Kor 2nan 1 - ALA KA KUMA

Foli ani bataki taayɔrɔ

¹ Ne Pɔli min ye Yezu Krista ka ciden ye Ala sago la, n'an balimacɛ Timote, an be bataki nin ci aw Korɛntikaw ma minw lara Ala la, ani minw bɛɛ be Akayi mara la.

² An Faa Ala n'an Matigi Yezu Krista ka nɛɛma ni hɛrɛ kɛ aw ye.

Ala le b'an jigi tugu

³ Ne be Ala tanu, ale min ye an Matigi Yezu Krista Faa ye, makaritigi lo, ale lo be mɔgɔ bɛɛ jigi tugu.

⁴ Ale lo b'an jigi tugu an ka tɔɔrɔ bɛɛ la, waasa an fana ka se k'an tɔɲɔgɔnw jigi tugu an y'o min sɔrɔ Ala fɛ.

⁵ An be Krista ka tɔɔrɔ ɲɔgɔn caaman sɔrɔ cogo min na, o cogo kelen na fana, Krista b'an jigi tugu kosɔbɛ.

⁶ Ni tɔɔrɔ b'an sɔrɔ, o be kɛ waasa aw jigi ka tugu, ani ka se ka kisi. N'an jigi tugura, o be kɛ waasa aw jigi ka tugu ka se ka tɔɔrɔ muɲu an be tɔɔrɔ minw ɲɔgɔn na.

⁷ An jigi b'aw kan kosɔbɛ, bari an y'a lɔn ko n'an ye tɔɔrɔ sɔrɔ ɲɔgɔn fɛ, an fana bena jigitugu sɔrɔ ɲɔgɔn fɛ.

⁸ Tɔɔrɔ min y'an sɔrɔ Azi mara la, an t'a fɛ k'aw to o lɔnbaliya la. O tun digira an na fɔɔ ka se an barika daan ma, fɔɔ an yɛrɛ tun t'a miiri ko an bena to nii na.

⁹ Tiɲɛ na, an yɛrɛ tun y'a lɔn ko an bena sa wajibi. O le y'a to, an y'an jigi bɔ an yɛrɛ kan, k'a la Ala kan, ale min be suuw kunun.

¹⁰ Ale lo y'an kisi o sayajugu nin ma, a bena an kisi tugu. An jigi b'a kan, ko a bena an kisi halibi.

¹¹ Aw fana b'aw niyɔrɔ ta n'aw ka daalili ye anw ko koo la. O la, an bena o nɛɛma nin sɔrɔ mɔgɔ caaman ka Aladali sababu la, mɔgɔ caaman bena barika la Ala ye o kosɔn.

Pɔli b'a ka Korɛnti taga dabila fɔlɔ

¹² An ka kunkɔrɔta ye min ye: o ye an ka taamacogo ye, aw cɛma, ani yɔrɔ bɛɛ, an y'o min kɛ ni kɔnɔgwɛ ye Ala ɲasiran na. O ma kɛ adamaden ka lɔnniya sababu la, nga Ala ka nɛɛma nɔɔ lo.

¹³ An te koo si sɛbɛn k'o ci aw ma n'aw te se ka minw kalan ani k'o faamu. Ne lanin b'a la ko aw bena se k'an faamu kosɔbɛ.

¹⁴ Bari aw y'an ka koo faamu dɔɔni k'a lɔn ko an kɛra aw ka kunkɔrɔtafɛn ye, i n'a fɔ aw fana bena kɛ an ka kunkɔrɔtafɛn ye cogo min na an Matigi Yezu kɔsegilon na.

¹⁵ N lanin tun b'o la minkɛ, o la, ne tun b'a fɛ ka taga aw fɛ fɔlɔ, waasa aw ka se ka nisɔndiya tugu kosɔbɛ.

¹⁶ Ne tun b'a fɛ ka tɛmɛ aw fɛ fɔlɔ ka sɔrɔ ka taga Maseduwani mara la, ka bɔ Maseduwani ka na aw fɛ tugu, waasa aw ka se ka ne dɛmɛ ne ka taama la ka taga Zude mara la.

¹⁷ O tuma na, ne tun y'o koo latigɛ waati min na, ne tun m'o jati koba ye wa? Walima ne ka koo latigɛtaw ye adamaden ka miiriya dama ye, ni n be kaan fila fɔ wa? K'a fɔ ɔnhɔn ka tila k'a fɔ ayi.

¹⁸ Ala ye ne seere ye, an ye kuma min fɔ aw ye, o te ten.

¹⁹ Bari ne ni Silivɛn ani Timote, anw ye Ala Dencɛ Yezu Krista min ka kibaru fɔ aw ye, o te ɔnhɔn, ni ayi koo ye, nga o ye Ala ka tiɲɛ ye.

²⁰ Ala ka dadili bɛɛ kɛra tiɲɛ ye Yezu Krista barika la, o la fana, an b'a fɔ «amiina» ka boɲa la Ala tɔgɔ kan.

²¹ Ale Ala le be barika don anw ni aw la Krista sababu la. Ale fana le y'an woloma,

²² k'a ka taamasiɲɛ la an kan, ani ka Nii Senuman don an na min b'a ka ɲumanya nata yira an na.

²³ Ala le ye ne seere ye ni ne be galon tigɛra. Ne tun b'a fɛ k'aw kuun bɔ koo la le, o le y'a to, ne ma segi Korɛnti tugu.

²⁴ A ma kɛ ko anw b'a fɛ ka koo dɔ wajibiya aw kunna lanaya faan fɛ dɛ, nga an b'aw dɛmɛna le janko aw ka nisɔndiya, bari aw banbanin lo lanaya la.