Kɛwalew 14 - ALA KA KUMA

Pɔli ni Barinabasi taako Ikoniyɔmu

¹ Pɔli ni Barinabasi sera Ikoniyɔmu, u donna zuwifuw ka kalanso kɔnɔ fana ka mɔgɔw waaju, fɔɔ zuwifuw ni siya wɛrɛw caaman lara Yezu la.

² Nga zuwifu minw tun ma la a la, olu ye siya wɛrɛw kɔnɔnasu k'u bila balimaw la.

³ O le y'a to Pɔli ni Barinabasi ye dɔ fara u ka lafilabɔ kan yen. U jigi tun be Matigi kan. A tun be see d'u ma ka kabako ni taamasiɲɛw kɛ k'a yira k'u ka waajuli ye tiɲɛ ye, o ye a ka nɛɛma koo ye.

⁴ Dugu mɔgɔw tilanna, dɔw tugura zuwifuw kɔ, dɔw tugura cidenw kɔ.

⁵ Zuwifuw ni siya wɛrɛw, ani u ka ɲamɔgɔw labɛnnin tun lo ka Pɔli ni Barinabasi bon ni kabakuruw ye k'u faga.

⁶ Pɔli ni Barinabasi bɔra u ka namara kala ma minkɛ, u dɛnna ka taga Lisitɔrɔ ni Dɛribe ani u lamini na Likawɔni mara la.

⁷ U y'a daminɛ ka Matigi ka kibaru diman fɔ o yɔrɔ nunu na.

Pɔli ni Barinabasi be muruku dɔ kɛnɛya

⁸ O y'a sɔrɔ cɛɛ dɔ tun be Lisitɔrɔ, muruku tun lo kabini a wolotuma.

⁹ Cɛɛ tun b'a tulo malɔra Pɔli ka waajuli la. Pɔli y'a filɛ! A y'a lɔn ko lanaya be cɛɛ la min be se k'a kɛnɛya.

¹⁰ O la, a y'a kaan kɔrɔta k'a fɔ a ye ko: «Wili ka lɔ i seen kan!» Cɛɛ panna ka lɔ, ka taama.

¹¹ Mɔgɔw ye Pɔli ka koo kɛnin nin ye minkɛ, u pɛrɛnna likawɔnikan na ko: «Batofɛnw y'u yɛrɛ yɛlɛma mɔgɔw ye ka jigi an fɛ.»

¹² U ye Barinabasi tɔgɔ la ko Zusi, ka Pɔli tɔgɔ la ko Ɛrimɛsi, bari ale lo tun be to ka kuma.

¹³ Zusi batoso min tun be dugu donda la, o murutigi y'a ɲini jama fɛ ko u ka na ni turaw ani yirifeerenw ye o soo daa la. Bari murutigi ni jama tun b'a fɛ ka saraka bɔ Barinabasi ni Pɔli ye.

¹⁴ Ciden Barinabasi ni Pɔli y'o faamu tuma min na, u y'u ka faniw faran dusukasi bolo ka pɛrɛn ka boli k'u sɛgɛrɛ k'a fɔ u ye ko:

¹⁵ «Aw be mun le kɛra yan ten? Anw t'aw ɲɔgɔn mɔgɔw ye wa? Anw nana kibaru diman fɔ aw ye, janko aw ka faran kofufafu nunu na, k'aw ɲaa sin Nitigi Ala ma, min ye sankolo, ni dugukolo, ani kɔgɔji n'u kɔnɔnafɛnw bɛɛ dan.

¹⁶ Fɔlɔfɔlɔ, Ala tun ye siyaw bɛɛ to yen, u y'u sago kɛ.

¹⁷ O bɛɛ n'a ta, a tun b'a yɛrɛ cogoya yira u la, n'a ka koɲumanw ye. A be sanjiɲuman di aw ma, suman be sɔrɔ, aw dusu be diya.»

¹⁸ Ciden fila nunu ka kuma n'a ta bɛɛ, a kɛra baara ye ka sɔrɔ ka se ka mɔgɔ nunu bali k'u kana olu sɔn i n'a fɔ joo.

¹⁹ Zuwifu dɔw nana ka bɔ Antiyɔsi, ani Ikoniyɔmu o tuma na, olu ye jama hakili yɛlɛma fɔɔ u ye Pɔli bon ni kabakuruw ye, o kɔ, u y'a kooro ka taga fili dugu kɔfɛ, u tun b'a miiri ko a sara.

²⁰ Nga kalandenw nana lɔ k'a lamini tuma min na, a wilila ka don n'u ye dugu kɔnɔ. O dugusagwɛ, ale ni Barinabasi tagara Dɛribe.

Pɔli ni Barinabasi be kɔsegira Antiyɔsi

²¹ Pɔli ni Barinabasi ye kibaru diman fɔ Dɛribekaw ye, ka kalanden caaman sɔrɔ. O kɔ, u segira ka taga Lisitɔrɔ, ka bɔ yen ka taga Ikoniyɔmu, ani Antiyɔsi.

²² U tun be to ka kalandenw jaa gwɛlɛya k'u ka banba k'u jigi la Yezu kan kosɔbɛ. U tun b'a fɔ kalandenw ye ko: «Wajibi lo fɔɔ an ka tɔɔrɔ kosɔbɛ ka sɔrɔ ka don Ala ka masaya la.»

²³ U ye ɲamɔgɔw bɔ ka sɔrɔ ka suun don ka Ala daali, k'u kalifa Matigi ma, u jigi lanin be min kan, k'u sigisigi dugu kelen kelen bɛɛ Krista ka jama kunna.

²⁴ O kɔ, u ye Pisidi jamana cɛtigɛ ka se Panfili jamana na,

²⁵ ka Ala ka kuma fɔ Pɛrizekaw ye. O kɔ, u tagara Atali

²⁶ ka kurun ta o yɔrɔ la ka taga Antiyɔsi, u tun ye Ala daali yɔrɔ min na ko a ka ɲumanya k'u bila sira, ka sɔrɔ ka taga baara nin kɛ.

²⁷ U sera yen tuma min na, u ye Krista ka jama lajɛn. Ala y'u dɛmɛ ka koo min bɛɛ kɛ, a ye sira di siya wɛrɛw ma cogo min na u ka la Matigi la, u y'o bɛɛ ɲafɔ u ye.

²⁸ U ye waati dɔ kɛ o yɔrɔ kalandenw fɛ.