Kititigɛbagaw 2 - ALA KA KUMA

Ala b'a ka jama jalakila

¹ Masaba ka mɛlɛkɛ bɔra Giligali ka na Bokimu, k'a fɔ ko: «Ne y'aw bɔ Ezipiti jamana na. Ne tun ye jamana min layidu ta aw faaw ye ko n ben'a di u ma, ne nana n'aw ye o kɔnɔ. Ne tun y'a fɔ ko ne tena n ka bɛɛn cɛn ni aw ye tugu.

² Ko aw man kan ka bɛɛn ni jamana nin kɔnɔ mɔgɔw ye, ko aw ka kan k'u ka sɔnnikɛyɔrɔw cɛn. Nga aw ma sɔn ka mɛnni kɛ ne fɛ. Mun na aw y'a kɛ ten?

³ Ayiwa, ne b'a fɔ ko n tena u gwɛn aw ɲafɛ tugu, u bena to aw gɛrɛfɛ, u ka joow bena kɛ i n'a fɔ jaan aw seen kɔrɔ.»

⁴ Masaba ka mɛlɛkɛ y'o kuma nunu fɔ ka ban tuma min na Isirayɛlidenw bɛɛ ye, u kasira kosɔbɛ.

⁵ O kɔ, u y'o yɔrɔ tɔgɔ la ko Bokimu, o kɔrɔ ko kasibagaw. U ye saraka bɔ Masaba ye.

Zozuwe ka saya

⁶ Zozuwe ye sira di jama ma, Isirayɛlidenw kelen kelen bɛɛ tagara u ka maraw la ka jamana nin minɛ k'a kɛ u yɛrɛ ta ye.

⁷ Jama tun be Masaba bato Zozuwe ka tile bɛɛ kɔnɔ, ani cɛkɔrɔba nunu ka tile bɛɛ kɔnɔ, minw tora Zozuwe kɔ, n'u tun ye Masaba ka kabako kɛnin bɛɛ ye, a ye minw kɛ Isirayɛlidenw ye.

⁸ Nun dencɛ Zozuwe, Masaba ka baarakɛla sara k'a sii to saan kɛmɛ ni tan.

⁹ Mara min tun ser'a ma tilanni kɛwaati la, u y'a suu don o yɔrɔ la Timunaterɛsi dugu kɔnɔ Efarayimu mara kuluyɔrɔ la, Gaasi kulu kɔgɔdugu ɲafan na.

¹⁰ O waati mɔgɔw bɛɛ sara. Mɔgɔ minw wilila olu kɔfɛ, olu tun te Masaba lɔn, a tun ye kabako minw kɛ Isirayɛlidenw ye, u tun ma o fana ye.

Jama be ban Ala la

¹¹ Isirayɛlidenw ye kojugu kɛ Masaba ɲakɔrɔ, u ye *Baali sɔn yɔrɔ caaman na.

¹² U ye Masaba, u faaw ka Ala bila, ale min tun y'u bɔ Ezipiti jamana na. Siya minw sigira k'u lamini, u tora ka olu ka joo dɔw sɔn, ka to k'u kunbiri gwan o ɲakɔrɔ. U y'a kɛ ten fɔɔ Masaba dimina u kɔrɔ.

¹³ U banna Masaba la ka to ka baali ni *Asitarite sɔn.

¹⁴ A kɛra ten, Masaba dimina u kɔrɔ k'u don mɔgɔjuguw bolo, olu y'u ka minanw cɛ. Masaba y'u don u juguw bolo minw tun be u lamini na. U tun te se ka lɔyɔrɔ sɔrɔ u ɲafɛ.

¹⁵ U tun mana taga kɛlɛ la yɔrɔ o yɔrɔ, Masaba bolo tun b'u kan ka kojugu kɛ u la, ka kɛɲɛ a ye min fɔ ka gwɛlɛya u ye. O kama, sigɛnba y'u sɔrɔ.

¹⁶ O kɔ, Masaba ye cɛfariw wili u cɛma, olu y'u bɔsi o mɔgɔjugu nunu bolo.

¹⁷ Nga u yɛrɛ ma sɔn ka mɛnni kɛ u ka cɛfariw fɛ, u tun tagara nɔrɔ joow la, ka to k'u kunbiri gwan u ɲafɛ. U faaw tun ye sira min ta, u y'o bila joona joona, u ma sɔn ka Masaba ka sariya bato i n'a fɔ u faaw y'a kɛ cogo min na.

¹⁸ Tuma o tuma Masaba tun be mɔgɔ woloma u cɛma k'o kɛ cɛfari ye, a tun be to n'o tigi ye a sii bɛɛ la k'u bɔsi u juguw bolo bari a tun be makari u la u ka kasi kosɔn u tɔɔrɔbagaw bolo, minw tun b'u sigɛnna.

¹⁹ Nga n'o cɛfari nin sara ka ban tuma min na, u be yɛlɛma k'u ka koo juguya tugu ka tɛmɛ u faaw ta kan, ka to ka joow sɔn k'u kunbiri gwan u ɲafɛ. U ma sɔn k'u ka taamajugu, n'u ka dusugwɛlɛyako dabila.

Ala be Isirayɛlidenw tɔɔrɔ

²⁰ O la, Masaba dimina Isirayɛlidenw kɔrɔ kosɔbɛ k'a fɔ ko: «Ne tun bɛnna ni siya nin faaw ye cogo min na, u y'o cɛn, u ma sɔn ka mɛnni kɛ ne fɛ.

²¹ O la, Zozuwe sara ka siya minw to yen, ne tena olu si gwɛn u ɲafɛ tugu.

²² Ne bena o siya nunu kɛ ka Isirayɛlidenw kɔrɔbɔ k'a filɛ yala u bena sɔn, walima u tena sɔn ka ne ka sira taama i n'a fɔ u faaw tun y'a kɛ cogo min na.»

²³ Masaba tun ma o siya nunu don Zozuwe bolo, a ye olu to hɛrɛ la, a ma u gwɛn joona.