Kɛwalew 10 - ALA KA KUMA

Kɔrinɛyi ka koo

¹ Cɛɛ dɔ tun be Sezare, a tɔgɔ ko Kɔrinɛyi. Sɔlidasi kuntigi tun lo, a tun be sɔlidasikulu min kunna, o tɔgɔ ko Itali.

² A tun be Ala ka sariyaw bato a ɲaa ma, ale n'a ka somɔgɔw bɛɛ tun be siran Ala ɲa, k'a bato tuma bɛɛ. A tun be zuwifuw dɛmɛ kosɔbɛ.

³ Loon dɔ tile sumanin kɔ dɔɔni, Kɔrinɛyi ye Ala ka mɛlɛkɛ dɔ ye ka gwɛ kosɔbɛ. Mɛlɛkɛ nin donna a fɛ k'a fɔ a ye ko: «Kɔrinɛyi!»

⁴ Siranya fɛ, Kɔrinɛyi y'a ɲaa basa a la, k'a jaabi ko: «Mun kɛra Matigi?» Mɛlɛkɛ y'a jaabi ko: «I be Ala bato minkɛ, an'i be dɛmɛ min kɛ fantanw ye, o diyara Ala ye. A hakili b'i la.

⁵ Sisan, i ka mɔgɔw ci Zope, ka taga cɛɛ dɔ wele, a tɔgɔ ko Simɔn, u b'a wele ko Piyɛri fana.

⁶ A ka jatigicɛ fana tɔgɔ ko Simɔn, o ye golomɔla dɔ ye, a ka soo be kɔgɔji daa la.»

⁷ Mɛlɛkɛ ye kuma nunu fɔ ka ban ka taga dɔrɔn, Kɔrinɛyi y'a ka baarakɛlaw la mɔgɔ fila wele, ani a ka sɔlidasi kelen min mɛnna a fɛ. O sɔlidasi nin tun be siran Ala ɲa.

⁸ Koo min tun kɛra, Kɔrinɛyi y'o bɛɛ fɔ u ye, ka sɔrɔ k'u ci Zope.

Piyɛri ka koo

⁹ A dugusagwɛ, k'u to sira kan, u yɔrɔ tun man jan Zope la tugu. O tuma na, Piyɛri yɛlɛla sanbon kan tilegwangwanfɛ, ka Ala daali.

¹⁰ Kɔngɔ y'a minɛ. O y'a sɔrɔ u tun be dumuni tobira a ye. A ye fɛɛn dɔ ye.

¹¹ Sankolo daa tun yɛlɛla, fɛɛn dɔ be jigira ka bɔ yen. O bɔnin tun be fanibelebeleba dɔ fɛ. Dakun naani tun b'a la.

¹² Sogo sifa bɛɛ tun b'a la: sennaanifɛnw ni minw be fofo, ani kɔnɔw.

¹³ O tuma na, Piyɛri ye kumakan dɔ mɛn ko: «Piyɛri, wili ka nunu dɔ faga k'a ɲimi.»

¹⁴ Nga Piyɛri y'a jaabi ko: «Abada! Matigi, fɛɛn min man kan ka dumu, fɛnnɔgɔnin, ne ma deli k'o don n daa la ka ye.»

¹⁵ Kan nin y'a fɔ a ye tugu ko: «Ala ye fɛɛn min saniya, i kan'a fɔ k'o ma ɲi ka dumu.»

¹⁶ A y'o fɔ fɔɔ siɲɛ saba. O yɔrɔnin bɛɛ, fɛnbelebeleba nin fosira ka yɛlɛ sankolo la.

¹⁷ Koo nin ye Piyɛri dabari ban, a tun b'a yɛrɛ ɲininga a kɔrɔ la. K'a to o la, Kɔrinɛyi ka cidenw ye Simɔn ka soo yɔrɔ ɲini furutututu ka na lɔ luda la.

¹⁸ U ye ɲiningali kɛ n'o y'a sɔrɔ, u be Simɔn min wele ko Piyɛri, n'a jiginin be yan.

¹⁹ Piyɛri kɔni tun b'a la ka miiri a ka fɛɛn yenin kɔrɔ la dɔrɔn, Nii Senuman y'a fɔ a ye ko: «Mɔgɔ saba b'i yɔrɔ ɲinina.

²⁰ Jigi, ka tugu u kɔ, i kana sigasiga, bari ne le y'u ci.»

²¹ Piyɛri jigira o mɔgɔ nunu fɛ k'a fɔ u ye ko: «Aw be mɔgɔ min yɔrɔ ɲinina, ne lo. Aw ye dɔ di.»

²² U y'a jaabi ko: «Sɔlidasi kuntigi Kɔrinɛyi le y'an ci e fɛ. Mɔgɔtilennin lo, a be siran Ala ɲa, zuwifu jama bɛɛ b'a tɔgɔɲuman fɔ. Ala ka mɛlɛkɛw dɔ y'a yɛrɛ yira a la, k'a fɔ a ye ko a ka cii sama i ma, waasa i ka na a ka soo, kuma min b'i fɛ, i k'o fɔ a ye.»

²³ Piyɛri ye lonan nunu minɛ kosɔbɛ o loon sufɛ. A dugusagwɛ, a tugura u kɔ ka taga. Balima minw tun be Zope, olu mɔgɔ damani y'a bila sira.

Piyɛri be don Kɔrinɛyi ka soo

²⁴ O loon dugusagwɛ, u sera Sezare. O y'a sɔrɔ Kɔrinɛyi tun y'a ka somɔgɔw n'a terisɔbɛw lajɛn n'u b'u kɔnɔna.

