Kɛwalew 23 - ALA KA KUMA

¹ Pɔli lɔra ka kititigɛla nunu filɛ k'a fɔ ko: «N balimaw, ne ye n ka kɛtaw bɛɛ kɛ ni kɔnɔgwɛ ye Ala ɲana fɔɔ ka na se bii ma.»

² Sarakalasebagaw kuntigiba Ananiyasi y'a fɔ ko Pɔli gɛrɛfɛmɔgɔw k'a daa gosi. Pɔli y'a fɔ a ye ko:

³ «E kogogwɛ nin, Ala le bena e fana gosi! I be sigi yan ko i be ne kiti ka kɛɲɛ ni sariya ye, k'a fɔ ko u ka ne gosi, o do ma fɔ sariya la.»

⁴ A gɛrɛfɛmɔgɔw y'a fɔ a ye ko: «I be Ala ka sarakalasebagaw kuntigiba le nɛni wa?»

⁵ Pɔli ye olu jaabi ko: «N balimaw, ne m'a lɔn ko sarakalasebagaw kuntigiba lo. Bari a fɔra Ala ka kuma na, ko i man kan k'i ka siya ɲamɔgɔ nɛni.»

⁶ Ayiwa, Pɔli y'a lɔn ko kititigɛlaw faan kelen ye *Saduseɲɛw ye, faan dɔ ye *Fariziɲɛw ye minkɛ, a pɛrɛnna ko: «N balimaw, ne faa ye Fariziɲɛ ye, ne yɛrɛ ye Fariziɲɛ ye. An jigi be suuw kununko min na, o jigi nin kama u ye ne minɛ.»

⁷ Pɔli y'o kuma nin fɔ tuma min na, mankan wilila Fariziɲɛ ni Saduseɲɛw cɛ. Jama tilanna fila ye.

⁸ Saduseɲɛw kɔni ko suuw tena kunun, ko mɛlɛkɛ te yen, ko jina koo ye galon ye fana. Nga Fariziɲɛw lanin b'o bɛɛ la.

⁹ Mankan nin boɲana haali. Sariya karamɔgɔ minw tun ye Fariziɲɛw ye, olu dɔw wilila k'a fɔ ko: «An ma jalakiyɔrɔ si ye cɛɛ nin na, n'a sɔrɔ jina, walima mɛlɛkɛ dɔ le kumana a fɛ.»

¹⁰ Mankan nin boɲana fɔɔ sɔlidasi kuntigi siranna ko mɔgɔ nunu bena Pɔli halaki, a ko a ka sɔlidasiw ka Pɔli minɛ ka taga n'a ye u ka yɔrɔ barikaman na.

¹¹ Suu nana ko, Matigi y'a yɛrɛ yira Pɔli la k'a fɔ a ye ko: «I jaa gwɛlɛya, i ye ne koo fɔ Zeruzalɛmukaw ye ka ban, fɔɔ i ka taga ne koo fɔ Ɔrɔmukaw ye fana.»

Zuwifuw b'a fɛ ka Pɔli faga

¹² Dugu gwɛra tuma min na, zuwifu dɔw bɛnna Pɔli fagako la. U kalila k'u tena dumuni kɛ, k'u tena minni kɛ n'u ma Pɔli sɔrɔ k'a faga.

¹³ Mɔgɔ minw bɛnna o la, u tun ka ca ni mɔgɔ bi naani ye.

¹⁴ U tagar'a fɔ sarakalasebagaw kuntigiw, ni cɛkɔrɔbaw ye ko: «An ye dajuru ta ko n'an ma Pɔli sɔrɔ k'a faga, an tena dumuni kɛ abada.

¹⁵ O la do, aw ye bɛn ni kititigɛla tɔw ye, k'a ɲini sɔlidasi kuntigi fɛ ko a ka Pɔli sama aw ma waasa aw k'a ka koo jatiminɛ kosɔbɛ. Anw bena labɛn k'a faga sira la n'a ma se aw fɛ.»

¹⁶ Pɔli belenden y'o kuma nin mɛn, a tagara kan kɔnɔ ka Pɔli lasɔmi.

¹⁷ O la, Pɔli ye sɔlidasiw ɲamɔgɔ dɔ wele k'a fɔ o ye ko a ka kanbelen nin bila sira sɔlidasi kuntigi fɛ, ko kuma b'a fɛ k'a fɔ a ye.

