Lok 2nan 16 - ALA KA KUMA

Aza be kɛlɛ kɛ ni Bayesa ye

¹ Aza ka masaya saan bi saba ni wɔɔrɔnan na, Isirayɛli mara masacɛ Bayesa wilila ka taga Zuda mara kama. A ye Arama dugu kɛ dugu barikaman ye janko a ka se ka Zuda mara masacɛ Aza ka mɔgɔw bali ka don, walima ka bɔ.

² Aza ye warigwɛ ni sanu ta Masaba ka soo nafolo marayɔrɔw la, ani a yɛrɛ ka soo kɔnɔ, k'a ci Siri masacɛ Bɛnadadi ma, min tun siginin be Damasi,

³ k'a fɔ a ye ko: «A to an be bɛɛn i n'a fɔ an faaw tun bɛnnin lo cogo min na. A filɛ, ne be warigwɛ ni sanu nin ci e ma. Bɛɛn min be e ni Isirayɛli mara masacɛ Bayesa cɛ, o bɛɛn nin cɛn, janko a kana ne kɛlɛ tugu.»

⁴ Bɛnadadi sɔnna masacɛ Aza ka fɔta ma. A y'a ka kɛlɛkuntigiw ci k'u ka taga Isirayɛli mara duguw kɛlɛ. U ye Iyɔn dugu, ni Dan, ani Abɛlimayimu kɛlɛ ka se u kɔrɔ, ani Nɛfutali mara minanw maraduguw bɛɛ.

⁵ Bayesa y'o mɛn tuma min na, a ye Arama dugu lɔ dabila, k'a ka baaraw lalɔ.

⁶ Masacɛ Aza nana ni Zuda mara mɔgɔw bɛɛ ye. Bayesa tun be kabakuru ni lɔgɔ minw kɛra ka Arama dugu lɔ, u tagara o bɛɛ ta ka taga n'u ye. Aza y'u kɛ ka Geba ni Misipa duguw lalaga.

Aza be kira Anani don kaso la

⁷ O waati la, kira Anani tagara Zuda mara masacɛ Aza fɛ k'a fɔ a ye ko: «E y'i jigi la Siri masacɛ kan minkɛ, i ma i jigi la Masaba i ka Ala kan, o la, Siri masacɛ ka kɛlɛdenw bɔsira i bolo.

⁸ Etiyopikaw ni Libikaw tun te kɛlɛboloba ye wa? Kɛlɛkɛwotorow ni sotigi caaman tun b'u fɛ. O bɛɛ n'a ta, Masaba ye olu don i bolo, bari i tun y'i jigi l'a kan.

⁹ Masaba ɲaa be diɲɛ bɛɛ la, a ka koo be mɔgɔ minw dusu la, a be barika don olu la. I ye nalomanya kɛ dɛ. O la, kabini sisan i bena kɛlɛ sɔrɔ.»

¹⁰ Aza dimina kira nin kɔrɔ k'a don kaso la, bari a dimininba tun lo koo nin na. O waati kelen na, Aza y'a ka mɔgɔ dɔw tɔɔrɔ.

Aza ka saya

¹¹ K'a ta u daminɛ na fɔɔ ka taga se u laban ma, Aza ka kɛwaliw be sɔrɔ Zuda ni Isirayɛli mara masacɛw ka kitabu kɔnɔ.

¹² A ka masaya saan bi saba ni kɔnɔntɔnnan na, banajugu dɔ y'a minɛ a seen na. Hali k'a to o bana na, a ma dɛmɛ ɲini Masaba fɛ, fɔɔ furakɛlaw fɛ.

¹³ Aza sar'a ka masaya saan bi naani ni kelennan na.

¹⁴ A yɛrɛ tun ye kaburu min sogi Dawuda ka ciin kɔnɔ, u y'a suu don o kɔnɔ. U y'a la yɔrɔ dɔ la, tulu kasadiman ɲanaman sifa dɔw tun be min na. U y'o caaman jɛni k'a boɲa.