Kor 2nan 5 - ALA KA KUMA

¹ An farikolo, min ye an nii ka soo ye dugukolo kan, o bena cɛn. Nga, an b'a lɔn ko Ala ye dɔ wɛrɛ labɛn an ye arijana na, min te cɛn abada, o ma dilan adamaden barika la.

² Sisan an be ŋunan, an b'a fɛ kosɔbɛ ka sankolo ta sɔrɔ,

³ n'an y'o sɔrɔ, an fari lakolon tena to yen.

⁴ Bari k'an to nii na, an be ŋunan. An dɛrɛnin lo, a ma kɛ ko an b'a fɛ ka sa dɔrɔn dɛ, nga an b'a fɛ ka farisogo sɔrɔ ka bɔ Ala fɛ fana waasa nii ka see sɔrɔ saya kan.

⁵ Ala le y'an labɛn o kosɔn, ale lo ye Nii Senuman d'an ma min b'a ka ɲumanya nata yira an na.

⁶ O le y'a to, jigi b'an fɛ tuma bɛɛ. An lanin b'a la ko k'an to farisogo la kɔni, an yɔrɔ ka jan Matigi la.

⁷ An be sɔn o koo bɛɛ la lanaya le barika la, nga an ɲaa ma la o kan.

⁸ Jigi b'an fɛ kosɔbɛ, a ka di an ye kosɔbɛ ka bɔ farisogo nin na, ka taga to Matigi gɛrɛfɛ yen.

⁹ O le y'a to an kɔni fɛ, an sara wo, an ma sa wo, min ka di an ye, o ye ka Matigi sago kɛ,

¹⁰ bari an bɛɛ ka kan ka lɔ Krista ɲakɔrɔ a k'an kiti, waasa mɔgɔ kelen kelen bɛɛ ye baara min kɛ k'u to diɲɛ na, a kɛra baaraɲuman ye wo, baarajugu lo wo, u k'o sara sɔrɔ.

Ala be bɛn n'an ye Krista barika la

¹¹ Matigi ɲasiran b'an dusu la minkɛ, o la, an be banba ka mɔgɔw dɛmɛ u k'a lɔn. Ala b'an lɔn kosɔbɛ, ne be miiri ko aw fana b'an lɔn ten.

¹² An t'an yɛrɛ koo fɔ aw ye tugu, nga an be cogoya le d'aw ma aw ka se k'aw yɛrɛ boɲa an kosɔn, waasa mɔgɔ minw b'u yɛrɛ boɲa fɛɛn yetaw kosɔn ka sɔrɔ foyi t'u kɔnɔ, aw ka se ka olu jaabi.

¹³ N'a kɛra ko an ta kɛra fatɔya ye, o kɛra Ala kosɔn, nga n'an ta te fatɔya ye, o kɛra aw kosɔn.

¹⁴ Bari Krista ka kanuya sera an kɔrɔ, an minw lar'a la ko ale kelen le sara bɛɛ kosɔn, o kɔrɔ ko bɛɛ fana sara.

¹⁵ A sara mɔgɔ bɛɛ le kosɔn, waasa mɔgɔ minw be nii na, olu kana taama u yɛrɛ sago la tugu, nga u k'o kɛ ale kosɔn, min sara ka kunun u ka nafa kosɔn.

¹⁶ O la, an te mɔgɔ si jati adamadenw ka jaticogo la tugu. Hali n'an tun ye Krista lɔn ten, sisan an t'a lɔn o cogo la tugu.

¹⁷ Ni mɔgɔ min jɛnna ni Krista ye, o tigi kɛra danfɛnkura ye. Kokɔrɔw bɛɛ tɛmɛna, kokuraw lo be yen.

¹⁸ O koo bɛɛ bɔra Ala fɛ, ale lo bɛnna n'an ye Krista barika la, ka tila k'o cɛlaben baara kalifa an ma,

¹⁹ bari a ma mɔgɔw ka hakɛ jati, a tun be cogoya ɲini ka bɛn n'u ye Krista barika la. A y'o kuma fɔko baara d'an ma.

²⁰ An kɛra Krista ka lasigidenw ye aw cɛma, a kɛra i n'a fɔ Ala yɛrɛ le b'aw wele an barika la. An b'aw daali Krista tɔgɔ kosɔn, ko aw ka sɔn ka bɛn ni Ala ye.

²¹ Krista min ma kojugu kɛ, Ala y'a kɛ a sigɛnna an ka hakɛ kosɔn waasa an ka kɛ mɔgɔtilenninw ye ale ɲakɔrɔ Krista barika la.