Kɛwalew 25 - ALA KA KUMA

Zuwifuw ni Pɔli be ɲɔgɔn na tugu

¹ Fɛsitusi sigira lasigidenya la Sezare. Tile saba a senin kɔ, a tagara bɔ Zeruzalɛmu.

² Sarakalasebagaw kuntigiw ni zuwifuw ka mɔgɔbabaw tagar'a ye Pɔli ka koo la. U y'a daali kosɔbɛ

³ ko a ka sabali ka Pɔli bila ka na Zeruzalɛmu. K'a sɔrɔ u y'o dabari nin siri waasa ka se ka Pɔli faga sira kan.

⁴ Nga Fɛsitusi y'a fɔ u ye ko Pɔli be kaso la Sezare, ko hali n'o tɛ, ko ale yɛrɛ tena mɛn u fɛ.

⁵ Ko n'u ka ɲamɔgɔ dɔw b'a fɛ, k'u ka tugu ale kɔ ka taga Pɔli jalaki yen.

⁶ Fɛsitusi ma mɛn u fɛ ka tɛmɛ tile seegi, walima tile tan kan. A segira loon min na, o dugusagwɛ bɛɛ, a sigir'a ka kititigɛyɔrɔ la k'u ka na ni Pɔli ye.

⁷ A nana tuma min na, zuwifu minw bɔra Zeruzalɛmu, olu wilila a kama ka to ka kumajugujuguw fɔ ka l'a kan. Nga dalilu si tun te u bolo min b'a yira k'u ka fɔta ye tiɲɛ ye.

⁸ Pɔli ye kuma ta k'a yɛrɛ ka koo fɔ ka gwɛ ko: «Ne ma fili zuwifuw ka sariya ma, n ma fili Alabatosoba ma, n ma fili Ɔrɔmu masacɛ fana ma.»

⁹ Fɛsitusi tun b'a fɛ zuwifuw k'ale tɔgɔɲuman fɔ minkɛ, o la, a y'a fɔ Pɔli ye ko: «I b'a fɛ an ka taga n'i ye Zeruzalɛmu u k'i kiti yen ne yɛrɛ ɲana wa?»

¹⁰ Pɔli y'a jaabi ko: «Ne minɛnin lo ka lɔ Ɔrɔmu masacɛ ka kititigɛyɔrɔ la. Ne ka koow ka kan ka ɲanabɔ yen le. Ne ma kojugu si kɛ zuwifuw la, e yɛrɛ b'o lɔn.

¹¹ N'o y'a sɔrɔ ne ye koo dɔ kɛ min be ne fagakun bɔ, ne ma ban o saya ma. Nga nunu be minw fɔra ka la n kan, ni tiɲɛ t'a si la, mɔgɔ si te se ka n saraka u ma. Ne b'a fɛ Ɔrɔmu masacɛ yɛrɛ le ka ne kiti sisan.»

¹² Fɛsitusi n'a ka dakɔrɔsigiw ye ɲɔgɔn ye. O kɔ, a ye Pɔli jaabi ko: «I m'a fɔ ko i b'a fɛ Ɔrɔmu masacɛ le ka i kiti wa? An bena taga n'i ye a fɛ.»

Fɛsitusi be Pɔli ka koo ɲafɔ Agiripa ye

¹³ Tile damani tɛmɛnin kɔ, masacɛ Agiripa n'a dɔgɔmuso Berenisi nana Sezare ka Fɛsitusi fo.

¹⁴ U tun bena tile damani kɛ yen minkɛ, Fɛsitusi ye Pɔli ka koo lakali a ye ko: «Felikisi tagara ka kasoden dɔ to yen.

¹⁵ Ne tun tagara tile fila kɛ Zeruzalɛmu tuma min na, sarakalasebagaw kuntigiw, ni zuwifuw ka cɛkɔrɔbaw nan'a ɲini ne fɛ ko fɔɔ kasoden nin ka faga.

¹⁶ Nga ne y'u jaabi ko Ɔrɔmukaw ka landa la, kiti le be kɛ fɔlɔ, kasoden ɲaa ye, a jalakibagaw ɲaa ye. Sira be di kasoden ma k'a jalakibagaw ka kuma jaabi. N'o ma kɛ, Ɔrɔmukaw te sira di ko mɔgɔjalakinin ka faga.

¹⁷ U dɔw tun nana ni ne ye yan. Ne fana m'a koo bila ka suma, n nanin dugusagwɛ bɛɛ, n sigira n ka kititigɛ sigilan kan, k'a fɔ k'u ka na ni cɛɛ ye an be kiti daminɛ.

¹⁸ Ayiwa, ne tun y'a miiri ko a bena kɛ cogo min na, a ma kɛ ten. A jalakibagaw ma se k'a ben ni kuma si ye.

¹⁹ A jalakikun tun y'u yɛrɛ ka Alasirako le ye. Ko Yezu tɔgɔla dɔ koo lo. U ko a sara, nga Pɔli ko a be nii na.

²⁰ Ne ma kuun ye koo nin na kosɔbɛ minkɛ, ne ye Pɔli ɲininga ko a be sɔn ka taga u be koo nin kiti tigɛ Zeruzalɛmu wa.

²¹ Nga Pɔli banna o la, a ko ale b'a fɛ Ɔrɔmu masacɛ le k'ale ka koo ɲanabɔ. O le y'a to n k'u k'a mara kaso la, n be cogoya ɲini k'a sama masacɛ ma.»

²² Agiripa y'a fɔ Fɛsitusi ye o tuma na ko: «Ne b'a fɛ k'o cɛɛ nin lamɛn.» Fɛsitusi y'a jaabi ko: «I ben'a lamɛn sini yɛrɛ.»

²³ A dugusagwɛ, Agiripa ni Berenisi nana don ɲɔgɔnkunbɛnyɔrɔ la mɔgɔbaya la. Sɔlidasi kuntigiw ni dugu ɲamɔgɔw tun y'u bila sira. Fɛsitusi y'a fɔ k'u ka na ni Pɔli ye. U nana n'a ye.

²⁴ O kɔ, Fɛsitusi ye kuma ta ko: «Masa Agiripa, ani aw minw bɛɛ be yan, aw ye hakɛ to. Zuwifuw bɛɛ lajɛnnin tun nana ne fɛ Zeruzalɛmu, ani yan fana, ka muruti ko cɛɛ min lɔnin ye aw ɲafɛ, ko a man kan ka to nii na.

²⁵ Ne kɔni fɛ, ne ma fɛɛn ye, a ye min kɛ n'o b'a fagakun bɔ. Nga a tun y'a fɔ ko ale b'a fɛ Ɔrɔmu masacɛ le k'ale kiti. O la, n fana ko n ben'a sama ka taga yen.

²⁶ Ayiwa, ne ben'a ka koo kuun ɲafɔ cogo min na masacɛ ye sɛbɛ kɔnɔ, ne m'o lɔn. O kama, ne nana n'a ye aw cɛma, waasa ele masa Agiripa k'a lamɛn ka dɔ lɔn a ka koo la, janko n ka se ka sɛbɛ nin ci.

²⁷ N'o tɛ, n y'a ye ko ka kasoden sama ten n'i m'a jalakikun fɔ ka l'a kan, o ma daga.»