Luka 16 - ALA KA KUMA

Namaramɔgɔ talen

¹ Yezu y'a fɔ a ka kalandenw ye ko: «Cɛɛ nafolotigi dɔ tun be yen. A tun ye mɔgɔ dɔ ta k'a bila a ka nafolo kunna. Mɔgɔw y'a kɔrɔfɔ a kuntigi ye ko a b'a ka nafolo cɛn.

² A kuntigi y'a wele k'a fɔ a ye ko: ‹Ne be min mɛnna i ka koo la, o man di. I ye baara kɛ cogo min na, o ɲafɔ ne ye, bari i tena se ka to ne ka nafolo kunna tugu.›

³ O kuma mɛnnin kɔ, a y'a miiri ko: ‹Ne bena mun kɛ sa? Bari ne kuntigi bena n bɔ a ka nafolo kunna. Ne te se ka sɛnɛ kɛ. Ka daalili kɛ, o bena kɛ maloya ye ne ma.

⁴ Ni ne gwɛnna ka bɔ baara nin na tuma min na, ne bena min kɛ mɔgɔ dɔw ka se ka ne dɛmɛ, ne y'o lɔn.›

⁵ «O tuma na, mɔgɔ minw ye juru ta a kuntigi fɛ, a y'u wele kelen kelen. Min kɔnna ka na, a y'ale ɲininga ko: ‹Ne kuntigi ka juru min b'i la, joli lo?›

⁶ O y'a jaabi ko: ‹Tulu daga kɛmɛ.› A y'a fɔ o ye ko: ‹I ka juru sɛbɛ filɛ nin ye, sigi ka tulu daga bi duuru sɛbɛn joona joona.›

⁷ O kɔ, a y'a fɔ dɔ wɛrɛ ye ko: ‹E do, joli b'i la?› O y'a jaabi ko: ‹*Bile bɔɔrɔ kɛmɛ.› A y'a fɔ o ye ko: ‹I ka juru sɛbɛ filɛ nin ye, bɔɔrɔ bi seegi sɛbɛn.›

⁸ «Cɛɛ namaratɔ nin kuntigi y'a tanu a ka cekuya kosɔn. Tiɲɛ na, nin diɲɛ mɔgɔw be koow kɛ ni cekuya ye u ni ɲɔgɔn cɛ ka tɛmɛ Alalɔnbagaw kan.»

Nafolo minɛcogo

⁹ Yezu tagara ɲa ni kuma ye k'a fɔ ko: «Ne b'a fɔ aw ye ko aw ka teriw ɲini ni diɲɛ nafolo ye, waasa n'o nana ban tuma min na, olu ka se k'aw kunbɛn arijana na.

¹⁰ Mɔgɔ min ye mɔgɔsɔbɛ ye kofitini na, o ye mɔgɔsɔbɛ ye koba la fana. Min ye janfamɔgɔ ye kofitini na, o ye janfamɔgɔ ye koba la fana.

¹¹ N'aw ma kɛ mɔgɔsɔbɛw ye nin diɲɛ nafolo koow la, jɔn le bena nafolosɔbɛ kalifa aw ma?

¹² N'aw ma kɛ mɔgɔsɔbɛw ye mɔgɔ wɛrɛ ka nafolo koo la, min bena kɛ aw ta ye, jɔn ben'a d'aw ma?

¹³ «Mɔgɔ si te se ka baara kɛ kuntigi fila ye, bari a bena kelen kɔniya ka kelen kanu, walima a bena nɔrɔ kelen na k'a mako bɔ kelen na. Aw te se ka nafolo kanu, ka baara kɛ Ala ye fana.»

Yezu ka ladili dɔw

¹⁴ Nafolo koo ka di *Fariziɲɛw ye minkɛ, u y'o kuma bɛɛ mɛn tuma min na, u tun be yɛlɛla Yezu ma.

¹⁵ A y'a fɔ u ye ko: «Mɔgɔw ɲana, aw kɔni b'aw yɛrɛw kɛ mɔgɔtilenninw ye, nga min b'aw dusu la, Ala b'o lɔn, bari adamadenw be fɛɛn min jati fɛnba ye, o ye fɛɛn nafatan ye Ala ɲana.

