Luka 18 - ALA KA KUMA

Kititigɛla tiɲɛfɔbali talen

¹ Yezu ye talen dɔ la kalandenw ye k'a yira u la ko mɔgɔ ka kan ka Ala daali tuma bɛɛ, a kan'a fari faga.

² A ko: «Kititigɛla dɔ tun be dugu dɔ la. Kititigɛla nin tun te siran Ala ɲa, a tun te mɔgɔ si boɲa.

³ O dugu kelen nin kɔnɔ, firiyamuso dɔ tun be yen min tun be to ka taga fɔ a ye ko fɛɛn min be ale n'a kɛlɛɲɔgɔn cɛ, a k'o ɲanabɔ ale ye.

⁴ Muso mɛnna o la. Kititigɛla nin tun t'a fɛ k'a ɲanabɔ. A nana se waati dɔ la, a y'a fɔ a yɛrɛ kɔnɔ ko: ‹Ne te siran Ala ɲa ani ne te mɔgɔ si boɲa, o ye tiɲɛ ye.

⁵ Nga ne bena firiyamuso nin ka koo ɲanabɔ a ye, n'o tɛ, a bena to ka na ne nii tɔɔrɔ tuma bɛɛ.› »

⁶ O la, Matigi ko: «Aw ka kititigɛla tiɲɛfɔbali nin ka kuma lajɛ.

⁷ Ayiwa, Ala ye minw woloma k'u kɛ a ta ye, ni olu be dɛmɛ ɲini a fɛ suu ni tile, yala a bena mɛn k'u dɛmɛ wa?

⁸ Ne b'a fɔ aw ye ko a bena u ka koo ɲanabɔ joona. Nga Mɔgɔ Dencɛ bena segi tuma min na, yala a bena na lanaya sɔrɔ dugukolo kan wa?»

Fariziɲɛ ni lɛnpominɛla talen

⁹ Mɔgɔ minw tun b'u yɛrɛ jati mɔgɔtilenninw ye, n'u be tɔw lɔgɔbɔ, Yezu ye talen nin la olu koo la. A y'a fɔ ko:

¹⁰ «Loon dɔ, cɛɛ fila tagara Alabatosoba kɔnɔ ka Ala daali. Kelen tun ye *Fariziɲɛ ye, kelen tun ye lɛnpominɛla ye.

¹¹ «Fariziɲɛ nin lɔra ka Ala daali a yɛrɛ kɔnɔ ko: ‹Ala, ne be barika la i ye, bari ne te i n'a fɔ mɔgɔ tɔw, olu minw be benkanni kɛ, u be tilenbaliyakow kɛ, ka kakalaya kɛ, ani n te i n'a fɔ nin lɛnpominɛla nin.

¹² Ne be suun don siɲɛ fila lɔgɔkun o lɔgɔkun. Ne be fɛɛn o fɛɛn sɔrɔ, ne b'o bɛɛ jaka bɔ.›

¹³ «Lɛnpominɛla nin lɔnin tun be kɔfɛ yɔrɔjan. A ma sɔn k'a ɲaa kɔrɔta sanfɛ yɛrɛ, nga a tora k'a disi gosi dusukasi bolo, ka to k'a fɔ ko: ‹Ala, makari ne la, ne ye hakɛkɛla ye.› »

¹⁴ Yezu y'o kuma kuncɛ k'a fɔ ko: «Ne b'a fɔ aw ye ko Ala ye lɛnpominɛla nin jati mɔgɔtilennin ye sanni a ka segi soo. Nga a ma Fariziɲɛ nin jati mɔgɔtilennin ye, bari mɔgɔ o mɔgɔ b'a yɛrɛ boɲa, o tigi bena majigi. Mɔgɔ o mɔgɔ b'a yɛrɛ majigi, o bena boɲa sɔrɔ.»

Ala ka soo donbagaw

¹⁵ Mɔgɔw tun be taga ni denɲɛninw fana ye Yezu fɛ waasa a k'a bolo la u kan ka duba kɛ u ye. A ka kalandenw y'o ye minkɛ, u sɔngɔra u kunna.

¹⁶ Yezu ye denmisɛnw wele k'a fɔ a ka kalandenw ye ko: «Aw k'a to denmisɛnw ka na ne fɛ, aw kana u bali, bari Ala ka masaya ye olu bɔɲɔgɔnw le ta ye.

¹⁷ Tiɲɛ na, ne b'a fɔ aw ye ko ni mɔgɔ min ma sɔn Ala ka masaya ma i n'a fɔ denmisɛn o tigi tena se ka don a la fewu.»

Yezu ni nafolobatigi dɔ

¹⁸ Zuwifuw ka kuntigi dɔ ye Yezu ɲininga ko: «Karamɔgɔɲuman, ne ka kan ka mun kɛ ka nii banbali sɔrɔ?»

