Kasikan 2 - ALA KA KUMA

Matigi kɛra Zeruzalɛmu jugu ye

¹ Aba! Matigi ye *Siyɔn dugu bila dibiba la, a y'o kɛ a ka dimi kosɔn. Isirayɛli ka kunkɔrɔtadugu lara duguma. A ka dimilon na, a m'a hakili to a sigiyɔrɔ la.

² Matigi ye Yakuba ka soow bɛɛ ci, hali makari ma sɔrɔ a la. A ka dimi kosɔn, a ye Zuda mara dugu barikamanw ci. A ye mara nin ka fangatigiya n'a ka masaw la duguma k'u maloya.

³ A ka dimikojugu fɛ, a ye Isirayɛli fanga nagasi. A m'a juguw natɔ bali. A ye tasuma mana Yakuba ka soo kɔnɔ, a be manana faan bɛɛ ka taga!

⁴ A y'a ka kala labɛn i ko jugu. A y'a kinibolo labɛn kalabon kama i ko jugu. Fɛɛn o fɛɛn filɛ ka di, a y'o bɛɛ halaki! A y'a ka dimi bɔ Siyɔn ka soo la, i ko tasuma.

⁵ Matigi kɛra i ko an jugu. A ye Isirayɛli halaki, a y'a ka masasow bɛɛ halaki, a y'a ka yɔrɔ barikamanw halaki. A ye Zuda mara mɔgɔw ta kɛ hakiliɲagami ni dusukasi ye dɔrɔn.

⁶ A y'a ka soo ci i ko bugu, kongo kɔnɔ. A ye cɛnni kɛ u ka ɲɔgɔnlajɛnyɔrɔ la. Ale Masaba y'a kɛ Siyɔnkaw te ɲanagwɛ loonw, ni lafiɲɛlon lɔn tugu. A dimikojugu fɛ, a banna masaw ni sarakalasebagaw la.

⁷ Ale Matigi le bann'a ka sarakabɔyɔrɔ la, a sigiyɔrɔ koo goyar'a ye. A ye Siyɔn dugu n'a ka faamaluw don a juguw bolo. Mankan boɲana Masaba ka soo kɔnɔ, i ko ɲanagwɛ loon.

⁸ Masaba y'a ŋaniya ka Siyɔn laminikogo ci. Jurukisɛ b'a bolo waasa k'a dakɛɲɛ n'o ye. A ma sigasiga a ciko la yɛrɛ! Dugu laminikogo fɔlɔ ni filanan cɛnna ɲɔgɔn fɛ. O kɛra dusukasi ye!

⁹ A ye dugu donda koonw sɔgɔnanw kari, koonw walakara ka ben bɔgɔ kɔnɔ. Dugu masacɛ n'a ka dakɔrɔsigiw be siya wɛrɛw bolo. Ala ka sariya koo te fɔ tugu. Masaba te foyi yira kiraw la tugu.

¹⁰ Siyɔn cɛkɔrɔbaw sigira duguma ka je tɛtɛtɛ! U ye buguri kɛ u yɛrɛ kuun na, ka dusukasifani don. Zeruzalɛmu sunguruw kuunw surunna fɔɔ u be ɲini ka se duguma.

*

¹¹ Ne ɲaden misɛnyara kasi bolo, ne kɔnɔ gwannin be. Ne fanga banna pewu. Bari, ne ka siya halakira. Denmisɛnw ni sinmindenw be nagasira dugu bɔlɔnw kɔnɔ.

¹² U b'a fɔra u baaw ye ko: «Dumuni, ani jii be min?» O tuma na, u fanga be nagasi dugu forobayɔrɔw la i ko mɔgɔ mandimininw. U nii be bɔ u bamusow seen kan.

*

¹³ Ne bena mun le fɔ i ye? Zeruzalɛmu, ne bena i suma ni mun ye? K'i suma ni mun ye waasa i kɔnɔ ka diya, Siyɔn? Bari, cɛnni min kɛra i kɔnɔ, o ka bon i ko kɔgɔji. Jɔn bena se ka lalagali kɛ, i ka bɔ o la?

¹⁴ E ka kiraw be kuma minw fɔra i koo la, o ye kumafu ye, kumakolon. Kojugu minw kɛra i kɔnɔ, u ma kuma o la waasa k'i dɛmɛ k'i ka koow cogo yɛlɛma. U ye galon, ni namarakuma dama le fɔ.

¹⁵ Tɛmɛbagaw bɛɛ be tɛgɛrɛ fɔ e halakiko la. U be kaba ka to k'u kuun firinfirin e Zeruzalɛmu dugu koo la. U b'a fɔra ko: «Dugu min tun be wele dugu dafanin, diɲɛ bɛɛ ka nisɔndiyayɔrɔ, ale lo ye ten wa?»

¹⁶ E juguw bɛɛ b'u daa lara e kan. U b'i lɔgɔbɔra, u b'a fɔra ko: «An y'a sɔrɔ! An tun be loon min makɔnɔna, o le ye nin ye. An ye o loon sɔrɔ, an ɲaa b'a la!»

¹⁷ Masaba tun ye min ŋaniya ta, a y'o kɛ. A tun ye min fɔ kabini fɔlɔfɔlɔ, a y'o kɛ. A y'i halaki, a yɛrɛ ma hinɛ. A ye e juguw nisɔndiya, i halakili kosɔn. A ye dɔ fara e juguw barika kan.

*

¹⁸ Siyɔnkaw, aw kasikan ka bɔ Matigi faan fɛ. Aw ɲaji ka woyo i ko kɔɔ, suu ni tile. Aw kana lafiɲɛ, aw ɲaji kana ja.

¹⁹ Aw ka wili ka kule dugutilama, ni sufɛ dondow kasituma na, aw k'aw kɔnɔnako fɔ Matigi ye. Aw k'aw bolo kɔrɔta ka dɛmɛ ɲini a fɛ, aw deenw nii kisiko la minw be sara bɔlɔnw bɛɛ la kɔngɔ bolo.

*

²⁰ Ee! Masaba, a filɛ kɛ: E be jɔn le tɔɔrɔla ten? Muso be se k'a yɛrɛ deenw balo ka tila k'o ɲimi wa? Sarakalasebagaw ni kiraw ka kan ka faga i ka sigiyɔrɔ la wa?

²¹ Cɛkɔrɔbaw ni denmisɛnw filifilinin be bɔlɔnw na. Murujan ye kanbelenw ni sunguruw jigi. I ye fagali kɛ e dimilon na dɛ, i y'u kaan tigɛ hali e ma hinɛ!

²² E ye an jugu farimanw lajɛn, i ko ɲanagwɛ loon. Masaba, e dimilon na, mɔgɔ si ma kisi, mɔgɔ si ma to nii la. An ye deen minw balo, k'u ladon, an juguw y'olu ban.