Jateri 9 - ALA KA KUMA

Hɔrɔnya ɲanagwɛ

¹ Isirayɛlidenw bɔnin kɔ Ezipiti jamana na saan filanan kalo fɔlɔ la, Masaba kumana Musa fɛ kongokolon kɔnɔ Sinayi kulu gɛrɛfɛ k'a fɔ a ye ko:

² «Isirayɛlidenw ka kan ka *Hɔrɔnya ɲanagwɛ kɛ a waati latigɛnin na.

³ Aw k'a kɛ a waati latigɛnin na, kalo nin tile tan ni naaninan loon tileben tuma na. Landa ni koo minw fɔr'a koo la, aw ka kan ka olu kɛ.»

⁴ Musa y'a fɔ Isirayɛlidenw ye k'u ka Hɔrɔnya ɲanagwɛ kɛ.

⁵ U y'a kɛ saan kalo fɔlɔ tile tan ni naaninan loon tileben tuma na, kongokolon kɔnɔ Sinayi kulu gɛrɛfɛ. Masaba tun ye min fɔ Musa ye, Isirayɛlidenw y'o bɛɛ kɛ.

⁶ Nga mɔgɔ dɔw tun saniyanin tɛ sariya faan fɛ, bari u tun magara suu dɔ la. O la, u ma se ka Hɔrɔnya ɲanagwɛ kɛ o loon na. U tagara Musa ni Arɔn fɛ o loon kelen na

⁷ k'a fɔ Musa ye ko: «An nɔgɔnin lo suu koɲa kama. Mun na o b'an bali ka saraka bɔ Masaba ye ni Isirayɛliden tɔw ye a waati latigɛnin na?»

⁸ Musa y'a fɔ u ye ko: «Aw ye lɔ, Masaba bena min fɔ aw ka koo la, ne b'o mɛn fɔlɔ.»

⁹ Masaba y'a fɔ Musa ye ko:

¹⁰ «A fɔ Isirayɛlidenw ye ko: ni suu koɲa ye aw dɔ nɔgɔ, walima aw kɔmɔgɔw dɔ, walima n'a tagara dugu la le, a bena se ka Hɔrɔnya ɲanagwɛ kɛ ka ne Masaba bato.

¹¹ Nga u ben'a kɛ saan kalo filanan tile tan ni naaninan loon tileben tuma na le. U bena sagaden sogo ɲimi, ni fununan te buru min na, ani ɲugu kunaman.

¹² A tɔɔ kana si, a kolo si kana kari. U ka Hɔrɔnya ɲanagwɛ kɛ ka kɛɲɛ n'a fɔcogo ye.

¹³ «Mɔgɔ min saniyanin lo n'a ma taga dugu la, n'o tigi ma Hɔrɔnya ɲanagwɛ kɛ, o tigi ka kan ka gwɛn ka bɔ a ka mɔgɔw cɛma. Bari a ma saraka bɔ ne Masaba ye a waati latigɛnin na. O la, a ka hakɛ kunko bena to a yɛrɛ kunna.

¹⁴ Ni lonan min be aw fɛ, n'a b'a fɛ ka Hɔrɔnya ɲanagwɛ kɛ ka ne Masaba bato, landa ni koo minw fɔr'a koo la, a ka kan k'o kɛ. Koo min wajibiyanin be dugulen ma, o le wajibiyanin lo lonanw ma.»

Sankaba tasumaman

¹⁵ Fanibugu lɔra loon min na, min ye Masaba ka sariya walakaw marayɔrɔ ye, sankaba nana lɔ a kunna k'a suma kɛ a bɛɛ kan. A tora soo kunna k'a ta wuladafɛ fɔɔ ka dugu gwɛ, ka kɛ i n'a fɔ tasuma.

¹⁶ K'a ta o loon na, a tora ten. Sankaba lɔnin tun be soo nin kunna, a tun be i n'a fɔ tasuma sufɛ.

¹⁷ Ni sankaba wilila ka bɔ soo nin kunna tuma min na, Isirayɛlidenw tun be wili ka bɔ u sigiyɔrɔ la. N'a tagara lɔ yɔrɔ min na, u be taga sigi o yɔrɔ la.

¹⁸ Ni Masaba ko u ka wili ka taga, Isirayɛlidenw tun be wili ka taga, n'a ko u ka sigi, u tun be sigi. Ka sankaba to bugu nin kunna, u tun te wili.

¹⁹ Ni sankaba tora bugu nin kunna fɔɔ ka mɛn, Isirayɛlidenw tun be sɔn Masaba ta ma, u tun te wili ka taga.

²⁰ Waati dɔ la, sankaba ye tile damani dɔrɔn kɛ a kunna. Ni Masaba ko u ka sigi, u tun be sigi. N'a ko u ka wili ka taga tuma min na, u tun be wili ka taga.

²¹ Sankaba nin tun be lɔ tuma dɔ k'a ta sufɛ fɔɔ sɔgɔma dɔrɔn. N'a wilila sɔgɔma, u tun be wili ka taga. Hali n'a tun ye tile kelen ni suu kelen kɛ, ka sɔrɔ ka wili, u tun be wili.

²² Ni sankaba tun lɔra bugu nin kunna ka tile fila kɛ, walima kalo kelen, walima saan kelen, Isirayɛlidenw tun be to u ka sigiyɔrɔ la, u te wili. Nga n'a wilila tuma min na, u tun be wili ka taga.

²³ Ni Masaba ko u ka sigi, u tun be sigi. N'a ko u ka wili ka taga, u tun be wili ka taga. U sɔnna Masaba ta ma ka kɛɲɛ n'a ka kuma ye, a ye min fɔ Musa barika la.