Kasikan 5 - ALA KA KUMA

Matigi, to an ka segi i ma

¹ Masaba, min ye anw sɔrɔ, e kana ɲinɛ o kɔ. A filɛ, u b'an nɛnina cogo min.

² An niyɔrɔ dira lonanw ma. Mɔgɔ minw siya te lɔn, an ka soow kɛra olu ta ye.

³ An kɛra falatɔw ye, faa t'an fɛ. An bamusow kɛra i ko firiyamusow.

⁴ An be wari bɔ, ka sɔrɔ k'an ka jii min. An te lɔgɔ sɔrɔ n'an ma wari bɔ.

⁵ An tɔɔrɔbagaw b'an kɔ. An fanga nagasira, lafiɲɛyɔrɔ te yen.

⁶ An y'an tigɛ jan Ezipitikaw ni Asirikaw fɛ waasa ka dumuni sɔrɔ.

⁷ An faaw le ye kojugu kɛ, olu te yen bii, anw le b'u kunko ɲunna.

⁸ Jɔɔnw le kɛra an kuntigiw ye, mɔgɔ te yen min b'an bɔsi u bolo.

⁹ Sanni an ka dumuni sɔrɔ, o ye faratiba ye, kongo kɔnɔ benkannikɛlaw kosɔn.

¹⁰ An fari gwannin lo i ko gwaa, kɔngɔ gwankojugu bolo.

¹¹ U be fanga la musow kan ka la n'u ye *Siyɔn kɔnɔ. U be sunguruninw fana kɛ ten Zuda duguw la.

¹² U ye dugu ɲamɔgɔ dɔw dulon. U ma cɛkɔrɔbaw boɲa hali dɔɔni.

¹³ Kanbelenw be wugu ɲun, cɛdenninw be talontalonna lɔgɔsiri kɔrɔ.

¹⁴ Cɛkɔrɔbaw ye ɲɔgɔnlajɛn dabila, kanbelenw ye dɔnkilila dabila.

¹⁵ An ka nisɔndiya dabilara, an ka dɔɔn yɛlɛmana ka kɛ dusukasi ye.

¹⁶ An ka kunnawolon banna. Bɔnɛ ye an ta ye, bari an donna Matigi gasi la.

¹⁷ N'aw y'a ye an dusu kasira ten, ni ɲaji fara an ɲaa na ten,

¹⁸ o kɔrɔ ko Siyɔn kulu halakira le. A kɛra kongowuluw ka yaalayɔrɔ ye.

¹⁹ Masaba, ele b'i ka kuntigiya la tuma bɛɛ. E b'i ka masaya la kudayi.

²⁰ Mun na i b'i hakili bɔ an kɔ tuma bɛɛ? Mun na i b'an bila i bolo kɔ an sii bɛɛ la?

²¹ A to an ka kɔsegi e ma Masaba, an bena sɔn i ma. An ka koo lalaga, ka kɛ i ko a tun be cogo min na fɔlɔfɔlɔ.

²² Yala i be sɔn k'an fili pepewu wa? I be sɔn ka dimi an kɔrɔ fɔɔ k'a dama tɛmɛ wa?