Kasikan 3 - ALA KA KUMA

Mɔgɔ ka kan k'a jigi la Matigi kan

¹ Ne ye mɔgɔ ye, tɔɔrɔ be min kan, Matigi diminin ye min la ne kan.

² A ye ne bila taama na dibi kɔnɔ. N m'o kɛ yeelen na dɛ.

³ Matigi bolo sera ne ma, a bolo be n kan tile kuturu kɔnɔ.

⁴ A y'a kɛ n fasara fɔɔ n fari ɲuguɲugura. A ye ne kolow kari.

⁵ A ye dusukasi ni sigɛn kɛ ka ne lamini.

⁶ A ye ne bila dibi la i ko mɔgɔ minw sara a mɛnna.

⁷ A ye ne lamini ni kogo ye, waasa ne kana bɔ. A ye jɔrɔkɔ kɛ n na.

⁸ Hali ni ne be kasira ka dɛmɛbaga ɲini n yɛrɛ la, a be ne ka kasikan bali.

⁹ A ye kabakurubabaw ton ne tɛmɛyɔrɔ la, a ye ne ka sira ɲagami.

¹⁰ A kɛra wara ye ne fɛ, min y'a yɛrɛ dogo. Jara lo min y'a yɛrɛ labɛn ne kama.

¹¹ A ye ne bɔ n ka sira kan ka n halaki ka n to yen.

¹² A y'a ka kala labɛn, k'a sin ne ma. Ne kɛr'a ka biɲɛ ta ye.

¹³ A ye n sɔgɔ n'a ka biɲɛw ye, a y'a ka toon kɔnɔ biɲɛ bɛɛ don n na.

¹⁴ Ne kɛra lɔgɔbɔfɛn ye ne ka siya bɛɛ cɛma, o le kɛra mɔgɔw ka dɔnkili ye tile mumɛ kɔnɔ.

¹⁵ A ye n dusu kasi fɔɔ ka taga tɛmɛ, a ye ne ɲanamini ni dusukasi ye.

¹⁶ A ye n daa tutu duguma fɔɔ ka n ɲiin kari, a ye n tereke bugurigwɛ kɔnɔ.

¹⁷ Ne kɔni yɔrɔ ka jan hɛrɛ la fɔɔ ne ɲinɛna ɲasuma kɔ.

¹⁸ Ne ko: Ne ka siniko banna, ne jigi te foyi kan tugu Masaba fɛ.

*

¹⁹ Ni ne miirila n ka dusukasi ni n ka munumunu la, o be kɛ ne fɛ baga kunaman le ye.

²⁰ Ne hakili b'a la, a te bɔ n kɔnɔ, ne fari bɛɛ fagara o koo la ten.

²¹ Ne bena min to n hakili la, ne jigi be min kan, o ye ko:

²² Masaba ka ɲumanya ma ban, a ka makari ma ban.

²³ Loon o loon sɔgɔma, u be kɛ kokura ye. E ka ɲi kosɔbɛ.

²⁴ Masaba ye ne ka koo bɛɛ ye. O le be ne kɔnɔ. O kama, ne be n jigi la a kan.

²⁵ Mɔgɔ min jigi be Masaba kan, mɔgɔ min b'a yɔrɔ ɲini, Masaba ka ɲumanya b'o tigi kan.

²⁶ A ka ɲi mɔgɔ ka Masaba ka dɛmɛ kɔnɔ, a kana foyi fɔ.

²⁷ A ka ɲi mɔgɔ ka sigɛn muɲu a kanbelentuma na.

²⁸ A ka kan ka sigi a kelen na ka je, ni Masaba ye sigɛn la a kan.

²⁹ A k'a ɲaa biri duguma. N'a sɔrɔ Masaba bena n'a jigi tugu.

³⁰ A k'a tulo di a cibaga ma. A ka sɔn nɛnili caaman ma.

³¹ Bari, Matigi te mɔgɔ fili pewu.

³² N'a ye ɲagwan la min kan, a be tila ka makari, bari, a ka ɲumanya ka bon.

³³ A te adamadenw tɔɔrɔ bari o ka d'a ye, a t'a ɲaa gwan bari o ka d'a ye.

