Lok 2nan 21 - ALA KA KUMA

¹ Zozafati sara, u y'a suu don a faaw kɔrɔ Dawuda ka ciin na. O kɔ, a dencɛ Zoramu sigir'a nɔɔ na masaya la.

Masacɛ Zoramu ka koo

² Zoramu balimaw, Zozafati dencɛw filɛ: Azariya ni Yeyɛli, ani Zakariyawu ni Azariyawu, ani Mikayɛli ni Sefatiya. U bɛɛ tun ye Isirayɛli mara masacɛ Zozafati deenw ye.

³ U facɛ tun ye warigwɛ ni sanu, ani minan sɔngɔgwɛlɛnw d'u ma siɲɛ caaman, ka dugu barikamanw d'u ma fana Zuda mara la. Nga a ye masaya to Zoramu bolo, bari ale y'a deen fɔlɔ ye.

⁴ Zoramu sigira ka ɲa masaya la a facɛ nɔɔ na tuma min na, a y'a balimaw bɛɛ, ni Isirayɛlidenw ka ɲamɔgɔ dɔw faga ni murujan ye.

⁵ Sanni Zoramu ka sigi masaya la, a tun ye saan bi saba ni fila sɔrɔ. A ye saan seegi kɛ masaya la Zeruzalɛmu.

⁶ A ye Isirayɛli mara masacɛw ka kɛwaliw ɲɔgɔn kɛ, i n'a fɔ Akabu ka somɔgɔw tun y'a kɛ cogo min na, bari a tun ye Akabu denmuso dɔ le furu. A ye kojugu kɛ Masaba ɲakɔrɔ.

⁷ Nga Masaba tun ye layidu ta Dawuda ye, o le kosɔn, a ma sɔn ka Dawuda ka soo halaki. A tun y'a fɔ ko a tena masaya bɔsi a n'a kɔmɔgɔw bolo pewu.

⁸ Edɔmuw murutira Zuda mara ka fanga ma ale Zoramu ka tile la, ka masacɛ wɛrɛ sigi u yɛrɛ ye.

⁹ O la, Zoramu tagara Edɔmu mara la n'a ka ɲamɔgɔw, n'a ka kɛlɛkɛwotorow bɛɛ ye. A wilila sufɛ ka edɔmuw kɛlɛ. Edɔmuw tun y'ale ni wotorow kuntigiw lamini.

¹⁰ Edɔmuw tora u ka murutili la Zuda mara ka fanga ma fɔɔ ka na se bii ma. Libinakaw fana murutira o waati kelen le la, bari Zoramu tun banna Masaba a faaw ka Ala la.

¹¹ A tun ye sɔnnikɛyɔrɔw dilan fana Zuda mara kuluw kan. A ye Zeruzalɛmukaw ni Zuda mara mɔgɔ tɔw bila kakalaya la.

¹² Loon dɔ, kira Eli ye bataki ci Zoramu ma. A tun fɔr'a kɔnɔ ko: «Masaba, i bɛma Dawuda ka Ala y'a fɔ ko: ‹I ma i facɛ Zozafati ka kɛwaliw ɲɔgɔn kɛ, walima Zuda mara masacɛ Aza taw.

¹³ I ye Isirayɛli mara masacɛw ka kɛwaliw le ɲɔgɔn kɛ, k'a kɛ Zeruzalɛmukaw ni Zuda mara mɔgɔw donna josɔn na i n'a fɔ Akabu ka somɔgɔw. E fana y'i yɛrɛ balimaw faga, i fadenw, minw tun ka fisa n'i ye.

¹⁴ Sisan Masaba ben'a kɛ tɔɔrɔba be se i ka jama n'i dencɛw n'i musow ma, ani k'i bololafɛnw bɛɛ cɛn.

¹⁵ Banajugu bena ele minɛ, kɔnɔdimi, min bena to ka juguya ka taga loon o loon, fɔɔ i nugu bena bɔ.› »

¹⁶ Filisiw, ni Arabu minw tun siginin be Etiyopikaw masurun na, masaba y'a kɛ olu wilil'a kama.

¹⁷ U nana Zuda mara kama ka don jamana nin kɔnɔ ka masacɛ ka soo kɔnɔ nafolo bɛɛ cɛ, n'a dencɛw, n'a musow, fɔɔ dencɛ si ma to a fɛ tugu n'u dɔgɔcɛ Yowakazi tɛ.

¹⁸ O bɛɛ kɔ, Masaba ye kɔnɔdimi bila a la min tun te se ka furakɛ.

¹⁹ Waati dɔ nana se, saan fila tɛmɛnin kɔ, a nugu bɔra bana nin bolo. A sara tɔɔrɔjugu bolo. A ka jama ma fɛɛn kasadiman jɛni a ye k'a boɲa i n'a fɔ u tun y'a kɛ a faaw ye cogo min na.

²⁰ Sanni a ka sigi masaya la, a sii tun ye saan bi saba ni fila ye. A ye saan seegi kɛ masaya la Zeruzalɛmu. A ka saya ma digi mɔgɔ si la. U y'a suu don Dawuda ka ciin na, nga u m'a don masacɛw ka kaburuw kɔnɔ.