Lok 2nan 11 - ALA KA KUMA

¹ Orobowamu sera Zeruzalɛmu tuma min na, a ye Zuda kɔmɔgɔw ni Bɛnzamɛn taw lajɛn. U tun kɛra cɛfari waa kɛmɛ ni bi seegi (180 000) ye. A tun b'a fɛ ka taga Isirayɛli mara mɔgɔw kɛlɛ, ka mara nin minɛ ka kɛ Orobowamu ta ye tugu.

² Nga Masa Ala kuman'a ka mɔgɔ Semaya fɛ ko:

³ «A fɔ Zuda mara masacɛ, Solomani dencɛ Orobowamu, ani Isirayɛliden minw bɛɛ be Zuda ni Bɛnzamɛn maraw la ko:

⁴ Masaba ko: Aw man kan ka taga aw badenw kɛlɛ. Aw kelen kelen bɛɛ ka kɔsegi aw ka soo, bari koo nin bɔra ne lo la.» U ye Masaba ka kuma bato ka kɔsegi, u ma taga Zerobowamu kɛlɛ tugu.

Orobowamu be duguw lɔ

⁵ Orobowamu sigira Zeruzalɛmu, a ye Zuda mara dugu dɔw lalaga k'u sigi ka kɛ dugu barikamanw ye.

⁶ A ye Bɛtilehɛmu lalaga, ni Etamu, ni Tekowa,

⁷ ani Bɛtisuri ni Soko ni Adulamu,

⁸ ani Gati ni Maresa ni Zifu,

⁹ ani Adorayimu ni Lakisi ni Azeka,

¹⁰ ani Soreya ni Ayalɔn ani Eburɔn. Olu le kɛra dugu barikamanw ye Zuda ni Bɛnzamɛn mara la.

¹¹ A y'u laminikogow lalaga ka kɛlɛkuntigiw sigi yen, ani ka dumuni, ni tulu, ni duvɛn mara yen.

¹² A ye nigɛkunbɛnnanw ni tamanw bila o dugu nunu bɛɛ kɔnɔ, ka barika don u la kosɔbɛ. Zuda ni Bɛnzamɛn maraw tun ye a ta ye.

Orobowamu kɔmɔgɔw

¹³ Sarakalasebagaw ni Levi kɔmɔgɔ minw tun siginin be faan bɛɛ Isirayɛli mara la, olu wilila ka na to Orobowamu kɔrɔ.

¹⁴ Levi kɔmɔgɔw y'u ka dugukolow n'u ka soow to yen ka na Zeruzalɛmu dugu kɔnɔ, ani Zuda mara la, bari Zerobowamu n'a deenw tun y'u bali ka Masaba ka sarakalasebaara kɛ.

¹⁵ A y'a yɛrɛ ka sarakalasebagaw sigi sɔnnikɛyɔrɔw, ani joow kunna, a tun ye minw dilan bakɔrɔnin ni misiden jaa la.

¹⁶ Isirayɛliden minw bɛɛ tun b'a fɛ ka Masaba, Isirayɛli ka Ala ɲini, olu tugura Levi kɔmɔgɔw kɔ ka taga Zeruzalɛmu ka sarakaw bɔ Masaba u faaw ka Ala ye.

¹⁷ U ye barika don Zuda mara masaya la, ka Solomani dencɛ Orobowamu ka fanga sabati saan saba kɔnɔ, bari a tun be Dawuda ni Solomani ka sira le taama o waati la.

Orobowamu ka somɔgɔw

¹⁸ Orobowamu ye Dawuda dencɛ Yerimɔti denmuso Maalati furu. A bamuso tun ye Zese dencɛ Eliyabu denmuso Abiyayili ye.

¹⁹ Maalati ye dencɛw wolo a ye: Yewusi ni Semariya ani Zaamu.

²⁰ Ale kɔ, a ye Abisalɔn denmuso Maaka furu. Ale fana ye deenw wolo a ye: Abiya ni Atayi ani Ziza ni Selomiti.

²¹ Abisalɔn denmuso Maaka koo tun ka di Orobowamu ye ka tɛmɛ a ka muso tɔw n'a ka gɛrɛfɛmusow kan. Muso tan ni seegi ni gɛrɛfɛmuso bi wɔɔrɔ le tun b'a fɛ. A ye dencɛ mugan ni seegi sɔrɔ, ani denmuso bi wɔɔrɔ.

²² Orobowamu ye ɲafɛla di Maaka dencɛ Abiya ma, a ka kɛ a badenw ɲamɔgɔ ye, bari a tun b'a fɛ k'a sigi masaya la.

²³ A tun ye hakili sɔrɔ k'a deenw bɛɛ jɛnsɛn yɔrɔ dɔw la Zuda ni Bɛnzamɛn maraw kɔnɔ, ani dugu barikamanw bɛɛ kɔnɔ. A ye dumunifɛn caaman di u ma, ani ka muso caaman ɲini u ye fana.