¹⁸ Sɔlidasi nin ye kanbelen nin bila sira u ka kuntigi fɛ k'a fɔ a ye ko: «Kasoden Pɔli y'a ɲini n fɛ ko n ka kanbelen nin bila sira i fɛ, ko kuma b'a fɛ k'a fɔ i ye.»

¹⁹ Sɔlidasi kuntigi ye kanbelen nin bolo minɛ ka bɔ n'a ye kɔfɛ k'a ɲininga ko: «Mun b'i fɛ k'a fɔ n ye?»

²⁰ Kanbelen nin y'a jaabi ko: «Zuwifuw bɛnn'a la k'u bena Pɔli daali e fɛ sini, janko kititigɛlaw ka se k'a ka koo jatiminɛ kosɔbɛ.

²¹ Kana sɔn k'a d'u ma, bari mɔgɔ bi naani ni kɔ labɛnnin lo waasa k'a faga sira kan. U kalila k'u tena dumuni kɛ, k'u tena minni kɛ n'u ma Pɔli sɔrɔ k'a faga. Olu kɔni y'u ka ŋaniya bɛɛ ta ka ban, u be ele lo kɔnɔna.»

²² Sɔlidasi kuntigi y'a fɔ kanbelen ye ko: «Kan'a fɔ mɔgɔ si ye ko i ye koo nin lakali ne ye dɛ!» O kɔ, a ye sira d'a ma ko a ka taga.

Sɔlidasi kuntigi be Pɔli bila ka taga Sezare

²³ O tuma na, sɔlidasi kuntigi y'a ka sɔlidasiw ɲamɔgɔ fila wele k'a fɔ u ye ko: «Aw ye sɔlidasi kɛmɛ fila, ni sobolila bi wolonwula, ani tamantigi kɛmɛ fila labɛn. Surafana dumuni kɔ, n bena aw ci Sezare.

²⁴ Aw ye soo dɔw labɛn fana k'u kɛ Pɔli ka yɛlɛtaw ye, k'a bila sira ka taga don masacɛ ka lasigiden Felikisi bolo Sezare, foyi kan'a sɔrɔ.»

²⁵ A ye bataki sɛbɛn k'a don u bolo. A y'a fɔ o kɔnɔ ko:

²⁶ «Ne Kulodi Liziyasi be sɛbɛ nin ci ele kɔrɔ Felikisi ma. E min ye masacɛ ka lasigiden ye, n b'i fo.

²⁷ Zuwifuw tun ye cɛɛ nin minɛ, u tun b'a fɛ k'a faga, ne nan'a mɛn ko Ɔrɔmuka lo, ne ni n ka sɔlidasiw sera k'a bɔsi u bolo.

²⁸ N tun b'a fɛ k'a minɛkun lɔn u fɛ minkɛ, n y'a ɲini u ka kititigɛlaw fɛ k'u k'a kiti.

²⁹ Ayiwa, n y'a faamu o seen fɛ, ko a minɛkun ye olu yɛrɛ ka landakow ye, o do t'a fagakun bɔ, a te se ka kɛ kasoden ye fana.

³⁰ U nana n lasɔmi ko zuwifu nunu b'a fɛ halibi k'a faga dogo la. O kama, ne y'a sama i ma teliya la k'a yira a jalakibagaw la ko n'u mako b'a la, u ka taga i fɛ.»

³¹ Sɔlidasi nunu kuntigi y'u ladi cogo min na, u y'a kɛ ten. Sufɛ, u tagara ni Pɔli ye Antipatirisi.

³² O dugusagwɛ, sɔlidasi minw tun be seen na, olu kɔsegira kan kɔnɔ, sotigiw tagara ni Pɔli ye Sezare.

³³ U sera yen dɔrɔn, u ye sɛbɛ nin di lasigiden ma ka Pɔli fana yira a la.

³⁴ A ye sɛbɛ nin kalan ka ban tuma min na, a ye Pɔli ɲininga ko a be bɔ mara jumɛn na. Pɔli ko ale be bɔ Silisi mara la minkɛ,

³⁵ lasigiden ko: «Ayiwa, n'i jalakibagaw nana tuma min na, n bena mɛnni kɛ i fɛ.» *Erɔdi tun ye masaso min lɔ yen, a k'u ka taga Pɔli mara o kɔnɔ.