Kɛwalew 27 - ALA KA KUMA

U be taga ni Pɔli ye Ɔrɔmu

¹ U y'a ŋaniya ta ko an ka kan ka taga Itali jamana na kurun kɔnɔ loon min na, u ye Pɔli ni kasoden damani don sɔlidasi ɲamɔgɔ Ziliyusi bolo. O sɔlidasikulu tɔgɔ tun ko Ogusiti.

² An donna Adaramisiyɔmu kurun dɔ kɔnɔ, ale tun be tagara Azi mara gɛrɛfɛ. Arisitaraki tun be n'an ye. Ale tun ye Tesalonika ye Maseduwani mara la.

³ A dugusagwɛ, an sera Sidɔn. Pɔli minɛcogo tun ka ɲi Ziliyusi fɛ. O la, a ye sira d'a ma ko a be se ka ta'a lɔnbagaw yɔrɔ filɛ dugu kɔnɔ, k'a makoyafɛn sɔrɔ u fɛ.

⁴ An bɔra o yɔrɔ la ka tɛmɛ Sipɔrɔ jamana kɔfɛ, min be kɔgɔji cɛma, bari fɔɲɔ tun b'an tɔɔrɔla.

⁵ An ye Silisi ni Panfili kɔgɔji cɛtigɛ ka taga se Mira, Lisi mara la.

⁶ Sɔlidasi ɲamɔgɔ nin ye Alɛkisandiri kurun dɔ sɔrɔ yen, min tun be tagara Itali jamana na. A y'an don o kɔnɔ.

⁷ An ye tile damani kɛ kurunboli la. An sigɛnna kosɔbɛ ka sɔrɔ ka se Sinidi gɛrɛfɛ. Fɔɲɔ tun b'an balila ka taga n'o sira ye minkɛ, an y'an ɲa sin Salimone faan fɛ ka taga tɛmɛ Kɛrɛti jamana kɔfɛ.

⁸ An m'an yɔrɔ jaɲa dugukolo la. An jijara fɔɔ ka se kurunlɔyɔrɔ dɔ la, min tɔgɔ ko Kurunlɔyɔrɔɲuman. O ni Lazaya man jan ɲɔgɔn na.

⁹ Waatijan tun tɛmɛna, kurunboli tun be kɛra faratiko ye fana. Bari suun donlon tun tɛmɛna ka ban. O la, Pɔli y'a fɔ u ye ko:

¹⁰ «N balimaw, ne y'a lɔn ko n'an tagara n'an ka taama ye ɲafɛ, farati bena sɔrɔ a la. Kurun n'a kɔnɔna minanw, hali an yɛrɛw nii bena se ka to a la.»

¹¹ Sɔlidasi ɲamɔgɔ nin bolo lanin tun be kurun bolila n'a tigi le kan. A ma Pɔli ka ladili jati.

¹² O kurunlɔyɔrɔ nin tun ma ɲi samiɲa tuma na minkɛ, u caaman y'a fɔ k'u ka bɔ yen ka banba n'u be se ka se Fenikisi. O kurunlɔyɔrɔ nin donyɔrɔ dɔ tun be sɔrɔ jamana nin kɔgɔdugu ɲafan ni tileben furancɛ la, dɔ tun be worodugu ɲafan ni tileben furancɛ la. O dugu nin tun ye Kɛrɛti jamana kurunlɔyɔrɔ dɔ ye. U ko n'an sera yen, ko an be samiɲa kɛ yen.

Fɔɲɔba be Pɔli nunu ka kurun ta

¹³ Fɔɲɔ diman dɔ daminɛna ka bɔ worodugu ɲafan fɛ. U y'a miiri k'olu ye min ŋaniya, k'o bena se ka kɛ. O la, u ye sira ta. U tun t'a fɛ u yɔrɔ be jaɲa Kɛrɛti dugukolo la kosɔbɛ.

¹⁴ Nga dɔɔni dɔrɔn, fɔɲɔba dɔ wilila an kama min tɔgɔ ko Erakilɔn.

¹⁵ A ye kurun ta. An tun te se ka kurun boli fɔɲɔ fɛ fewu. O la, an dɛsɛra k'a to fɔɲɔ ta ma.

¹⁶ An ni karama tɛmɛna dugukolonin dɔ kɔfɛ min tɔgɔ ko Koda. O kɛra sababu ye an sera ka kurundennin don kurunba kɔnɔ ni sigɛn ye k'a siri.

¹⁷ Kurun bolilaw y'a don ka ban tuma min na, u ye jurukisɛ kɛ ka kurun siri kosɔbɛ. U tun be siranna ko fɔɲɔ kana taga kurun halaki Libi jamana cɛncɛn na. O la, u ye kurun lalɔfɛn bila jii la, fɔɲɔ ka tɛmɛ n'an ye sisan.

¹⁸ O dugusagwɛ, fɔɲɔ ka tɔɔrɔ kosɔn, u y'a daminɛ ka kurun kɔnɔ minanw fili jii la.

¹⁹ A dugusagwɛ tugu, u ye kurun yɛrɛ minanw dɔw bɔ k'u fili jii la.

²⁰ An ye tile damani kɛ, an te tile ye, an te lolo ye. Fɔɲɔ fana tun b'a nɔkɔrɔ la. An tun ma la a la ko an bena kisi tugu.

