Kɛwalew 28 - ALA KA KUMA

Pɔli be Pubiliyusi facɛ kɛnɛya Maliti

¹ An kisira faratiko nin ma k'an yɛrɛ sɔrɔ ale dugukolonin min kan, u y'a fɔ an ye ko a tɔgɔ ko Maliti.

² O yɔrɔ mɔgɔw y'an minɛ ka ɲa. U ye tasumaba mana an ye, bari sanji tun nana ka nɛnɛ kɛ.

³ Pɔli ko a be tasuma lalaga funteni kosɔn, fɔnfɔnni dɔ bɔra lɔgɔ la k'a cin a bolo la.

⁴ Dugulenw ye saa nin dulonnin ye Pɔli bolo la minkɛ, u tora k'a fɔ ɲɔgɔn ye ko cɛɛ nin be sɔrɔ mɔgɔfagala dɔ ye. Ko a kɔni ma se ka sa jii la, nga Ala ka kiti t'a fɛ a ka to nii na.

⁵ Nga Pɔli m'a lɔn ko koo kɛra yɛrɛ. A ye saa yuguyugu k'a fili tasuma na.

⁶ Olu kɔni tun be Pɔli bolo ka funu le kɔnɔna dɔrɔn, walima a ka ben ka sa. Nga u ye kɔnɔni kɛ fɔɔ ka mɛn, foyi ma kɛ Pɔli la minkɛ, u yɛlɛmana ka to k'a fɔ ko Pɔli ye batofɛn dɔ le ye.

⁷ Jamanatigi ka soo tun man jan o yɔrɔ nin na, ale ye anw ladon a ka soo ka ɲa, an ye tile saba kɛ yen. A tɔgɔ tun ko Pubiliyusi.

⁸ O y'a sɔrɔ a facɛ lanin tun lo tɔgɔtɔgɔni bolo. Pɔli tagara k'a bolo l'a kuun na, ka Ala daali a ye, a kɛnɛyara.

⁹ A laban, o mara banabagatɔw bɛɛ nana, u bɛɛ kɛnɛyara fana.

¹⁰ U y'an boɲa kosɔbɛ. An bɔwaati o yɔrɔ la, an mako tun be fɛɛn o fɛɛn na taama nin kosɔn, u y'an boɲa n'o bɛɛ ye.

Pɔli be don Ɔrɔmu

¹¹ Kalo saba le tun tɛmɛna an sɔrɔla ka bɔ Maliti. An ye Alɛkisandiri kurun dɔ le ta, joo tɔgɔ tun be min kan ko Filaninw. O kurun nin tun ye nɛnɛ tuma bɛɛ kɛ o yɔrɔ la.

¹² An sera Sirakuzi ka tile saba kɛ yen.

¹³ An bɔra o yɔrɔ la, an ma sɔn k'an yɔrɔ jaɲa baa dakun na, an sera Ereziyo. A dugusagwɛ, fɔɲɔ bɔra worodugu ɲafan fɛ k'an ɲɔti. Tile fila dɔrɔn, an sera Puzɔli,

¹⁴ ka taga balima dɔw sɔrɔ yen. Olu y'a ɲini an fɛ ko an ka lɔgɔkun kelen kɛ n'u ye. A kɛra cogo min na an sera Ɔrɔmu, o le ye nin ye.

¹⁵ Balima minw be Ɔrɔmu, olu tun y'an kibaru mɛn n'an ma se yen ban. U dɔw bɔra ka n'an kunbɛn fɔɔ Apiyusi lɔgɔfiyɛ la, dɔw nana an kunbɛn dugu dɔ la min tɔgɔ ko Lonan jigiyɔrɔ saba. Pɔli y'olu ye tuma min na, a ye barika la Ala ye, dɔ farala a ka jagwɛlɛya kan.

¹⁶ An sera Ɔrɔmu tuma min na, u sɔnna Pɔli ka boon ta a yɛrɛ ye. Sɔlidasi kelen tun b'a kɔlɔsi.

