Luka 15 - ALA KA KUMA

Sagatununin talen

¹ Lɛnpominɛlaw ni hakɛkɛlaw bɛɛ tun be to ka gwɛrɛ Yezu la k'a ka kuma lamɛn.

² *Fariziɲɛw ni sariya karamɔgɔw tun be to ka ŋunuŋunu. U tun b'a fɔ ko: «Cɛɛ nin be hakɛkɛlaw minɛ ka ɲa ka dumuni yɛrɛ kɛ n'u ye.»

³ O la, Yezu ye talen nin la u ye ko:

⁴ «Ni saga kɛmɛ be aw dɔ fɛ, ni kelen tununa, a ten'a tɔɔ bi kɔnɔntɔn ni kɔnɔntɔn nunu to kongo kɔnɔ ka taga kelen nin yaala fɔɔ k'a ye wa?

⁵ N'a y'a ye tuma min na, a b'a ta k'a bila a kaan na ni nisɔndiya ye.

⁶ N'a kɔsegira ka se soo tuma min na, a b'a teriw n'a sigiɲɔgɔnw wele k'a fɔ u ye k'u ka nisɔndiya ɲɔgɔn fɛ, bari ko ale y'a ka sagatununin ye.

⁷ Ne b'a fɔ aw ye ko ni hakɛkɛla kelen nimisara ka faran a ka kojuguw la, mɛlɛkɛw bena nisɔndiya sankolo la o tigi kosɔn, o cogo la fana. Mɔgɔtilennin bi kɔnɔntɔn ni kɔnɔntɔn minw mako te nimisali la, nisɔndiya min be kɛ olu kosɔn, o te se mɔgɔ kelen nin ta ma.

Warimisɛn tununin min yera

⁸ «Ni warigwɛ deen tan be muso dɔ fɛ, ni kelen tununa, a tena fitinɛ mana ka soo furan k'a yaala ka ɲa fɔɔ k'a ye wa?

⁹ N'a y'a ye tuma min na, a b'a teriw n'a sigiɲɔgɔnw wele k'a fɔ u ye k'u ka nisɔndiya ɲɔgɔn fɛ, bari ko ale ka warigwɛ deen kelen min tun tununa, ko a y'a ye.

¹⁰ Ne b'a fɔ aw ye ko ni hakɛkɛla kelen nimisara ka faran a ka kojuguw la, nisɔndiya be kɛ Ala ka mɛlɛkɛw fɛ o tigi kosɔn o cogo la.»

Deen min tununa n'a yera

¹¹ Yezu y'a fɔ tugu ko: «Dencɛ fila tun be cɛɛ dɔ fɛ.

¹² Dɔgɔman y'a fɔ a facɛ ye ko: ‹N Faa, ne bena min sɔrɔ i cɛɛn na, o di ne ma.› O tuma na, facɛman y'a ka nafolo tilan u cɛ.

¹³ Tile damani tɛmɛnin kɔ, dɔgɔman nin ye fɛɛn minw sɔrɔ cɛɛn na, a y'u feere ka taga n'a wari ye jamanajan dɔ la, k'o bɛɛ cɛn kakalaya la.

¹⁴ A ka wari bɛɛ banna tuma min na, kɔngɔba donna o jamana na, a ka dumuni dɛsɛra.

¹⁵ A tagara don baara la dugulen dɔ fɛ, ale y'a bila ka taga lɛɛw dɛndɛ a ka forow la.

¹⁶ A tun b'a fɛ ka lɛɛw ka dumuni dumu kɔngɔ kosɔn, nga mɔgɔ si tun t'o d'a ma.

¹⁷ A miirila o tuma na k'a fɔ a yɛrɛ kɔnɔ ko: ‹Baaraden caaman be n faa fɛ, u be dumuni kɛ fɔɔ k'a tɔɔ to, ne do be halakira kɔngɔ bolo yan.›

¹⁸ Ne bena wili ka taga n faa fɛ k'a fɔ a ye ko: ‹N faa, ne y'i hakɛ ta, ne donna Ala gasi la.

¹⁹ Ne man kan ka wele ko i deen tugu. I ka ne minɛ i n'a fɔ i ka baaraden.›

²⁰ A wilila k'a faso sira ta. «K'a to yɔrɔjan, a faa y'a ye, a hinɛ donna a la. A bolila ka taga bolo meleke a dencɛ kaan na.

²¹ Deen y'a fɔ a faa ye ko: ‹N faa, ne ye Ala hakɛ ta k'i fana hakɛ ta. Ne man kan ka wele ko i deen tugu.›

²² Nga a faa y'a fɔ a ka baaradenw ye ko: ‹Aw ka teliya ka na ni foroca ye, min ka ɲi tɔw bɛɛ ye, a b'o don. Aw ka bololanigɛ don a bolo la ka sanbara d'a ma, a b'o don.

²³ Aw ka na ni misiden tulɔnin ye k'a faga ka dumuni tobi. An b'o dumu ka ɲanagwɛ,

²⁴ bari ne deen min filɛ nin ye, a tun tununa, a yera. A kɛra i n'a fɔ a sara ka kunun.› U ye ɲanagwɛ daminɛ.

²⁵ «O waati la, cɛɛ nin dencɛ fɔlɔ tun be foro la. Ale segitɔ, a surunyana soo la tuma min na, a ye fɔlifɛnw ni dɔnsen mankan mɛn.

²⁶ A ye baaradenw kelen wele k'a ɲininga ko mun le kɛra soo.

²⁷ Baaraden nin y'a jaabi ko: ‹I dɔgɔcɛ segira ka na, i faa ye misiden tulɔnin faga, bari a segira kɛnɛya la.›

²⁸ «O la, dencɛ fɔlɔ dimina, a tun t'a fɛ ka don soo. A faa bɔra ka taga daali ko a ka don.

²⁹ O tuma na, a y'a fɔ a faa ye ko: ‹A filɛ, ne saan caaman ye nin ye, ne be baara kɛra i ye. Ne ma ban i ta ma tuma si. O n'a ta bɛɛ, i ma deli ka hali baden yɛrɛ di ne ma waasa ne ni n teriw ka ɲanagwɛ ɲɔgɔn fɛ.

³⁰ Nga i deen min filɛ nin ye, a y'i ka nafolo bɛɛ cɛn ni sunguru ye. A segira ka na tuma min na, i ye misiden tulɔnin faga a ye.›

³¹ Nga a faa y'a fɔ a ye ko: ‹N deen, i be ne fɛ tuma bɛɛ, fɛɛn minw bɛɛ be ne fɛ, o bɛɛ ye i ta ye.

³² Nga an ka kan ka nisɔndiya ka ɲanagwɛ, bari i dɔgɔnin min filɛ nin ye, a kɛra i n'a fɔ a sara ka kunun, a tun tununa, nga a yera.› »