²¹ Kurun kɔnɔ mɔgɔw bɛɛ tun be kɔngɔ la o mɛnna. O la, Pɔli wilila ka lɔ u cɛma k'a fɔ u ye ko: «N balimaw, ne tun y'a fɔ aw ye ko an ka to Kɛrɛti, n'aw tun sɔnna ne ta ma, an be faratiko ni bɔnɛ min na, o tun tena an sɔrɔ.

²² Nga aw bɛɛ k'aw jaa gwɛlɛya. Mɔgɔ si nii tena to a la, nga an bena bɔnɔ kurun le la,

²³ bari ne be baara kɛ n ka Ala min ye, ale ka mɛlɛkɛ dɔ y'a yɛrɛ yira ne la kunu sufɛ

²⁴ k'a fɔ n ye ko: ‹I kana siran Pɔli, wajibi lo fɔɔ i ka se Ɔrɔmu masacɛ fɛ k'i ka koow ɲafɔ a ye. Ayiwa, Ala ka ɲumanya kosɔn, a ko i sababu la, i taamaɲɔgɔn nunu si nii tena to jii la.›

²⁵ Ayiwa n balimaw, o tuma na, aw k'aw jaa gwɛlɛya. Ne lanin be Ala la, a y'a fɔ n ye cogo min na, a bena kɛ ten.

²⁶ Wajibi lo, an bena se dugukolo ma.»

An kisiko

²⁷ Fɔɲɔ y'an talontalon ka se Kɔgɔjiba la. A tile tan ni naaninan loon dugutilama, kurun bolilaw y'a jatiminɛ k'a ye ko an surunyanin be dugukolo dɔ la.

²⁸ O la, jii duɲa be suma ni fɛɛn min ye, u y'o bila jii la. U y'a ye ko jii duɲa te tɛmɛ mɛtɛrɛ bi saba ni wolonwula kan. U janfara dɔɔni, u y'a suma tugu, a duɲa tun ye mɛtɛrɛ mugan ni seegi ye.

²⁹ U siranna kosɔbɛ ko an ka kurun nin kana taga kabakuru dɔ susu. O la, u ye kurun lalɔfɛn naani siri a kɔfɛ k'olu bila jii la, ka to ka Ala daali ka dugugwɛ makɔnɔ.

³⁰ Kurun bolilaw ye kurundennin jigi jii la k'a kɛ i n'a fɔ u b'a fɛ ka lalɔfɛn dilan kurun ɲafɛ le, k'a sɔrɔ u tun be boliyɔrɔ le ɲinina.

³¹ O la, Pɔli y'a fɔ sɔlidasiw n'u ɲamɔgɔ ye ko: «Ni mɔgɔ nunu ma to kurun kɔnɔ, aw si tena kisi.»

³² Juru min tun kɛnin be ka kurun fila nunu siri ɲɔgɔn na, sɔlidasiw y'o tigɛ ka kurundennin to a tagara.

³³ Sanni dugu ka gwɛ, Pɔli y'a ɲini u fɛ ko bɛɛ ka dumuni kɛ. A k'u ma: «A tile tan ni naani filɛ nin ye aw bɛɛ hakili ɲagaminin lo, aw si te dumuni kɛra.

³⁴ O la, ne b'a ɲini aw fɛ, aw bɛɛ ka dumuni kɛ waasa mɔgɔ si kana sa. N b'a fɔ aw ye tugu ko kojugu tena mɔgɔ si sɔrɔ.»

³⁵ A y'o kuma fɔ ka ban minkɛ, a ye buru ta ka barika la Ala ye k'a karikari, k'a daminɛ k'a ɲimi.

³⁶ Tɔw jaa nana gwɛlɛya, u bɛɛ ye dumuni kɛ.

³⁷ An bɛɛ lajɛnnin tun ye mɔgɔ kɛmɛ fila ni bi wolonwula ni wɔɔrɔ ye.

³⁸ Bɛɛ fara tuma min na, u ye suman fili jii la waasa kurun ka fiɲɛya.

Pɔli nunu ka kurun be to jii la

³⁹ Dugu gwɛra tuma min na, kurun bolilaw ma dugukolo kɔlɔsi, nga olu ye jisira dɔ le ye ni cɛncɛn b'a daa la. U tun b'a fɛ ka taga lɔ o yɔrɔ la.

⁴⁰ Nigɛbaba minw be kurun lalɔ, u ye olu juruw tigɛ k'u to jii la. Lɔgɔ minw be kurun ɲatilen, u y'o juruw fana foni. O kɔ, u ye fani siri kurun ɲafɛla la waasa fɔɲɔ k'u ɲɔti ka se cɛncɛnyɔrɔ nin ma.

⁴¹ Nga kurun tagara bali jii kunbɛnyɔrɔ cɛncɛn dɔ la jii jukɔrɔ. Kurun ɲafɛla tununa o kɔnɔ fɔɔ a tun te se ka magamaga. Jii fanga y'a kɔfɛla halaki.

⁴² Sɔlidasiw tun y'a miiri ko kasoden nunu bena boli. O la, u tun b'a fɛ k'u bɛɛ faga.

⁴³ Nga sɔlidasi ɲamɔgɔ nin tun b'a fɛ ka Pɔli kunmabɔ minkɛ, a ma sɔn sɔlidasiw k'o kɛ. A ko minw be jii lɔn, k'olu ka kɔn ka jigi ka dugukolo sɛgɛrɛ.

⁴⁴ Ko tɔɔ nunu bena jija ni lɔgɔw ye, walima kurun lɔgɔ cininw. A kɛra ten u bɛɛ bɔra, foyi m'u si sɔrɔ.