Luka 20 - ALA KA KUMA

Jɔn ye fanga di Yezu ma?

¹ Loon dɔ la, Yezu tun be mɔgɔw kalanna Alabatosoba kɔnɔ ka kibaru diman fɔ u ye. Sarakalasebagaw kuntigiw ni sariya karamɔgɔw ani dugu cɛkɔrɔbaw tagar'a sɔrɔ,

² k'a ɲininga ko: «I be koo minw kɛ, jɔn le y'o sira d'i ma? Jɔn le y'o fanga d'i ma?»

³ A y'u jaabi ko: «Ne fana bena aw ɲininga koo kelen na.

⁴ Jɔn le ye Zan ci ko a ka na mɔgɔw batize, Ala lo wa, walima mɔgɔw lo?»

⁵ O tuma na, olu ye ɲɔgɔn ye, k'u ka miiriyaw fɔ ɲɔgɔn ye ko: «N'an y'a jaabi ko Ala lo, a bena an ɲininga ko mun na an ma la a la.

⁶ N'an y'a fɔ ko mɔgɔw lo fana, mɔgɔw bena an bon ni kabakuru ye k'an faga, bari u lara a la ko Zan tun ye kira ye.»

⁷ O le y'a to u ye Yezu jaabi k'u t'a lɔn.

⁸ Yezu y'a fɔ u ye ko: «N'o lo, mɔgɔ min ye sira di ne ma ka koo nunu kɛ, ne fana tena o fɔ aw ye.»

Sɛnɛkɛlajuguw talen

⁹ O kɔ, Yezu y'a daminɛ ka talen nin la jama ye. A ko: «Cɛɛ dɔ ye *ɛrɛzɛnforo bɔ k'a don baarakɛla dɔw bolo, ka taga mɛn jamana wɛrɛ la.

¹⁰ Ɛrɛzɛn mɔna tuma min na, a y'a ka jɔɔn dɔ ci baarakɛla nunu fɛ ko a ka taga ale niyɔrɔ minɛ. Nga baarakɛla nunu y'a minɛ k'a bugɔ k'a bololakolon bila ka taga.

¹¹ Forotigi ye jɔɔn wɛrɛ ci u fɛ. U y'o fana nɛni k'a bugɔ k'a bololakolon bila ka taga.

¹² A ye jɔɔn sabanan ci, u y'ale fana bugɔ fɔɔ k'a mandimi k'a ta k'a fili waga kɔnɔ.

¹³ Forotigi sɔrɔla k'a fɔ ko: ‹Ne bena mun kɛ? N dencɛ min koo ka di n ye, n bena o ci, n'a sɔrɔ, u bena ale boɲa.›

¹⁴ Nga ɛrɛzɛn baarakɛlaw ɲaa lara a kan tuma min na, u y'a fɔ ɲɔgɔn ye ko: ‹Nin le ye cɛntala ye, an k'a faga janko cɛɛn nin ka kɛ an ta ye.›

¹⁵ U y'a minɛ ka taga n'a ye waga kɔnɔ k'a faga.» Yezu ye jama ɲininga ko: «Forotigi bena mun kɛ u la?

¹⁶ A bena taga o baarakɛlaw faga ka dɔ wɛrɛw ta k'u bila foro kunna.» Mɔgɔw y'o mɛn tuma min na, u ko: «Ala k'an kisi o ma.»

¹⁷ Nga Yezu y'u filɛ k'a fɔ u ye ko: «Min fɔra Ala ka kuma na, o kɔrɔ bena kɛ mun ye sa? A ko: ‹Bonlɔlaw banna kabakuru min na, o nana kɛ kabakuru barikaman ye, boon nɔnkɔn ta.›

¹⁸ Ni mɔgɔ min benna o kabakuru nin kan, o tigi kolow bena karikari. N'o kabakuru nin benna mɔgɔ min kan, a bena o tigi ɲɔɲɔ.»

¹⁹ Sariya karamɔgɔw ni sarakalasebagaw kuntigiw tun be cogo ɲinina waasa ka Yezu minɛ o waati yɛrɛ la, bari u tun y'a faamu ka ɲa ko Yezu ka talen nin ɲaa sinnin tun be olu le ma. Nga u tun be siran jama ɲa.

Nisara ka di Masacɛ ma

²⁰ Sariya karamɔgɔw ni sarakalasebagaw kuntigiw y'a daminɛ ka Yezu kɔlɔsi kosɔbɛ. O la, u ye nafigi dɔw ci a fɛ. Olu y'u yɛrɛw kɛ mɔgɔtilenninw ye waasa ka Yezu minɛ a yɛrɛ dalakuma fɛ ni ɲiningali dɔ ye. U tun b'a fɛ ka sababu dɔ sɔrɔ ka Yezu don Ɔrɔmu masacɛ ka lasigiden bolo.

²¹ Nafigi nunu tagar'a fɔ a ye ko: «Karamɔgɔ, an y'a lɔn ko i ka kuma n'i ka kalan tilennin be, i te mɔgɔ bɔ mɔgɔ la, Alasira ka kan ka taama cogo min na, i be mɔgɔw kalan o la tiɲɛ na.

