Kititigɛbagaw 14 - ALA KA KUMA

Samusɔn be filisi sunguru dɔ furu

¹ Loon dɔ, Samusɔn wilila ka taga Timuna. A ye sunguru dɔ ye filisiw fɛ.

² A kɔsegira tuma min na, a y'a fɔ a facɛ n'a bamuso ye ko: «Ne ye sunguru dɔ ye Timuna dugu kɔnɔ filisiw fɛ. Aw ka ta'a daali ka n'a di ne ma furu la.»

³ A facɛ n'a bamuso y'a fɔ a ye ko: «O tuma na, sunguru te i faden cɛma, walima an ka siya fɛ, n'i be wili ka taga sunguru ta filisi kɛnɛkɛnɛbaliw fɛ wa?» A y'a fɔ a facɛ ye ko a ka ta'a minɛ ka n'a di ale ma, bari a koo ka di ale ye.

⁴ A facɛ n'a bamuso tun m'a lɔn ko Masaba le tun b'a fɛ a ka kɛ ten. A tun be cogo le ɲinina ka kɛlɛ sɔrɔ ni filisiw ye. O tuma na, filisiw tun be Isirayɛlidenw kunna.

⁵ A tagara n'a facɛ n'a bamuso ye Timuna. K'o to sira kan, u sera *ɛrɛzɛnforow cɛma, minw ye Timunakaw ta ye, jarakanbelen dɔ bɔr'a kama n'a be sɔngɔra.

⁶ Masaba ka Nii donna Samusɔn na, a ye jara nin minɛ k'a faran i n'a fɔ baden. O y'a sɔrɔ foyi tun t'a bolo. A fana ma foyi fɔ a facɛ n'a bamuso ye.

⁷ U tagara kuma sunguru nin fɛ, a koo diyar'a ye.

⁸ Tile damani tɛmɛnin kɔ, a ko a be segi ka taga sunguru nin kɔɲɔya kɛ. A tagara faran ka don ko a be jara nin suu filɛ. A ye lii ye jara nin suu kɔnɔ ani lidenw.

⁹ A ye lii nin bɔ a bolo la ka to k'a dumu n'a be tagara. A ser'a facɛ n'a bamuso fɛ tuma min na, a ye olu sɔn, u y'a dumu. A m'a fɔ olu ye ko a y'a bɔ jara suu le kɔnɔ.

Samusɔn be talen la filisiw ye

¹⁰ Samusɔn facɛ tagara sunguru nin fɛ. Samusɔn tagara ɲanagwɛ dɔ sigi o yɔrɔ la, bari kanbelenw tun be deli k'o ɲɔgɔn kɛ.

¹¹ U y'a ye tuma min na, u ye mɔgɔ bi saba wele, olu tora n'a ye.

¹² Samusɔn y'a fɔ olu ye ko: «Ne bena talen la aw ye, n'aw y'a kɔrɔ fɔ ka sɔrɔ ɲanagwɛ tile wolonwula nunu ma ban, ne bena deleke ɲanaman bi saba ni fani wɛrɛ bi saba d'aw ma.

¹³ Nga n'aw ma se k'a kɔrɔ fɔ, aw le bena o deleke bi saba ni fani wɛrɛ bi saba di ne ma.» U y'a fɔ a ye ko a ka talen nin la, k'olu b'a lamɛnna.

¹⁴ A y'a fɔ u ye ko: «Dumunifɛn bɔra fɛndumubaga kɔnɔ, fɛɛn diman bɔra fɛɛn fariman kɔnɔ.» U ye tile saba kɛ, u ma se k'a kɔrɔ fɔ.

¹⁵ Tile wolonwulanan loon, u y'a fɔ Samusɔn ka muso ye ko: «Banba ka se i cɛɛ kɔrɔ dɛ, janko an ka talen nin kɔrɔ lɔn. N'o tɛ, an bena e n'i ka somɔgɔw jɛni. Aw y'an wele janko ka se k'an ka fɛɛnw bɔsi an na, o tɛ wa?»

¹⁶ Samusɔn ka muso kasira k'a fɔ a ye ko: «Ne koo man d'i ye, i te ne kanu! I ye talen la ne ka mɔgɔw ye, i yɛrɛ ma sɔn k'a kɔrɔ fɔ ne ye.» Samusɔn y'a jaabi ko: «Ne yɛrɛ m'a kɔrɔ fɔ n facɛ ni n bamuso ye wee, sankofɛrɛ n muso ye.»

¹⁷ A tora ka kasi Samusɔn kunna tile wolonwula nunu kɔnɔ ɲanagwɛ nin na. A tile wolonwulanan loon, Samusɔn dɛsɛra ka tila k'a kɔrɔ fɔ a ye. Bari a tun b'a nii tɔɔrɔla. Muso nin fana tagar'a kɔrɔ fɔ a ka mɔgɔ nunu ye.

¹⁸ Tile wolonwulanan loon, yanni tilekun ka don, dugu mɔgɔ nunu y'a fɔ Samusɔn ye ko: «Mun le ka di ka tɛmɛ lii kan? Fangatigi jumɛn le be yen ka tɛmɛ jara kan?» Samusɔn y'a fɔ u ye ko: «Ni aw tun ma ne ka misisunguru minɛ ka sɛnɛ kɛ n'a ye, aw tun tena talen nin kɔrɔ lɔn.»

¹⁹ Masaba ka Nii donna Samusɔn na. A wilila ka taga Asikalɔn, ka mɔgɔ bi saba faga ka olu ka faniw ta ka na o di talen nin kɔrɔfɔbagaw ma. A dimininba tagar'a faso la.

²⁰ O kɔ, u y'a ka muso nin minɛ k'a di a tɔɲɔgɔn dɔ ma min tun y'a teri ye.