Kɛwalew 1 - ALA KA KUMA

Ala ye fɛɛn min layidu ta

¹ Tewofili, n ka sɛbɛ fɔlɔ kɔnɔ, Yezu ye koo minw bɛɛ kɛ, ka mɔgɔw kalan koo minw bɛɛ la, k'a ta o daminɛ ma

² fɔɔ ka taga se a kɔrɔtalon ma ka taga arijana na, n y'o bɛɛ lakali o kɔnɔ. Yanni a ka yɛlɛ ka taga arijana na, a tun ye mɔgɔ minw woloma k'u kɛ a ka cidenw ye, a ye kangari la u ye Nii Senuman barika la.

³ Yezu sanin kɔ, ka kunun, a y'a yɛrɛ yira a ka cidenw na cogo caaman ani siɲɛ caaman na tile bi naani kɔnɔ janko u k'a lɔn ko ale kununna. A tora n'u ye n'a b'u kalan Ala ka masaya sigiko la.

⁴ K'u to ɲɔgɔn fɛ dumuni na loon dɔ, a y'a fɔ u ye k'a gwɛlɛya ko: «Aw kana aw yɔrɔ jaɲa Zeruzalɛmu na, n Faa tun y'a daa di koo min na, aw ye to yen k'o makɔnɔ. Ne tun y'o kuma fɔ aw ye ko

⁵ Zan ye mɔgɔw batize ni jii ye, nga yanni tile damani, aw bena batize ni Nii Senuman ye.»

Yezu ka yɛlɛko arijana na

⁶ Kalandenw lajɛnnin tun be Yezu kɔrɔ. U y'a ɲininga ko: «Matigi, sisan lo i bena Isirayɛli ka masaya sigi kura ye wa?»

⁷ A y'u jaabi ko: «O masaya nin koo ɲanabɔli t'aw ka sira la, o koow be n Faa kelenpe le bolo.

⁸ Nga ni Nii Senuman jigira aw kan tuma min na, aw bena fanga sɔrɔ ka se ka n ka koow fɔ Zeruzalɛmu, ni Zude mara bɛɛ la, ani Samari mara la, fɔɔ ka taga se diɲɛ faan bɛɛ la.»

⁹ Yezu y'o kuma nunu fɔ ka ban minkɛ, a kɔrɔtara u ɲakɔrɔ ka taga arijana na. K'u to filɛli la, sankaba dɔ donna u cɛ k'a dogo u la.

¹⁰ K'u ɲaa basanin to sankolo la, u barila ka cɛɛ fila dɔ ye u gɛrɛfɛ fanigwɛ be u kaan na.

¹¹ Cɛɛ fila nunu y'u kaan to u ma ko: «Galilekaw! A kɛra di aw lɔnin be ka sankolo filɛ ten? Aw ye Yezu min yɛlɛtɔ ye arijana na, a bena segi ka na ten ka bɔ o yɔrɔ la.»

Cidenw ka jɛnkulu

¹² O tuma na, cidenw jigira ka bɔ kulu nin kan, min tɔgɔ ko Olivuyirikulu, ka taga Zeruzalɛmu dugu kɔnɔ, o furancɛ ye kilo kelen ɲɔgɔn ye.

¹³ U sera dugu kɔnɔ tuma min na, u tun be sangaso min kɔnɔ ka kɔrɔ, u yɛlɛla yen. Minw tun be yen, u tɔgɔw filɛ: Piyɛri, ni Zan, ni Zaki ani Andere, Filipu, ni Toma, Baritelemi ani Matiyo, Alife dencɛ Zaki, ni Simɔn u be min wele Fasodenŋana, ani Zude min faa tɔgɔ ko Zaki.

¹⁴ U bɛɛ ka miiri tun ye kelen ye. U lajɛnnin tun be jɛn ɲɔgɔn fɛ tuma bɛɛ ka Ala daali. Muso dɔw tun be n'u ye. Yezu baa Mariyamu tun be u cɛma, ani Yezu dɔgɔninw.

Matiyasi be bila Zuda nɔɔ na

¹⁵ O loonw na, kalanden mɔgɔ kɛmɛ ni mugan ɲɔgɔn lajɛnnin tun be yen. Piyɛri wilila ka lɔ u cɛma k'a fɔ ko:

¹⁶ «N balimaw, Ala ka kuma kɔnɔ Nii Senuman tun ye kuma min don Dawuda daa la Zuda ka koo la, wajibi tun lo o ka kɛ. Ale Zuda le nana kɛ sababu ye u ye Yezu minɛ.

¹⁷ Zuda tun ye an dɔ ye. Baara min kalifara an ma, o ɲɔgɔn le tun kalifara a ma fana.

¹⁸ A ye baarajugu kɛ k'o sara ta ka taga foro san. A do benna o le kɔnɔ ka halaki.

¹⁹ Zeruzalɛmukaw bɛɛ y'o kibaru mɛn fɔɔ u ye foro nin tɔgɔ la u ka kaan na ko Akɛlidama. O kɔrɔ ko Joli foro.

²⁰ Kitabu min be wele Dɔnkiliw Ala ye kitabu, a sɛbɛnnin be o kɔnɔ ko: ‹A ka soo ka kɛ tomo ye. Mɔgɔ si kana sigi yen.› A sɛbɛnnin be yɔrɔ wɛrɛ fana ko: ‹Mɔgɔ wɛrɛ k'a nɔɔ ta.›

²¹ «O kama, mɔgɔ minw tun tugunin b'an kɔ kabini Matigi Yezu be n'an ye,

²² k'a ta Yezu batizelon ma Zan fɛ, fɔɔ ka taga bila a kɔrɔtalon ma ka bɔ an cɛma ka taga arijana na, wajibi lo, olu dɔ ka Zuda nɔɔ ta, ka kɛ an dɔ ye ka Yezu koo fɔ.»

²³ U ye mɔgɔ fila bɔ, kelen tɔgɔ ko Yusufu dɔw b'a wele ko Barisabasi, dɔw fana b'a wele ko Zusitusi. Tɔɔ kelen tɔgɔ ko Matiyasi.

²⁴ O kɔ, u ye Ala daali ko: «Matigi, e min be mɔgɔ bɛɛ kɔnɔnako lɔn, n'i b'a fɛ mɔgɔ fila nunu na min ka kɛ i ka baarakɛla ye, o yira an na.

²⁵ Zuda tagar'a yɛrɛ kunfɛ ka cidenya baara min to, o tigi ka se k'o kɛ.»

²⁶ U ye kala la, min y'a yira ko Matiyasi lo. O la, ale farala ciden tan ni kelen nunu kan.