²² A daganin be an ka lɛnpo sara Ɔrɔmu masacɛ ma wa, walima a daganin tɛ?»

²³ Nga Yezu bɔra u ka nafigiya kala ma. O la, a y'a fɔ u ye ko:

²⁴ «Aw ka warigwɛ dɔ di yan n k'a filɛ.» A ko: «Jɔn jaa n'a bulonɔn le b'a kan?» U ko masacɛ.

²⁵ O tuma na, a y'a fɔ u ye ko: «Fɛɛn min ye masacɛ ta ye, aw k'o di masacɛ ma, ka Ala ta di Ala ma.»

²⁶ U ma se ka Yezu minɛ a yɛrɛ dalakuma dɔ fɛ jama ɲana, nga a ka jaabili y'u kabakoya fɔɔ u jera.

Saduseɲɛ dɔw be Yezu ɲininga

²⁷ *Saduseɲɛw le tun b'a fɔ ko suuw tena kunun. U dɔw gwɛrɛla Yezu la

²⁸ k'a ɲininga ko: «Karamɔgɔ, Musa y'a fɔ an ye ko: ‹Ni cɛɛ furunin dɔ sara n'a ma deen sɔrɔ, a dɔgɔcɛ ka kan k'a muso ta ka deen sɔrɔ a kɔrɔcɛ ye.›

²⁹ Ayiwa, dencɛ wolonwula tun be cɛɛ dɔ fɛ. Kɔrɔcɛman ye muso furu. A sara n'u ma deen sɔrɔ.

³⁰ Filanan y'o muso kelen nin ta,

³¹ o kɔ, sabanan y'a ta. O cogo la, dencɛ wolonwula nunu bɛɛ sara ten, u si ma deen sɔrɔ muso nin ma.

³² A laban, muso nin fana sara.

³³ Ayiwa, suuw bena kunun loon min na, muso nin bena kɛ u jumɛn ta ye? Bari o mɔgɔ wolonwula bɛɛ y'a furu ka ye.»

³⁴ Yezu y'u jaabi ko: «Bii bii nin na, diɲɛ kɔnɔ, mɔgɔw be furu ɲɔgɔn ma.

³⁵ Nga Ala ye mɔgɔ minw jati mɔgɔɲumanw ye n'a bena u kunun u sanin kɔ, ani ka sini hɛrɛ di u ma, olu tena furu.

³⁶ Olu tena sa tugu, bari u bena kɛ i n'a fɔ mɛlɛkɛw. Ala bena u jati a deenw ye bari a y'u kunun u sanin kɔ.

³⁷ Ayiwa, suuw bena kunun. Musa yɛrɛ fana tun y'o fɔ ka gwɛ yiritunin yɔrɔ la. A ye Matigi wele ko Ibrayima ka Ala, ni Isiyaka ka Ala, ani Yakuba ka Ala.

³⁸ Ala te suuw ka Ala ye, nga ɲanamanw ta lo, bari Ala fɛ, u sanin tɛ, u ɲanaman lo.»

³⁹ Sariya karamɔgɔ dɔw y'a fɔ Yezu ye ko: «Karamɔgɔ, i ka kuma ɲana.»

⁴⁰ O kɔ, mɔgɔ si m'a jaa gwɛlɛya ka Yezu ɲininga foyi la tugu.

Ala ka Mɔgɔ wolomanin ka koo

⁴¹ Yezu y'a fɔ u ye ko: «Mɔgɔw be se k'a fɔ cogo di ko Ala ka Mɔgɔ wolomanin nin ye Dawuda ka deen dama ye?

⁴² Dawuda yɛrɛ y'a fɔ Ala tanuli dɔnkiliw la ko: ‹Matigi Ala y'a fɔ ne Matigi ye ko: Sigi ne kinibolo fɛ

⁴³ fɔɔ ne k'i juguw cɔnkɔn i seen kɔrɔ.›

⁴⁴ Dawuda yɛrɛ y'a wele ko Matigi, a do be se ka kɛ Dawuda ka deen dama ye cogo di?»

Yezu be kangari la a ka kalandenw ye

⁴⁵ Yezu y'a fɔ a ka kalandenw ye jama ɲana ko:

⁴⁶ «Aw ka aw yɛrɛw kɔlɔsi sariya karamɔgɔw la. Ka forocaw don ka yaala, o ka d'u ye, u b'a fɛ fana ko mɔgɔw k'u fo i n'a fɔ mɔgɔbabaw, jamayɔrɔ la. Ka sigi ɲafɛ, mɔgɔbabaw ka sigiyɔrɔ la, kalansow kɔnɔ ani jama ka dumunikɛyɔrɔw la, o fana ka d'u ye.

⁴⁷ Olu le be firiyamusow bololafɛnw bɛɛ bɔsi u la. O kɔ, u be mɛn Ala daalili la janko mɔgɔw k'u filɛ mɔgɔɲumanw ye. Olu ka jalaki tɔɔrɔ bena juguya kosɔbɛ.»