Kititigɛbagaw 3 - ALA KA KUMA

¹ Masaba tun ye siya nunu to yen janko Isirayɛliden minw bɛɛ tun ma Kanaan jamana kɛlɛ ye n'u ɲaa ye, ka olu kɔrɔbɔ n'o ye.

² Isirayɛliden minw tun wilila o waati la ni u tun ma kɛlɛ kɛ ka ye, janko olu ka kɛlɛ dege.

³ O siya nunu tun ye: filisiw ka ɲamɔgɔ duuru, ani kanaanw bɛɛ, ni Sidɔnkaw, ani ivi minw tun be Liban kulu yɔrɔ la, k'a ta Baalɛrɛmɔn kulu kan ka taga se Lebowamati ma.

⁴ O siya nunu kɛra Isirayɛlidenw kɔrɔbɔfɛnw ye, janko ka se k'a lɔn ni u bena sɔn ka Masaba ka sariyaw bato, a tun ye minw di u faaw ma Musa barika la.

⁵ Isirayɛlidenw tun siginin be kanaanw ni itiw, ani amoriw ni periziw, ani iviw ni zebuziw cɛma.

⁶ U tun y'o siya nunu denmusow furu, k'u yɛrɛ denmusow di u dencɛw ma fana, ani k'u ka joow sɔn.

Cɛfari Otiniyɛli ka koo

⁷ Isirayɛlidenw ye kojugu kɛ Masaba ɲakɔrɔ. U tun ɲinɛna ni Masaba u ka Ala ka koo ye, ka taga *Baali ni *Asitarite sɔn yɔrɔ caaman na.

⁸ O la, Masaba dimina u kɔrɔ kosɔbɛ. A y'u don Mezopotami masacɛ Kusaniriseyatayimu bolo. A kɛra ten, Isirayɛlidenw ye baara kɛ Kusaniriseyatayimu ye saan seegi kɔnɔ.

⁹ U kasira Masaba kɔ. Masaba y'a kɛ u bɔsibaga wilila u cɛma. Ale y'u bɔsi, o ye Kalɛbu dɔgɔcɛ Kenazi dencɛ Otiniyɛli ye.

¹⁰ Masaba ka Nii jigir'a kan. A kɛra cɛfari ye Isirayɛlidenw cɛma, a tagara kɛlɛ la. Masaba ye Mezopotami masacɛ Kusan Iriseyatayimu don a bolo, a fanga tɛmɛna ale ta kan.

¹¹ A kɛra ten, jamana nin tora hɛrɛ la saan bi naani kɔnɔ. O kɔ, Kenazi dencɛ Otiniyɛli sara.

Cɛfari Eyudi ka koo

¹² Isirayɛlidenw ye kojugu kɛ Masaba ɲakɔrɔ tugu. O la, Masaba ye barika don Mowabu masacɛ Egilɔn la u kama.

¹³ Egilɔn ye Amɔn siya ni amalɛkiw fara a yɛrɛ kan ka wili ka taga Isirayɛlidenw kama. U sera Isirayɛlidenw kɔrɔ. U ye Tamarosundugu minɛ.

¹⁴ O la, Isirayɛlidenw ye baara kɛ Mowabu masacɛ Egilɔn ye saan tan ni seegi.

¹⁵ Isirayɛlidenw kasira Masaba nɔɔ fɛ, Masaba y'a kɛ u bɔsibaga wilila u cɛma. O ye Bɛnzamɛn kɔmɔgɔ Gera dencɛ Eyudi ye. Ale tun ye numanbolotigi ye. Isirayɛlidenw y'a ci ni boɲafɛn ye Mowabu masacɛ Egilɔn fɛ.

¹⁶ O y'a sɔrɔ Eyudi tun ye murujan daa fila ɲini a yɛrɛ ye. Muru nin jaɲa tun be se mɛtɛrɛ tilancɛ ɲɔgɔn ma. A y'a siri a cɛɛ la a kinibolo la a ka faniw kɔrɔ.