¹⁹ Yezu y'a fɔ a ye ko: «Mun na i be ne wele karamɔgɔɲuman? Mɔgɔɲuman si te yen ni Ala kelen tɛ.

²⁰ I be Ala ka sariyaw lɔn: ‹I kana kakalaya kɛ, i kana mɔgɔ faga, i kana soɲali kɛ, i kana galon seereya kɛ, i faa n'i baa boɲa.› »

²¹ A ye Yezu jaabi ko: «Ne y'o sariyaw bɛɛ bato kabini ne denmisɛnman.»

²² Yezu y'a ka kuma mɛn minkɛ, a y'a fɔ a ye ko: «Fɛɛn kelen b'i jɛn halibi. Taga i bololafɛn bɛɛ feere k'o wari tilan fantanw cɛ, o la, i bena nafolo sɔrɔ sankolo la. O kɔ, na tugu ne kɔ.»

²³ Nga a y'o mɛn tuma min na, a dusu kasira, bari nafolobatigi tun lo.

²⁴ Yezu y'a ye ko a dusu kasira minkɛ, a ko: «A ka gwɛlɛ nafolotigi ma ka don Ala ka masaya la.

²⁵ Ɲɔgɔmɛ donko ka nɔgɔ miseli woo fɛ ka tɛmɛ nafolotigi donko kan Ala ka masaya la.»

²⁶ Yezu lamɛnbagaw y'a fɔ ko: «O tuma na, jɔn le be se ka kisi?»

²⁷ A y'u jaabi ko: «Adamaden te se ka min kɛ, Ala be se k'o kɛ.»

²⁸ Piyɛri y'a fɔ o tuma na ko: «A filɛ, an y'an bololafɛnw to yen ka tugu e kɔ.»

²⁹ Yezu ko a ma: «Tiɲɛ na, ne b'a fɔ aw ye ko ni mɔgɔ o mɔgɔ y'a ka soo to, walima a muso, n'a balimaw, n'a wolobagaw, an'a deenw, Ala ka masaya kosɔn,

³⁰ o tigi bena olu ɲɔgɔn caaman sɔrɔ diɲɛ nin na. A bena nii banbali fana sɔrɔ sini.»

Yezu b'a saya n'a kununko fɔ tugu

³¹ Yezu tagara n'a ka cidenw tan ni fila ye u danna k'a fɔ u ye ko: «A filɛ, an be tagara Zeruzalɛmu. O yɔrɔ la, kiraw tun ye minw sɛbɛn Mɔgɔ Dencɛ ka koo la, o bɛɛ bena kɛ i ko u y'a fɔ cogo min na.

³² U ben'a don siya wɛrɛ bolo, olu bena yɛlɛ a ma, k'a tɔɔrɔ, k'u daji tu a kan,

³³ k'a bugɔ ni golokami ye ka sɔrɔ k'a faga. Nga tile saba a faganin kɔ, a bena kunun.»

³⁴ A ka kalandenw m'o kuma faamu. O kɔrɔ tun dogonin be u ma. O la, u ma se k'o lɔn.

Yezu be fiɲɛntɔ dɔ ɲaa yɛlɛ

³⁵ Yezu surunyana Zeriko la tuma min na, o y'a sɔrɔ fiɲɛntɔ dɔ tun siginin be sira daa la n'a be daalili kɛ.

³⁶ Fiɲɛntɔ nin ye jama mankan mɛn n'u be tɛmɛna minkɛ, a ye dɔw ɲininga ko: «Mun le kɛra?»

³⁷ U y'a fɔ a ye ko Nazarɛtika Yezu le be tɛmɛna.

³⁸ O tuma na, a pɛrɛnna ko: «Dawuda dencɛ Yezu, makari ne la!»

³⁹ Minw tun be ɲafɛ, olu sɔngɔra ko a ka je, nga a pɛrɛnna ka tɛmɛ fɔlɔta kan ko: «Dawuda dencɛ, makari ne la!»

⁴⁰ Yezu lɔra k'a fɔ k'u k'a minɛ ka na n'a ye. A gwɛrɛla Yezu la tuma min na, Yezu y'a ɲininga ko:

⁴¹ «I b'a fɛ ne ka mun kɛ i ye?» A y'a jaabi ko: «Matigi, ne ka yeli kɛ tugu.»

⁴² Yezu y'a fɔ a ye ko: «I lara ne la minkɛ, i kisira. Ayiwa, yeli kɛ tugu.»

⁴³ O yɔrɔnin bɛɛ, a ye yeli kɛ, a tugura Yezu kɔ n'a be Ala tanu. Jama bɛɛ y'o ye minkɛ, u ye Ala tanu.