Pɔli be Ɔrɔmu zuwifuw waaju

¹⁷ Pɔli senin tile saba, a ye Ɔrɔmu zuwifu ɲamɔgɔw bɛɛ wele. U nana lajɛn tuma min na, a y'a fɔ u ye ko: «N balimaw, n ma koo kɛ an ka siya la, n ma koo kɛ min n'an ka sariya te bɛn. Nga u ye ne minɛ Zeruzalɛmu ka n don Ɔrɔmu faamaw bolo.

¹⁸ Faamaw ye n ka koo sɛgɛsɛgɛ k'a ye ko ne ma foyi kɛ min be n fagakun bɔ. U tun bena n bila.

¹⁹ Nga zuwifu nunu ma sɔn. N fana dɛsɛra, n ko n'o lo, fɔɔ Ɔrɔmu masacɛ le ka koo nin ɲanabɔ. N y'o fɔ, a ma kɛ i n'a fɔ ko n b'a fɛ ka n ka siya kuun don koo la, o tɛ!

²⁰ O le y'a to ne y'aw wele ka kuma n'aw ye. Isirayɛli jigi be min kan, o kama lo ne sirinin be ni jɔrɔkɔ ye.»

²¹ U y'a jaabi ko: «Zudekaw ma sɛbɛ foyi ci an ma i ka koo la. Balima minw bɔra o yɔrɔ la ka na, o si ma foyi fɔ an ye ko i ye koo dɔ kɛ.

²² Anw b'a ɲini e fɛ, e k'a bɛɛ ɲafɔ an ye. An kɔni b'a lɔn ko yɔrɔ bɛɛ mɔgɔw te sɔn e ka diina nin ma.»

²³ U bɛnna loon wɛrɛ la. O loon, zuwifu nunu nana caaman Pɔli ka soo. K'a ta sɔgɔma fɔɔ wulafɛ, Pɔli ye Ala ka masaya koo fɔ u ye. A jijanin tun be ka Yezu ka koo don u dusu la. O kama, a tun be Musa ka sariya ani kiraw ka kitabuw kɔnɔnakumaw ɲafɔ u ye.

²⁴ A ka kuma sera dɔw kɔrɔ. Nga dɔw ma l'a la.

²⁵ Olu ma bɛn u ni ɲɔgɔn cɛ. Sanni u ka faran, Pɔli ye kuma kelen fɔ ko: «Nii Senuman ye kira Ezayi ci ka na min fɔ aw faaw ye, o ye tiɲɛ ye kosɔbɛ. A tun y'a fɔ a ye ko:

²⁶ ‹Tag'a fɔ jama nin ye k'u bena u tulo malɔ, k'u tena foyi faamu, k'u bena filɛli kɛ kosɔbɛ, k'u tena foyi ye.

²⁷ Jama nin tulo ka gwɛlɛ. U y'u tulo datugu, k'u ɲaa tugu, waasa u kana yeli kɛ, u kana mɛnni kɛ, janko u kana faamuli kɛ. N'u tun y'a faamu, u tun bena u sɔɔn yɛlɛma. O la, ne Ala tun bena u kɛnɛya.›

²⁸ «Ayiwa, ne Pɔli b'a fɔ aw ye ko Ala ka kuma bena fɔ siya wɛrɛw le ye sisan. Olu ben'a lamɛn, ka kisi.» [

²⁹ Pɔli y'o fɔ ka ban tuma min na, zuwifuw tora ka ɲɔgɔn sɔsɔ kosɔbɛ n'u be tagara soo.]

³⁰ Pɔli tun ye boon min ta, a ye saan fila dafanin kɛ o kɔnɔ. Mɔgɔ o mɔgɔ tun be taga bɔ a fɛ, a tun b'u bɛɛ kunbɛn ka ɲa.

³¹ A tun be Ala ka masaya koo fɔ u ye, ka mɔgɔw kalan Matigi Yezu Krista ka koow la ni jagwɛlɛya ye, mɔgɔ si tun t'a bali.