Kɛwalew 26 - ALA KA KUMA

Pɔli b'a ka koo ɲafɔ Agiripa ye

¹ O tuma na, Agiripa y'a fɔ Pɔli ye ko kuma b'a bolo. Pɔli y'a bolo wili k'a fɔ ko:

² «Masa Agiripa, ne b'a fɔ ko ne dagamuna bari ne sera ka lɔ ele ɲafɛ bii ka n ka koow ɲafɔ i ye. Zuwifuw ye minw bɛɛ fɔ ka la ne kan, n bena o ɲafɔ i ye.

³ N dagamuna bari e b'an zuwifuw ka landaw bɛɛ lɔn, sɔsɔli minw b'an cɛ Alasira koo la, i b'o bɛɛ lɔn. O la, ne b'i daali e ka muɲu ka ne lamɛn.

⁴ «Ayiwa, zuwifuw bɛɛ be ne jogo lɔn kabini ne kanbelenman n ka siya cɛma, ani Zeruzalɛmu.

⁵ An ka Alasira la, *Fariziɲɛw le ka Alabatocogo ka gwɛlɛ. Olu yɛrɛ b'a lɔn a mɛnna ko ne tun ye Fariziɲɛŋana ye. U be se k'a fɔ ni tiɲɛ, walima galon lo.

⁶ Ala y'a daa di an faaw ma koo min na, ne jigi b'o kan minkɛ, o kama lo ne be kitira bii.

⁷ An ka siya bɛɛ jigi b'a kan ko Ala y'a daa di koo min na k'o bena kɛ. O kama u jijanin be ka to ka Ala bato suu fara tile kan. Masa Agiripa, jigi min be ne fɛ, o kama zuwifuw be ne jalakira.

⁸ Aw zuwifuw be se k'a fɔ cogo di ko Ala te se ka suuw kunun?

⁹ «Ne kɔni tun y'a miiri ko ne tun ka kan ka koo bɛɛ kɛ waasa Nazarɛtika Yezu tɔgɔ ka tunu.

¹⁰ Ne tun y'o baara daminɛ Zeruzalɛmu. Ne yɛrɛ tun ye mɔgɔ caaman minɛ k'u don kaso la, bari sarakalasebagaw kuntigiw tun y'o see di ne ma. O kasoden nunu fagako tun ka di ne ye fana.

¹¹ Tuma caaman, ne tun be taga u tɔɔrɔ kalansow kɔnɔ, ka caaman wajibiya u k'a fɔ k'u ma la Yezu la. Dimi kosɔn, n tun be taga hali dugu wɛrɛw la k'ale Yezu kɔmɔgɔw tɔɔrɔ.

¹² «Ne tun be tagara Damasi loon dɔ la. Sarakalasebagaw kuntigiw le tun y'o sira di n ma.

¹³ Masa Agiripa, ka ne to sira kan tilegwan fɛ, ne ye yeelenba dɔ bɔtɔ ye sanfɛ ka na ne ni n taamaɲɔgɔnw bɛɛ lamini. Yeelen nin tun ka bon ka tɛmɛ.

¹⁴ An bɛɛ benna. Ne ye kumakan dɔ mɛn eburukan na ko: ‹Sayuli, Sayuli, mun na i be ne tɔɔrɔla ten? I man'a kɛ cogo o cogo, i te se ka bɔsi ne la, i n'a fɔ misi te se ka bɔsi a tigi la cogo min na.›

¹⁵ Ne ye kumakan nin jaabi ko: ‹E ye jɔn ye, Matigi?› A ko: ‹Ne Yezu lo i be min tɔɔrɔla.

¹⁶ Nga, wili ka lɔ i seen kan. Ne ye n yɛrɛ yira e la waasa e ka kɛ ne ka baarakɛla ye, n ye koo min yira i la, i k'o lakali mɔgɔ tɔw ye, ani e bena min ye kɔfɛ fana, i k'o bɛɛ lakali.

