Kɛwalew 9 - ALA KA KUMA

Sɔli be yɛlɛma ka kɛ Krista kɔmɔgɔ ye

¹ O y'a sɔrɔ Sɔli tun b'a la ka Matigi ka kalandenw bagabaga n'u ka fagako ye dɔrɔn. A tagara

² seereyasɛbɛ minɛ sarakalasebagaw kuntigiba fɛ loon dɔ, janko a ka taga bɔ zuwifuw ka kalansow kɔnɔ Damasi, waasa n'a tagara Matigi ka sira taamabaga minw sɔrɔ yen, cɛɛ fara musow kan, a k'u minɛ k'u siri ka na n'u ye Zeruzalɛmu.

³ K'a to sira kan, a surunyana Damasi la tuma min na, yeelenba dɔ bɔra sanfɛ ka n'a lamini.

⁴ A bɔra ka ben. Kumakan dɔ bɔra ko: «Sayuli, Sayuli, mun na i be ne tɔɔrɔla ten?»

⁵ A y'a jaabi ko: «E ye jɔn ye, Matigi?» Kumakan nin ko: «Ne Yezu lo i be min tɔɔrɔla.

⁶ Nga, wili ka don dugu kɔnɔ, i ka kan ka min kɛ, u bena o fɔ i ye.»

⁷ Sɔli taamaɲɔgɔn bɛɛ tun kirinna ka lɔ siranya fɛ. U tulo kɔni tun be kumakan nin na, nga u tun te mɔgɔ si yera.

⁸ Sɔli wilila ka bɔ duguma, a y'a ɲaa yɛlɛ, nga a tun te se ka yeli kɛ tugu. U y'a bolo minɛ le ka don n'a ye Damasi.

⁹ Sɔli ye tile saba kɛ fiɲɛntɔya la, a ma dumuni ani minni kɛ.

¹⁰ Kalanden dɔ tun be Damasi, a tɔgɔ ko Ananiyasi. Matigi y'a yɛrɛ yira ale la k'a fɔ a ye ko: «Ananiyasi!» A ko: «Naamu, Matigi.»

¹¹ Matigi ko: «U be sira min wele ko Siratilennin, i labɛn ka taga yen. N'i sera, i be cɛɛ dɔ koo ɲininga Zuda ka soo, a tɔgɔ ko Sɔli, Tarasika lo. A be Ala daalila nin waati la.

¹² K'a to o Ala daali nin na, a ye ele Ananiyasi ye. I donn'a ka soo k'i bolo la a kuun na, janko a ka yeli kɛ.»

¹³ Ananiyasi ye Matigi jaabi ko: «Matigi! O cɛɛ nin ye kojugu minw kɛ i ka mɔgɔw la Zeruzalɛmu, mɔgɔ caaman y'o lakali. Ne y'o mɛn.

¹⁴ A nana yan Damasi dugu kɔnɔ ni dalilu ye a bolo, a ye min sɔrɔ sarakalasebagaw kuntigiw fɛ. Mɔgɔ minw bɛɛ b'i tɔgɔ tanu, a ka olu minɛ ka jɔrɔkɔ don u la.»

¹⁵ Nga Matigi ko Ananiyasi ma: «Taga, bari ne ye cɛɛ nin woloma waasa a ka ne tɔgɔ fɔ siya wɛrɛw n'u ka masaw, ani Isirayɛlidenw ye, u ka ne lɔn.

¹⁶ A ka kan ka tɔɔrɔ minw bɛɛ kɛ ne kosɔn, ne yɛrɛ bena o bɛɛ yira a la.»

¹⁷ O la, Ananiyasi tagara, a sera soo nin kɔnɔ, a y'a bolo la Sɔli kuun na k'a fɔ a ye ko: «N balima Sɔli, Matigi Yezu min y'a yɛrɛ yira i la sira kan i natɔ yan, ale lo ye n ci i fɛ, waasa i ɲaa ka yɛlɛ, i ka fa Nii Senuman na.»

¹⁸ O yɔrɔnin kelen, fɛɛn dɔw bɔra Sɔli ɲadenw na ka benben, olu bɔnin tun be jigɛfaraw ma. A ye yeli kɛ, o yɔrɔnin bɛɛ, a sɔnna u y'a batize.

¹⁹ O kɔ, a ye dumuni kɛ, ka fanga sɔrɔ. A kɛra ten, Sɔli ye tile damani kɛ ni Damasi kalandenw ye.

Sɔli be Damasikaw waaju

²⁰ O yɔrɔnin bɛɛ, Sɔli y'a daminɛ ka mɔgɔw kalan kalansow kɔnɔ ko Yezu ye Ala Deen ye.

²¹ Mɔgɔ minw bɛɛ man'a lamɛn, u bɛɛ be kabakoya fɔɔ u be to ka ɲɔgɔn ɲininga ko: «Cɛɛ min be Yezu ka kalandenw tɔɔrɔ kosɔbɛ Zeruzalɛmu, ale tɛ wa? U ko a nana yan janko ka u dɔw minɛ ka siri ka taga u di sarakalasebagaw kuntigiw ma le!»

