Kor 2nan 3 - ALA KA KUMA

Layidukura baarakɛla

¹ An bena an yɛrɛ koo fɔ aw ye tugu wa? Walima an mako be sɛbɛ dɔ la min b'an koo fɔ wa? Wala aw ta, i n'a fɔ mɔgɔ dɔw b'a kɛ cogo min na wa?

² Aw le y'an ka sɛbɛ ye. A sɛbɛnnin be an dusu la, mɔgɔ bɛɛ b'a ye, ani k'a lɔn.

³ Aw kɛra Krista ka bataki ye, o min cira an barika la. A m'a sɛbɛn ni sɛbɛnnikala ye, nga a sɛbɛnna Nitigi Ala ka Nii le barika la, a fana ma sɛbɛn walaka kabakurulaman kan, nga adamaden dusu la.

⁴ An y'o jigi sɔrɔ Krista barika la Ala ɲakɔrɔ.

⁵ An te miiri ko an sera ka fɛɛn minw kɛ, k'o bɔra an yɛrɛ la dɛ, o bɔra Ala le la.

⁶ Ale lo ye see d'an ma ka bɛnkura koo fɔ mɔgɔw ye, o te sariyako ye, nga Nii Senuman koo lo. Sariya be na ni saya ye, nga Nii Senuman be na ni nii ye.

⁷ Sariya min ka koo laban ye saya ye, o tun sɛbɛnna walaka kabakurulaman kan tuma min na, ni Ala ka nɔɔrɔ yera o waati la fɔɔ Isirayɛlidenw tun te se ka Musa ɲada filɛ, o nɔɔrɔ kosɔn min tun kɛra fɛɛn tɛmɛta ye,

⁸ min kɛra Nii Senuman ka baara ye, ale ka nɔɔrɔ man kan ka boɲa wa?

⁹ Baara min laban ye halakili ye, n'o ye boɲa sɔrɔ, baara min be mɔgɔw kɛ mɔgɔtilenninw ye, ale ka boɲa tena tɛmɛ o ta kan wa?

¹⁰ Fɛɛn min tun ye boɲa sɔrɔ, ale ka boɲa ma kɛ boɲa ye sisan ta ɲana, sisan ta ka barika boɲa kosɔn.

¹¹ Fɛɛn min tun kɛra fɛɛn tɛmɛta ye, n'ale ye boɲa sɔrɔ, fɛɛn min te tɛmɛ abada, ale ta ka bon.

¹² O jigi le b'an fɛ, o le y'a to an hakili siginin lo.

¹³ An t'a kɛ i n'a fɔ Musa tun b'a kɛ cogo min na, ale min tun be to ka fani biri a ɲada kan, waasa Isirayɛlidenw kana nɔɔrɔ tɛmɛta daan ye.

¹⁴ Nga u ma se ka foyi faamu, i n'a fɔ fani birinin be u ɲada kan. Hali ka na se bii yɛrɛ, n'u be bɛnkɔrɔ kalan tuma min na, u te foyi faamu, bari o fani nin be bɔ Krista le barika la.

¹⁵ Hali ka na se bii, n'u be Musa ka kitabu kalan, o fani nin b'u hakili kan.

¹⁶ Ni min sɔnna Matigi ma, fani nin be bɔ o tigi ɲada kan.

¹⁷ Matigi min koo be fɔra yan, o ye Nii Senuman ye. Matigi ka Nii Senuman be yɔrɔ min na, yɛrɛsɔrɔ le b'o yɔrɔ la.

¹⁸ An minw ka fani bɔra, an be Matigi ka nɔɔrɔ yira. O la, an be yɛlɛma ka kɛ i n'a fɔ ale, ka nɔɔrɔ sɔrɔ kosɔbɛ min be to ka boɲa tuma bɛɛ Matigi barika la, min ye Nii Senuman ye.