Kititigɛbagaw 17 - ALA KA KUMA

Mika ka batolikɛyɔrɔ

¹ Cɛɛ dɔ tun be Efarayimu mara kuluyɔrɔ la, a tɔgɔ ko Mika.

² Loon dɔ, a y'a fɔ a bamuso ye ko: «E ka warigwɛ kuru waa kelen ni kɛmɛ min tun soɲana, n'i ye dangali kɛ u kosɔn ne yɛrɛ ɲana, u be ne fɛ, ne le tun y'u ta.» A bamuso y'a fɔ a ye ko: «Masaba ka barika don e la, n deen!»

³ A ye warigwɛ nin di a bamuso ma. O kɔ, a bamuso y'a fɔ a ye ko: «Ne ye warigwɛ nin di Masaba ma, janko e ka se ka wari nin ta k'a yelen k'a kɛ joo ye. O kama, ne b'a d'i ma.»

⁴ A ye warigwɛ nin di ka ban a bamuso ma, ale ye kuru kɛmɛ fila ta k'o di nigɛbaarala dɔ ma. Ale y'o kɛ joo ye. A y'a bila Mika ka soo kɔnɔ.

⁵ Mika nin tun ye soo dɔ lɔ k'o kɛ batolikɛyɔrɔ ye, ka joo dɔ, ni mɔgɔjaw dilan, k'a deen dɔ minɛ k'o kɛ murutigi ye.

⁶ O waati la, masacɛ tun te Isirayɛlidenw fɛ. Mɔgɔ kelen kelen bɛɛ tun b'a yɛrɛ sago kɛ.

⁷ O waati la fana, Levi kɔmɔgɔ dɔ ka bɔ Bɛtilehɛmu, Zuda kɔmɔgɔw ka mara la, ale tun nana sigi yen lonanya la.

⁸ O kanbelen nin wilila ka bɔ Bɛtilehɛmu k'a fɔ ko ale be taga sigiyɔrɔ ɲini. A ye sira ta ka taga se Efarayimu mara kuluyɔrɔ la Mika ka soo daa la.

⁹ Mika y'a ɲininga ko: «E bɔra min?» A y'a fɔ ko ale ye Levi kɔmɔgɔ ye ka bɔ Bɛtilehɛmu, Zuda mara la, ko ale be sigiyɔrɔ ɲinina.

¹⁰ Mika y'a fɔ a ye ko: «To ne fɛ, ka kɛ ne faa ni ne ka sarakalasebaga ye. Ne bena to ka warigwɛ kuru tan d'i ma saan o saan, ani i mako bena kɛ fani minw na. Ne bena janto i la.»

¹¹ Levi kɔmɔgɔ nin sɔnna ka to ni Mika ye. Mika y'a minɛ i n'a fɔ a deen dɔ.

¹² Mika ye Levi kɔmɔgɔ nin don baara la. Kanbelen nin tora ka sarakalasebaara kɛ Mika ye, ka to a ka soo kɔnɔ.

¹³ Mika y'a fɔ ko: «Sisan kɔni, ne y'a lɔn ko Masaba bena hɛrɛ kɛ ne ye, bari ne ye Levi kɔmɔgɔ sɔrɔ ka kɛ sarakalasebaga ye n fɛ.»