¹⁷ Ne bena i kisi zuwifuw, ni siya wɛrɛw ma. Bari ne b'a fɛ k'i ci olu le fɛ,

¹⁸ k'u ɲaa yɛlɛ u ka dibidibikow dabila, k'u sama ka bɔ Sutana bolo k'u ɲasin Ala ma. N'u lara ne la, u ka hakɛw bena yafa, u bena sigiyɔrɔ sɔrɔ Ala ka mɔgɔw cɛma.›

¹⁹ «Ayiwa masa Agiripa, kabini o waati, yelifɛn min yirala ne la ka bɔ sankolo la, ne ma se k'o sɔsɔ.

²⁰ Ne y'a daminɛ ka Damasikaw waaju fɔlɔ, ani Zeruzalɛmukaw, ka Zude mara bɛɛ waaju, ani siya wɛrɛw. N y'u waaju k'a fɔ u ye k'u ka kan ka nimisa ka faran u ka kojuguw la ka segi Ala ma, ka kɛwaliɲumanw kɛ minw b'a yira k'u nimisara ka faran u ka kojugu la.

²¹ O kama lo zuwifu dɔw nana n sɔrɔ Alabatosoba kɔnɔ ka n minɛ, u tun b'a fɛ ka n faga.

²² Nga Ala ka dɛmɛ sababu la, halibi ne be yen, ka se ka tiɲɛ fɔ setigiw ni fantanw ye. Kiraw ni Musa nunu tun y'a fɔ ko min bena kɛ, ne ma dɔ fɔ ka tɛmɛ olu ta kan.

²³ U ko Ala ka Mɔgɔ wolomanin bena tɔɔrɔ ka sa, ko ale lo bena kɛ suu fɔlɔ ye ka kunun ka an zuwifuw ka siya, ani siya tɔw kisi.»

Pɔli b'a fɛ Agiripa ka la Yezu la

²⁴ Ka Pɔli to a ka kuma ɲafɔ la, Fɛsitusi pɛrɛnna a kan ko: «E kuun te yen wa? I ye kalan kɛ fɔɔ ka taga kɛ fatɔ ye kɛ!»

²⁵ Pɔli y'a jaabi ko: «Kɔrɔ Fɛsitusi, faa te n na. N be kuma minw fɔra, tiɲɛkumaw lo. Fatɔkumaw tɛ.

²⁶ Ne b'o koow fɔra masa min ye, a b'o lɔn, hali a kelen ma dogo a ma, n lanin b'o la. Bari o koow ma kɛ yɔrɔdogonin na.

²⁷ Masa Agiripa, e lanin be kiraw ka kuma fɔninw na wa? Ne y'a lɔn ko i lanin b'u la.»

²⁸ Agiripa ko a ma: «A tora dɔɔni i be ne kɛ Krista ka mɔgɔ ye.»

²⁹ Pɔli y'a jaabi ko: «A kɛra waatisurun ye wo, a kɛra waatijan ye wo, ne kɔni b'a ɲini Ala fɛ, a kana dan e kelen ma, nga minw bɛɛ be ne lamɛnna bii, ko ne be cogo min na ten, aw bɛɛ ka kɛ ten. Nga jɔrɔkɔ kana kɛ aw la.»

³⁰ Masacɛ wilila, ani lasigiden, ni Berenisi ani mɔgɔ minw bɛɛ tun siginin be ni olu ye.

³¹ U tagara kɔfɛ ka to k'a fɔ ɲɔgɔn ye ko: «Cɛɛ nin ma foyi kɛ min b'a fagakun bɔ, walima k'a don kaso la.»

³² Agiripa y'a fɔ Fɛsitusi ye ko: «Cɛɛ nin ko Ɔrɔmu masacɛ niin ka don koo nin na minkɛ, o lo. N'o tɛ, a ka kan ka bila.»