²⁵ Tuma min na Piyɛri tun be ɲini ka don luu kɔnɔ, Kɔrinɛyi tagar'a kunbɛn daa la k'a kunbiri gwan a ɲafɛ.

²⁶ Nga Piyɛri y'a minɛ ka wili k'a fɔ ko: «Wili, bari ne fana ye mɔgɔ lo ye.»

²⁷ K'a to kuma na n'a ye, u donna k'a sɔrɔ mɔgɔ caaman lajɛnnin be yen.

²⁸ Piyɛri y'a fɔ u ye ko: «Aw b'a lɔn ko a daganin te zuwifu ka taga siya wɛrɛ yɔrɔ filɛ, walima u ka jɛn ka koo dɔ kɛ ɲɔgɔn fɛ. Nga Ala y'a yira ne la, ko ne man kan ka mɔgɔ si jati tugu ko mɔgɔnɔgɔnin.

²⁹ O le y'a to ne ma ban ka na aw ka weleli la. O la do, ne b'aw ɲininga, aw ye ne wele kuun jumɛn na?»

³⁰ Kɔrinɛyi y'a jaabi ko: «A tile saba tɛmɛnin filɛ nin ye, nin waati yɛrɛ ɲɔgɔn na, ne tun be Ala daalila n ka soo wulafɛ. Ne barila ka cɛɛ dɔ ye n ɲakɔrɔ, a kannafani gwɛnin tun lo parapara.

³¹ A y'a fɔ ko: ‹Kɔrinɛyi, Ala y'i ka daaliliw jaabi, i ye dɛmɛ min kɛ dɛsɛbagatɔw ye, o diyara a ye.

³² I ka mɔgɔw ci Zope, ka taga cɛɛ dɔ wele, a tɔgɔ ko Simɔn, u b'a wele ko Piyɛri fana. A ka jatigicɛ fana tɔgɔ ko Simɔn, golomɔla lo, a ka soo be kɔgɔji daa la.›

³³ O le y'a to n ye mɔgɔw ci ka taga i wele. I fana ye ɲuman kɛ, i nana. O la do, anw bɛɛ filɛ nin ye i ɲafɛ, Matigi ye cii min don i bolo, i k'o fɔ an ye.»

Piyɛri be Kɔrinɛyi ka somɔgɔw waaju

³⁴ O tuma na, Piyɛri ye kuma ta k'a fɔ ko: «Ne y'a lɔn sisan ko Ala te mɔgɔ bɔ mɔgɔ la,

³⁵ i mana kɛ siya o siya ye, n'i be siran Ala ɲa ka to ka tilenninyakow kɛ, i koo be diya a ye.

³⁶ Kibaru diman, min ye hɛrɛ sɔrɔ kuma ye, Ala y'o fɔ Isirayɛlidenw ye Yezu Krista sababu la, ale min ye mɔgɔw bɛɛ ka Matigi ye.

³⁷ K'a ta Zan ka batizeli wango latuma na, koo minw daminɛna Galile mara la fɔɔ ka n'a bila Zude mara la, aw b'o lɔn.

³⁸ Ala ye Nii Senuman ni sebagaya di ale Nazarɛtika Yezu ma, ka jamana bɛɛ munumunu ka to ka koɲuman kɛ mɔgɔw ye, ka mɔgɔw kɛnɛya minw bɛɛ tun be Sutana bolo, bari Ala tun b'a fɛ.

³⁹ A ye koo minw bɛɛ kɛ Zeruzalɛmu, ani zuwifuw ka jamana tɔɔ bɛɛ la, anw y'o bɛɛ seere ye. U y'a gwengwen lɔgɔ kan k'a faga.

⁴⁰ Nga, a tile sabanan loon, Ala y'a kunun waasa a k'a yɛrɛ yira.

⁴¹ Nga a m'a yɛrɛ yira bɛɛ la, fɔɔ Ala yɛrɛ ye minw woloma k'u kɛ o seerew ye. O ye anw ye, anw minw ye dumuni kɛ n'a ye, ka minni kɛ n'a ye, a kununnin kɔ ka bɔ kaburu la.

⁴² O kɔ, a ye cii don an bolo ko an k'a fɔ jama ye ani k'a yira u la ko Ala ye ale lo sigi ka kɛ ɲanamanw ni suuw kitibaga ye.

⁴³ Kiraw bɛɛ tun ye ale Yezu le koo fɔ, ko ni mɔgɔ min lar'a la, k'o tigi ka hakɛ bena yafa.»

Nii Senuman be jigi siya wɛrɛw kan

⁴⁴ Ka Piyɛri to kuma na, Nii Senuman jigira a ka kuma lamɛnbagaw bɛɛ kan.

⁴⁵ Zuwifu minw tun lara Yezu la n'u nana Piyɛri bila sira, olu kabakoyara bari u y'a ye ko Ala ye Nii Senuman di siya wɛrɛw fana ma.

⁴⁶ Bari mɔgɔ nunu y'a daminɛ ka siyakan wɛrɛw fɔ, ani ka to ka Ala tanu. O la, Piyɛri y'a fɔ ko:

⁴⁷ «Mɔgɔ be se ka nunu bali k'u te batize ni jii ye wa? Bari anw ye Nii Senuman sɔrɔ cogo min na, olu fana y'a sɔrɔ ten.»

⁴⁸ Piyɛri ye sira di a bilasirabagaw ma k'u ka mɔgɔ nunu batize Yezu Krista tɔgɔ la. O kɔ, u y'a daali ko a ka tile fila kɛ u fɛ.