ, u kɔsegitɔ tun b'u disi gosi dusukasi bolo.

⁴⁹ Yezu lɔnbagaw bɛɛ lɔnin tun be yɔrɔjan k'o koow filɛ. Muso minw tun tugura Yezu kɔ ka bɔ Galile mara la, olu fana tun b'u cɛma.

Yezu suu donko

⁵⁰ Cɛɛ dɔ fana tun be yen, a tɔgɔ ko Yusufu, zuwifuw ka kititigɛlaw dɔ tun lo. Mɔgɔɲuman tun lo, a tun te sɔn ka mɔgɔ tɔɲɔ.

⁵¹ A tun ma sɔn a tɔɲɔgɔnw ka koo latigɛli ani u ka kɛtaw ma. A tun bɔra zuwifu ka dugu dɔ la min tɔgɔ ko Arimate. A tun be Ala ka masaya waati kɔnɔna.

⁵² A tagara Pilati sɛgɛrɛ ka Yezu suu daali a fɛ.

⁵³ O kɔ, Yusufu tagara Yezu suu bɔ lɔgɔ kan k'a kasange ni bagi gwɛman ye, k'a don kaburu dɔ kɔnɔ. O kaburu soginin tun be fara la. Mɔgɔ si suu tun ma don yen fɔlɔ.

⁵⁴ Jumalon tun lo. Lafiɲɛlon tun be ɲini ka daminɛ.

⁵⁵ Muso minw tun tugura Yezu kɔ ka bɔ Galile mara la, olu tagara ni Yusufu ye Yezu suu donyɔrɔ la. U ye kaburu nin ye ka Yezu suu doncogo bɛɛ filɛ.

⁵⁶ O kɔ, u segira ka taga dugu kɔnɔ. U ye wusulan ni tulu kasadiman labɛn. U ye lafiɲɛlon bato i ko a fɔra cogo min na Ala ka sariya la.