*

³⁴ Tuma min na u be jamana kasodenw bɛɛ dɔndɔn,

³⁵ tuma min na u be ben ɲɔgɔn kan Fɛɛn bɛɛ kuntigi ɲakɔrɔ,

³⁶ tuma min na u be ɲɔgɔn tɔɲɔ kiti la, Matigi t'o yera wa?

³⁷ Jɔn le kumana, koo kɛra? Matigi tɛ wa?

³⁸ Yala, Fɛɛn bɛɛ kuntigi le t'a fɔ ko tɔɔrɔ, walima hɛrɛ ka kɛ wa?

³⁹ Ka adamaden to nii la, mun na a be firinfirin? K'a sɔrɔ a ka kojugu sara le b'a kan.

⁴⁰ An ka filɛli kɛ an taamacogow la kosɔbɛ, an ka kɔsegi Masaba ma.

⁴¹ An k'an bolo kɔrɔta, ka Ala daali ni kɔnɔgwɛ ye, ale min be sankolo la.

⁴² Anw kɔni, an ye kojugu kɛ, an murutira. Ele Masaba fana ma yafa.

⁴³ I ka dimi y'a kɛ i tugura an kɔ ka to k'an faga dɔrɔn.

⁴⁴ I ye sankaba kɛ k'i yɛrɛ datugu waasa mɔgɔw ka daalilikan kana se i ma.

⁴⁵ I y'an kɛ fɛnkolon ye, i y'an kɛ ɲamaɲama ye siyaw cɛma.

⁴⁶ An juguw bɛɛ y'u daa la an kan.

⁴⁷ An niyɔrɔ kɛra siranyako ni ɲanamini ye, a kɛra halakiko ni cɛnniba ye.

⁴⁸ Ne ɲaji be woyo i ko kɔɔ bari ne ka siya halakira.

⁴⁹ Ne ɲaji be woyora tuma bɛɛ, a te jara ka ye,

⁵⁰ fɔɔ Masaba yɛrɛ ka filɛli kɛ k'a to sankolo la, a k'an lajɛ.

⁵¹ Fɛɛn min kɛra ne ka dugu sunguruw la, o be digi ne la haali.

*

⁵² Minw be ne kɛlɛ ni kuun t'a la, olu be ne gwɛn ka n gwɛn i ko kɔnɔnin.

⁵³ U tun b'a fɛ ka ne nii bɔ dingɛ kɔnɔ. U ye ne bon ni kabakuruw ye.

⁵⁴ Jii tun ye ne tunu. Ne y'a fɔ ko: «Ee! Ne ta cɛnna.»

⁵⁵ Ka ne to fɔɔ dingɛba juu la, ne ye ele Masaba wele,

⁵⁶ i ye ne kaan mɛn, e ma i tulo datugu, i ye ne ka ŋunankan ni n ka kasikan mɛn.

⁵⁷ Ne y'i wele loon min na, e gwɛrɛla ne la, i y'a fɔ ko n kana siran!

⁵⁸ Matigi, e ye ne ka koo ɲanabɔ, i ye ne kisi.

⁵⁹ U be min lara ne kan, Masaba, i y'o ye kɛ! Ne ka koo ɲanabɔ ni tilenninya ye.

⁶⁰ U be ne kɔniya cogo min na, u ye namarako minw bɛɛ labɛn, i y'o ye kɛ.

⁶¹ U be kumajugu minw fɔra ne koo la, Masaba, e b'o mɛnna kɛ! U be namarako minw bɛɛ labɛnna ne kama, e y'o ye kɛ!

⁶² Ne juguw ka kuma n'u ka miiriya sinnin be ne ma tile kuturu kɔnɔ.

⁶³ U sigira wo, u lɔra wo, ne ka koo le kɛra dɔnkili ye u daa la, e k'o filɛ.

⁶⁴ Masaba, u ye min kɛ n na, o ɲɔgɔn fana kɛ u la.

⁶⁵ U kɛ faamubaliw ye, k'u ta cɛn.

⁶⁶ U kɔgwɛn dimi fɛ, u sii tunu ka bɔ dugukolo kan.