Kasikan 4 - ALA KA KUMA

Zeruzalɛmu halakiko

¹ Aba! Sanu ɲaa kɛra cogo di ka cɛn ten? Sanu yɛrɛ yɛrɛ ɲaa kɛra cogo di ka cɛn ten? Alabatoso kabakuruɲumanw kɛra cogo di ka yɛrɛkɛ bɔlɔnw na ten?

² *Siyɔn dugu deen minw ni sanu tun ka kan, a kɛra di u b'u jatira i ko bɔgɔdagaw? Dagabɔla bulonɔ.

³ Kongowuluw n'u ka juguya bɛɛ, u be siin di u deenw ma. Nga ne ka jama ka jugu i ko kɔnɔsogolon, kongokolon kɔnɔ.

⁴ Sinmindenw nɛɛn be nɔrɔ u naganaga la minnɔgɔ fɛ. Denmisɛnw be dumuni daali, nga mɔgɔ si te foyi d'u ma.

⁵ Minw tun be faamadumuni kɛ, olu le be sara sisan bɔlɔnw na. Minw tun be dakamanafaniw don, olu le be lara sunugu kan sisan.

⁶ Ne ka jama ye kojugu minw kɛ, olu boɲana ni Sodɔmu dugu ta ye. Dugu min halakira yɔrɔnin kelen, ni mɔgɔ bolo ma se a ma.

⁷ Jama ɲamɔgɔw tun saniyanin be kosɔbɛ. U tun gwɛra parapara. U tun ka kɛnɛ tigitigi, u fari tun ka ɲi.

⁸ U finnin lo kirikiri sisan. U t'u lɔn bɔlɔnw na tugu. U golo dama le b'u kolo kan sisan. A jara i ko lɔgɔ.

⁹ Murujan ye minw faga, olu dagamuna ka tɛmɛ kɔngɔtɔw kan. Bari kɔngɔ b'u fanga ban k'u nagasi suman tanya fɛ.

¹⁰ Denbaɲumanw y'u deenw tobi. U kɛra dumuni ye u fɛ ne ka jama halakiwaati la.

¹¹ Masaba dimina fɔɔ a daan na, a dusu wilila kosɔbɛ. A ye tasuma mana Siyɔn dugu la, a ye dugu nin bɛɛ jɛni!

¹² Masaw, ni mɔgɔ si tun ma l'a la diɲɛ na ko juguw tun bena se ka Zeruzalɛmu kɛlɛ fɔɔ ka don dugu kɔnɔ.

¹³ O kɛr'a ka kiraw n'a ka sarakalasebagaw ka kojuguw kama, Minw tun be mɔgɔtilenninw joli bɔn dugu kɔnɔ.

¹⁴ U be munumununa fiɲɛntɔya la bɔlɔnw na. Joli y'u nɔgɔ fɔɔ mɔgɔ si te se ka maga u ka fani na.

¹⁵ Mɔgɔw be pɛrɛn u kan k'a fɔ ko: «Aw ye taga ka bɔ yan, mɔgɔnɔgɔnin nunu! Aw ye taga ka bɔ yan, aw ye taga ka bɔ yan! Aw kana maga an na!» K'u to o boli ka munumunu na, siya wɛrɛw b'a fɔ ko: «U sigiyɔrɔ t'an fɛ tugu.»

¹⁶ Masaba yɛrɛ le y'u yɛrɛkɛ. A t'a fɛ a ɲaa ka la u kan tugu. Boɲa si te lara sarakalasebagaw kan, a te cɛkɔrɔbaw jati.

*

¹⁷ An ɲaa jara sira filɛli la halibi, an be dɛmɛ makɔnɔna halibi. An tora an ka kɔlɔsili kɛyɔrɔw la, ka to ka siya dɔ kɔnɔ, minw tun tena se k'an bɔ bolo la.

¹⁸ U tun b'an dɛndɛna le, an tun te se ka bɔ dugu forobayɔrɔw la. An sii tun banna ka ban, an ka loon tun dafara. Tiɲɛ na, an ka loon tun sera.

¹⁹ An gwɛnbagaw ka teli ni sɛgɛn ye. U b'an gwɛnna kuluw kan. U b'an dɛndɛna kongokolon kɔnɔ.

²⁰ An be nii la min sababu la, Masaba ka mɔgɔwolomanin, ale yɛrɛ benna u ka dingɛ kɔnɔ. An tun b'a fɔra ale min koo la ko: «K'an to ale suma kɔrɔ, an bena balo siya wɛrɛw cɛma.»

*

²¹ Aw ka nisɔndiya kosɔbɛ, edɔmuw, aw minw siginin be Usi jamana na. Aw fana bena minni kɛ filen nin na fɔɔ k'aw ɲaa minimini, k'aw julakolon bɔ.

²² Siyɔnkaw, aw ka kojuguw juru sarala ka ban. A tena aw minɛ ka taga tugu. A bena aw edɔmuw ɲaa gwan aw ka kojugu kosɔn, a bena aw ka kɛwalijuguw yira.