¹⁷ A tagara boɲafɛn nin di Mowabu masacɛ Egilɔn ma. Egilɔn tun ye mɔgɔ ye farisogo be min fɛ kosɔbɛ.

¹⁸ A ye boɲafɛn nin di ka ban tuma min na, mɔgɔ minw tun y'a ta ka na n'a ye, Egilɔn ye sira di olu ma ko u ka taga.

¹⁹ Eyudi tagara lɔ sira kan kabakurubɔyɔrɔ la Giligali gɛrɛfɛ, ka segi ka na, k'a fɔ ko: «Masacɛ! Koo dɔ be ne fɛ k'o fɔ i ye dogo la.» O la, masacɛ ko mɔgɔw ka bɔ. Mɔgɔ minw bɛɛ tun be masacɛ gɛrɛfɛ, olu bɛɛ bɔra kɛnɛma.

²⁰ O kɔ, k'u to masacɛ ka lafiɲɛso kɔnɔ sanbon kan, Eyudi gwɛrɛl'a la ka kuma daminɛ k'a fɔ a ye ko Ala ko ale ka koo dɔ fɔ a ye. Egilɔn wilil'a ka sigilan kan ka lɔ.

²¹ Eyudi y'a numanbolo kɛ ka murujan sama k'a bɔ a gɛrɛn na a kinibolo faan fɛ k'a don Egilɔn kɔnɔbara la,

²² fɔɔ murujan nin kala bɛɛ donna, ka tunu a farisogo la. Eyudi tun ma se ka muru nin bɔ.

²³ A bɔra ka sangaso nin daaw tugu k'a sɔgɔ ka tɛmɛ ka taga.

²⁴ Eyudi bɔra ka ban tuma min na, masacɛ ka baarakɛlaw nana k'u b'a filɛ. U y'a ye ko sanbon daa sɔgɔnin lo. U y'a fɔ ko n'a sɔrɔ a donna ɲɛgɛn na.

²⁵ U ye kɔnɔni kɛ waatijan kɔnɔ. U y'a ye ko a te daa yɛlɛla minkɛ, u ye konden ta ka soo nin daa yɛlɛ, k'u kuntigi suu sɔrɔ duguma.

²⁶ Ka olu to kɔnɔni na, Eyudi banbana ka boli. A tagara tɛmɛ kabakurubɔyɔrɔ la, ka boli ka taga se Seyira mara la.

²⁷ A sera o yɔrɔ la dɔrɔn, a ye buru fiyɛ Efarayimu mara kuluyɔrɔ la. Isirayɛlidenw ye ɲɔgɔn lajɛn a fɛ, a bilara u ɲafɛ, u jigira ka bɔ kuluyɔrɔ la.

²⁸ A y'a fɔ u ye ko u ka tugu ale kɔ, ko Masaba y'u jugu mowabuw don u bolo. Mowabuw be to ka Zurudɛn baji tigɛ yɔrɔ minw na, u tugur'a kɔ ka jigi ka taga o yɔrɔw minɛ. U ma sɔn mɔgɔ si ka tɛmɛ.

²⁹ U ye mowabu minw faga o waati nin na, o sera mɔgɔ waa tan (10 000) ɲɔgɔn ma, u bɛɛ tun ye mɔgɔbabaw ye ani cɛɛ farimanw, u si ma se ka kisi.

³⁰ K'a ta o loon na, mowabuw tora Isirayɛlidenw ka fanga kɔrɔ. A kɛra ten, jamana nin tora hɛrɛ la saan bi seegi kɔnɔ.

Cɛfari Samugari ka koo

³¹ Eyudi tɛmɛnin kɔ, Anati dencɛ Samugari fana wilila. Ale ye filisiw kɛmɛ wɔɔrɔ faga ni misidɛndɛbere ye. Ale fana tun kɛra Isirayɛlidenw kisibaga ye.