²² O n'a ta bɛɛ, Sɔli kɔni tun be barika sɔrɔla ka taga ɲa. A tun be waajuli kɛ ko Yezu ye Ala ka Mɔgɔ wolomanin ye fɔɔ ka Damasi zuwifuw dabari ban, u m'a lɔn u bena min fɔ a ye.

²³ Waatijan tɛmɛnin kɔ, Damasi zuwifuw ye Sɔli fagako laɲini.

²⁴ U tun be dugu bɔdaw bɛɛ kɔlɔsi suu ni tile, janko u ka se k'a faga. Nga o kuma nin bilara Sɔli tulo la.

²⁵ O la, loon dɔ sufɛ, a ka kalandenw y'a dogo sinsinba dɔ la k'a jigi ni juru ye dugu laminikogo fɛ.

Sɔli be segi Zeruzalɛmu

²⁶ Sɔli segira Zeruzalɛmu tuma min na, a tun b'a fɛ ka jɛn ni kalanden tɔw ye, nga olu bɛɛ tun be siran a ɲa, bari u ma la a la n'a kɛra kalanden ye sɔbɛ la.

²⁷ O la, Barinabasi ye Sɔli ladon cidenw fɛ k'a fɔ u ye ko Matigi tun y'a yɛrɛ yira Sɔli la Damasi sira kan, ka kuma a fɛ, ko a ye Matigi ka kokɛninw wango la yen ni hakilisigi ye.

²⁸ K'a ta o loon ma, Sɔli tora ka taga n'u ye Zeruzalɛmu faan bɛɛ ka to ka Matigi ka kibaru diman fɔ mɔgɔw ye ni hakilisigi ye.

²⁹ Zuwifu minw be girɛkikan fɔ, Sɔli tun be baro kɛ, ka sɔsɔli kɛ n'olu fana ye. Nga olu kɔni tun b'a fagayɔrɔ le ɲinina.

³⁰ Balimaw y'o kibaru mɛn, u bɔra n'a ye k'a bila sira Sezare. K'a to o yɔrɔ la, u y'a bila ka taga Tarisi.

³¹ O tuma na, Krista ka jama tun be hɛrɛ la Zude, ni Galile ani Samari mara nunu bɛɛ la. U ka lanaya tun be taga ɲa. U tun be Matigi boɲa. Nii Senuman barika la, u tun be caya ka taga.

Piyɛri be Ene kɛnɛya

³² O y'a sɔrɔ Piyɛri tun be jamana yɔrɔw bɛɛ yaala. O cogo la, Krista ka jama min be Lida, a tagara bɔ olu fɛ.

³³ A tagara cɛɛ dɔ sɔrɔ yen min tɔgɔ ko Ene. A tun murukunin lo ka la kabini saan seegi.

³⁴ Piyɛri y'a fɔ a ye ko: «Ene, Yezu Krista k'i kɛnɛya. Wili k'i ka dilan ta i yɛrɛ ma.» O yɔrɔnin bɛɛ, Ene wilila.

³⁵ Lidakaw, ani minw siginin be Sarɔn, u ye koo nin ye, u bɛɛ sɔnna Matigi ma.

Piyɛri be suu dɔ kunun

³⁶ Zope kalandenw cɛma, muso dɔ tun be yen, a tɔgɔ tun ko Tabita, girɛkikan na, u ko Dɔrɔkasi, o kɔrɔ ko sinɛ. Mɔgɔɲuman tun lo, ka fantanw dɛmɛ, o tun y'a ka baara ye.

³⁷ Waati dɔ la, a banana, nga bana ma kun a la. U y'a suu ko ka ban tuma min na, u y'a la sangaso dɔ kɔnɔ.

³⁸ Zope ni Lida man jan ɲɔgɔn na minkɛ, kalandenw y'a mɛn ko Piyɛri b'o yɔrɔ la. U ye mɔgɔ fila ci ka taga fɛ k'a daali ko a ka teliya ka na bɔ u fɛ Zope joona joona.

³⁹ O yɔrɔnin bɛɛ, Piyɛri tugura u kɔ ka taga. U sera tuma min na, u yɛlɛla ni Piyɛri ye sangaso kan. Dɔrɔkasi tun ye fani minw dan k'a to nii na, firiyamusow bɛɛ tun be to ka kasi n'u b'o yira Piyɛri la.

⁴⁰ Piyɛri ko mɔgɔw bɛɛ ka bɔ kɛnɛma. O kɔ, a y'a kunbiri gwan ka Ala daali. O kɔ, a y'a ɲaa yɛlɛma suu faan fɛ k'a fɔ ko: «Tabita, wili.» A y'a ɲaa yɛlɛ ka Piyɛri ye minkɛ, a wilila ka sigi.

⁴¹ Piyɛri y'a bolo minɛ k'a wili, a sɔrɔla ka Krista ka jama ni firiyamusow wele k'a yira u la.

⁴² Zopekaw bɛɛ ye kibaru nin mɛn, u caaman lara Matigi la.

⁴³ Piyɛri ye waatijan kɛ Zope, golobaarakɛla dɔ fɛ min tɔgɔ ko Simɔn.