Lok 2nan 36 - ALA KA KUMA

¹ Jamana kɔnɔ mɔgɔw ye Zoziyasi dencɛ Yowakazi sigi masaya la Zeruzalɛmu a facɛ nɔɔ na.

Masacɛ Yowakazi ka koo

² Yowakazi tun ye saan mugan ni saba sɔrɔ ka sɔrɔ ka sigi masaya la. A ye kalo saba kɛ masaya la Zeruzalɛmu.

³ Ezipiti masacɛ y'a bɔ masaya la Zeruzalɛmu, ka nisɔngɔ la Zuda mara mɔgɔw kan, min tun ye warigwɛ kilo waa saba ye, ani sanu kilo bi saba.

⁴ Ezipiti masacɛ ye Yowakazi balimacɛ Eliyakimu kɛ masacɛ ye Zeruzalɛmu dugu ni Zuda mara kunna. A ye Eliyakimu tɔgɔ yɛlɛma ko Yoyakimu. Neko y'a balimacɛ Yowakazi minɛ ka taga n'a ye Ezipiti jamana na.

Masacɛ Yoyakimu ka koo

⁵ Yoyakimu tun ye saan mugan ni duuru sɔrɔ, ka sɔrɔ ka kɛ masacɛ ye. A ye saan tan ni kelen kɛ masaya la Zeruzalɛmu. A ye kojugu kɛ Masaba a ka Ala ɲakɔrɔ.

⁶ Babilɔni masacɛ Nabukodonozɔri wilila ka n'a kama. K'a minɛ k'a siri ni zirajɔrɔkɔw ye ka taga n'a ye Babilɔni.

⁷ Nabukodonozɔri ye Masaba ka soo kɔnɔ minan dɔw ta ka taga n'u ye Babilɔni, k'u bila a ka soo kɔnɔ.

⁸ Yoyakimu ka kɛwali tɔw, a ye kokolon minw kɛ, ani koo min bɛɛ y'a sɔrɔ, olu be sɔrɔ Isirayɛli ni Zuda mara masacɛw ka kitabu kɔnɔ. O kɔ, a dencɛ Yoyakin sigir'a nɔɔ na masaya la.

Masacɛ Yoyakin ka koo

⁹ Yoyakin tun ye saan seegi sɔrɔ, ka sɔrɔ ka sigi masaya la. A ye kalo saba ni tile tan kɛ masaya la Zeruzalɛmu. A ye kojugu kɛ Masaba ɲakɔrɔ.

¹⁰ Saan yɛlɛmatuma na, masacɛ Nabukodonozɔri ye mɔgɔw bila ka ta'a minɛ ka na n'ale, ani Masaba ka soo kɔnɔ minan sɔngɔgwɛlɛnw ye Babilɔni. A ye Yoyakin balimacɛ Sedesiyasi sigi masaya la Zeruzalɛmu dugu ni Zuda mara kunna.

Masacɛ Sedesiyasi ka koo

¹¹ Sedesiyasi tun ye saan mugan ni kelen sɔrɔ, ka sɔrɔ ka sigi masaya la. A ye saan tan ni kelen kɛ masaya la Zeruzalɛmu.

¹² A ye kojugu kɛ Masaba a ka Ala ɲakɔrɔ. A m'a yɛrɛ majigi kira Zeremi kɔrɔ, min tun be Masaba ka kuma fɔ.

¹³ A murutira masacɛ Nabukodonozɔri ma, min tun y'a wajibiya ka kali Ala tɔgɔ la. A y'a tulo gwɛlɛya k'a dusu gwɛlɛya, a ma sɔn k'a ɲaa yɛlɛma Masaba, Isirayɛli ka Ala faan fɛ.

¹⁴ Sarakalasebagaw ɲamɔgɔw bɛɛ ni jama ye dɔ fara u ka tilenbaliyako kan, ka to ka siya wɛrɛw ka landajuguw bɛɛ kɛ, ani ka Masaba ka soo nɔgɔ, a tun ye min saniya Zeruzalɛmu.

¹⁵ Masaba u faaw ka Ala tora k'u lasɔmi a ka cidenw sababu la, bari a ka jama makari y'a minɛ, ni a tun b'a fɛ a yɛrɛ ka sigiyɔrɔ ka to yen.

¹⁶ Nga u ye Masa Ala ka ciden nunu lɔgɔbɔ, k'a ka kuma mafiɲɛya, ani ka yɛlɛ a ka kiraw ma, fɔɔ a dimin'a ka jama kɔrɔ, cogo ma sɔrɔ k'o dimi ban.

¹⁷ A y'a kɛ Babilɔnikaw ka masacɛ nana u kama. Ale y'u ka kanbelenw faga ni murujan ye Alabatoso kɔnɔ. A ma kanbelen to, a ma sunguru to, hali mɔgɔkɔrɔbaw ni kunsigigwɛtigiw. Masaba y'u bɛɛ don a bolo.

¹⁸ Nabukodonozɔri ye Ala ka soo kɔnɔ minanw bɛɛ ta, a minanba fara a fitiniw kan, ni Masaba ka soo kɔnɔ nafolo, ani masacɛ an'a ka dakɔrɔsigiw ka nafolow, ka taga n'u ye Babilɔni.

¹⁹ U ye Ala ka soo jɛni, ka Zeruzalɛmu laminikogo ci, ka masasow bɛɛ jɛni, ani k'o yɔrɔ minan ɲanamanw bɛɛ cɛn.

²⁰ Nabukodonozɔri ye mɔgɔ tɔw minɛ, minw kisira murujan ma, ka taga n'u ye Babilɔni. U kɛra ale n'a dencɛw ka jɔɔnw ye fɔɔ ka taga se pɛrɛsiw ka fanga tawaati ma.

²¹ Jamana ye lafiɲɛ sɔrɔ, a lafiɲɛna a ka dusukasiwaati bɛɛ la, fɔɔ ka saan bi wolonwula dafa. Masaba tun ye kuma min fɔ Zeremi ye n'a y'o fɔ, o dafara ten.

Sirusi be sira di ko Alabatoso ka lɔ

²² Kira Zeremi tun ye kuma min fɔ Masaba barika la, janko o koow ka kɛ, Masaba ye hakili di Pɛrɛsi masacɛ Sirusi ma, a ka masaya saan fɔlɔ la ko a ka nin kuma nin fɔ ani k'a kɛ sɛbɛ ye k'a ci a ka mara bɛɛ la ko:

²³ «Pɛrɛsi masacɛ Sirusi le ye nin kuma nin fɔ ko: ‹Masaba, Sankolotigi Ala ye ne kɛ masa ye jamana bɛɛ kunna, ale yɛrɛ fana le y'a ɲini ne fɛ ko n ka ta'a batoso lɔ Zeruzalɛmu, Zuda mara la. Aw jamanadenw cɛma, mɔgɔ o mɔgɔ kɛr'a ka mɔgɔ ye, aw ka taga Zeruzalɛmu, Zuda mara la. Masaba aw ka Ala ka to n'aw ye.› »