¹⁶ «Kabini fɔlɔfɔlɔ, u tun be mɔgɔw kalan ni Ala ka sariya, ni kiraw ka kuma ye fɔɔ ka na se Zan batizelikɛla ka waati ma. K'a ta o ma, Ala ka masaya kibaru diman be fɔra mɔgɔw ye. Bɛɛ be jijara fana ka don o masaya la.

¹⁷ «Sankolo ni dugukolo ka wili ka bɔ u nɔɔ na, o ka nɔgɔ ni sariya kuma fɔnin dakuru ɲaa kelen cɛnni ye.

¹⁸ «Mɔgɔ o mɔgɔ y'a muso furu sa ka dɔ wɛrɛ ta, o tigi be kakalaya kɛ. Ni mɔgɔ o mɔgɔ ye muso furusanin furu, o tigi be kakalaya kɛ fana.

Nafolotigi ni Lazari ka koo

¹⁹ «Nafolotigi dɔ tun be yen, a tun be dakamana fani don ka faamadumuni kɛ ka ɲanagwɛ loon o loon.

²⁰ Fantan dɔ fana tun be yen min tɔgɔ ko Lazari. A fari yɔrɔ bɛɛ tun ye joli ye. A tun be la nafolotigi ka soo daa la.

²¹ Dumuni murumuru minw tun be ben nafolotigi fɛ, a tun b'a fɛ ka olu dumu, nga a tun t'o sɔrɔ. Ka fara o kan, wuluw tun be na k'a ka jolidaw nɛɛmu.

²² «Fantan nin nana sa, mɛlɛkɛw y'a ta ka taga sigiyɔrɔ d'a ma Ibrayima gɛrɛfɛ arijana na. Nafolotigi nin fana nana sa, u y'a suu don.

²³ A tun be tɔɔrɔba la jahanama na, a y'a ɲaa kɔrɔta ka Ibrayima ye yɔrɔjan ni Lazari b'a gɛrɛfɛ.

²⁴ O tuma na, a pɛrɛnna ko: ‹Ne faa Ibrayima, makari ne la. A fɔ Lazari ye ko a ka taga bolokunnaden sun jii la ka na ne kaan ɲigi n'a ye, bari ne tɔɔrɔnin be kojugu tasuma nin kɔnɔ.›

²⁵ «Nga Ibrayima y'a fɔ a ye ko: ‹N deen, e yɛrɛ y'a lɔn ko k'i to diɲɛ na, i tun be ɲasuma na, ni Lazari be sigɛn na. Sisan, Lazari fana be ɲasuma na, e be sigɛn na.

²⁶ Hali n'o tɛ, dingɛbelebeleba be an ni aw cɛ. O la, ni mɔgɔ min b'a fɛ ka bɔ yan ka taga aw fɛ, a kana se, ani mɔgɔ fana kana se ka bɔ aw fɛ ka na yan.›

²⁷ Nafolotigi y'a fɔ ko: ‹O tuma, ne faa, ne b'i daali, i ka Lazari bila ka taga ne ka somɔgɔw fɛ,

²⁸ bari dɔgɔcɛ duuru be ne fɛ. A ka taga u lasɔmi waasa olu fana kana na nin tɔɔrɔ yɔrɔ la.›

²⁹ «Ibrayima y'a jaabi ko: ‹Ala ka sariya ni kiraw ka sɛbɛw be u bolo, u ka olu kɔnɔnakuma bato.›

³⁰ Nafolotigi ko: ‹Ayi, o te labɔli kɛ ne faa Ibrayima, nga ni mɔgɔ min sara ka ban, n'ale kununna ka taga kuma u fɛ, u bena nimisa ka faran u ka kojuguw la.›

³¹ Ibrayima tilara k'a fɔ a ye ko: ‹N'u ma Ala ka sariya ni kiraw ka sɛbɛw kɔnɔnakuma bato, hali ni mɔgɔ sanin dɔ kununna ka taga kuma u fɛ, u tena la o la.› »