Kititigɛbagaw 5 - ALA KA KUMA

Debora ka dɔnkili

¹ O loon yɛrɛ la, Debora ni Abinowamu dencɛ Baraki ye dɔnkili nin la ko:

² «Tuma min na Isirayɛlidenw be wili ka lɔ kelen kan kɛlɛ kama Masaba ɲakɔrɔ, jama k'a yira ko u labɛnnin be, Masaba ka tanu!

³ Masacɛw, aw ka mɛnni kɛ! Kuntigiw, aw k'aw tulow malɔ! Ne be dɔnkili la Masaba ye, ne b'a fɛ ka Masaba tanu, Isirayɛli ka Ala.

⁴ Masaba, e bɔra *Seyiri mara la tuma min na, e bɔra Edɔmu mara la tuma min na, dugukolo yɛrɛyɛrɛla, sankolo kɔnɔ ɲagamina, sanjiba benna.

⁵ Kuluw yɛrɛkɛra e Masaba ɲafɛ, e min ye Sinayi kulu ka Ala ye, kuluw yɛrɛkɛra e Masaba, Isirayɛli ka Ala ɲafɛ.

⁶ Anati dencɛ Samugari ka tile la, Yayɛli ka tile la, taamabagaw tun ye siraw bila, minw tun be taama sira kan, olu ye sira wɛrɛw ta.

⁷ Ne Debora wilila tuma min na, ka kɛ i ko denba, Isirayɛlidenw cɛma, kuntigi tun t'u fɛ, kuntigi tun te yen.

⁸ U tun tugura joow kɔ, kɛlɛ fana wilila, k'a sɔrɔ nigɛkunbɛnnan ni taman yɛrɛ ma sɔrɔ Isirayɛliden mɔgɔ waa bi naani fɛ.

⁹ Ne ka miiri be Isirayɛlidenw kuntigiw la, ni minw labɛnnin be kɛlɛ kama jama cɛma. Masaba ka tanu!

¹⁰ Aw minw be fali gwɛmanw kan, n'aw ka sigilan dilannin be ni fani ye, aw minw be taama sira kan, aw ye miiri!

¹¹ Dɔnkililabagaw kaan be bɔ begɛn minyɔrɔ la, u be Masaba ka baaraɲuman koo fɔ, u be Isirayɛlidenw ɲamɔgɔw ka baaraɲuman koo fɔ! O tuma lo Masaba ka jama tagara dugu dondaw la.

¹² Wili, wili ka bɔ sinɔgɔ la, Debora! Wili, wili ka dɔnkili dɔ la! Abinowamu dencɛ Baraki, wili k'i ka jɔɔnw minɛ.

¹³ O tuma na, jama tɔɔ jigira faamaw fɛ, Masaba ka jama jigira ni setigiw ye ne fɛ.

¹⁴ Efarayimu ɲamɔgɔw le sera amalɛkiw kɔrɔ, Bɛnzamɛn kɔmɔgɔw fana farala jama kan minw be tugura e kɔ. Makiri kɔmɔgɔw ɲamɔgɔw fana nana, ani Zabulɔn kɔmɔgɔw kuntigiw.

¹⁵ Isakari kɔmɔgɔw ɲamɔgɔw tora Debora fɛ, Isakari kɔmɔgɔw tora Baraki fɛ. U korila ka girin ka taga kɔkɛnɛ na seen na, Urubɛn kɔmɔgɔw tora k'u yɛrɛ ɲininga.

¹⁶ Mun na aw tora begɛnw layɔrɔ la ka to ka mɛnni kɛ o yɔrɔ mankan na? Urubɛn kɔmɔgɔw tora k'u yɛrɛ ɲininga.

¹⁷ Galaadikaw tora Zurudɛn baji kɔfɛ. Mun na Dan kɔmɔgɔw tora kurunw gɛrɛfɛ bada la? Asɛri kɔmɔgɔw sigira kɔgɔjida la, ka to kurunw lɔyɔrɔw la.

¹⁸ Nga Zabulɔn kɔmɔgɔw y'u nii saraka, Nɛfutali kɔmɔgɔw fana y'u ta saraka kɛlɛ yɔrɔw la.

¹⁹ Masacɛw nana, u ye kɛlɛ kɛ, Kanaankaw ka masacɛw ye kɛlɛ kɛ Tanaki dugu kɔnɔ Megido jii daa la, nga u ma se ka warigwɛ si ta.

²⁰ Ka lolow to sankolo la, olu ye kɛlɛ kɛ, k'o to sanfɛ, u ye Sizera kɛlɛ.

²¹ Kisɔn kɔɔ y'u ta, o kɔkɔrɔ nin ye Kisɔn ye. An ka taga ɲa ni jagwɛlɛya ye!

²² Soow seen mankan be bɔra, u be bolila, u be bolila dɛ!

²³ Masaba ka mɛlɛkɛ y'a fɔ ko: ‹Aw ye Merɔzi dugu danga, aw ye Merɔzikaw danga kosɔbɛ. Bari u ma sɔn ka na Masaba dɛmɛ, ka fara cɛfariw kan k'a dɛmɛ.›

²⁴ Ala ka barika don kenicɛ Ebɛri ka muso Yayɛli la musow cɛma. Muso minw be an fɛ, Ala ka barika don a la olu bɛɛ cɛma.

²⁵ Sizera ye jii daali a fɛ, a ye fɛɛnɛ d'a ma, a nan'a d'a ma mɔgɔbabaw ka filen kɔnɔ.

²⁶ A ye tutunan ta ni bolo kelen ye, ka baarakɛlaw ka marito ta n'a kinibolo ye. A ye Sizera bugɔ, k'a kuun ci, a y'a kuun sɔgɔ ka bɔ faan dɔ fɛ.

²⁷ A barika banna Yayɛli kɔrɔ, a benn'a kɔrɔ ka la tɛtɛtɛ. A barika bann'a kɔrɔ, a benn'a kɔrɔ, a barika banna, a fana sara o yɔrɔ kelen le la.

²⁸ Sizera bamuso ye filɛli kɛ fenɛtiri la, tɛmɛ be min na, n'a b'a kaan kɔrɔta k'a fɔ ko: ‹Mun na a ka wotoro mɛnna ka na ten? Mun na u te sera joona joona?›

²⁹ A ka baaraden musomanw cɛma, min ka ceku, ale y'a jaabi, a y'a yɛrɛ jaabi fana ko:

³⁰ ‹N'a sɔrɔ u b'u juguw bololafɛnw le cɛra, u b'o tilanna le cɔ! Sunguru kelen, walima fila ka di cɛfari kelen kelen bɛɛ ma. Fani ɲɛgɛɲɛgɛnin ka di Sizera ma. Fani kelen, fani fila kaan sɔgɔnin ka d'a ma.›

³¹ Masaba, i juguw bɛɛ ka halaki ten! E koo ka di mɔgɔ minw ye, olu ka kɛ i ko tile, a gwantuma papapa.» O kɔ, jamana nin tora hɛrɛ la saan bi naani kɔnɔ.