Jateri 7 - ALA KA KUMA

Wotoro minw dira Masaba ka yɔrɔ baara kama

¹ Musa ye fanibugu nin lɔ ka ban tuma min na, a ye tulu mɔn a la k'a kalifa Masaba ma, n'a kɔnɔnaminanw bɛɛ. A ye tulu mɔn sarakabɔyɔrɔ n'a minanw bɛɛ la k'olu fana kalifa.

² Isirayɛlidenw ɲamɔgɔw ni gwatigiw nana n'u ka boɲafɛnw ye. Isirayɛli deenw kɔmɔgɔw ɲamɔgɔw tun lo, minw tun bilara tɔgɔsɛbɛnbagaw ɲafɛ.

³ U nana ni wotoro sifa dɔ ye, deen wɔɔrɔ, ni misi tan ni fila, k'o di Masaba ma. Ɲamɔgɔ fila fila tun jɛnna wotoro kelen kan. U kelen kelen bɛɛ n'u ka misi. U nana o di fanibugu nin ɲafɛ.

⁴ Masaba y'a fɔ Musa ye ko:

⁵ «Bonyafɛn nunu minɛ u fɛ k'o kɛ Ɲɔgɔnkunbɛn fanibugu kɔnɔ baarakɛminanw ye. I k'o di Levi kɔmɔgɔw ma, u kelen kelen bɛɛ n'u ta, ka kɛɲɛ n'u ka baara ye.»

⁶ Musa ye wotorow ni misi nunu minɛ k'o di Levi kɔmɔgɔw ma.

⁷ A ye wotoro fila ni misi naani di Gɛrisɔn deenw ma ka kɛɲɛ n'u ka baara ye,

⁸ ka wotoro naani ni misi seegi di Merari deenw ma, ka kɛɲɛ n'u ka baara ye. Sarakalasebaga Arɔn dencɛ Itamari le tun kɛra o tilanbaga ye.

⁹ A ma foyi di Keyati deenw ma, bari olu le tun be to ka Masaba ka minanw ta. U tun ka kan k'u ta gaman kan le.

Sarakabɔyɔrɔ kalifalon

¹⁰ Tulu mɔnlon na sarakabɔyɔrɔ kan k'a kalifa Masaba ma, ɲamɔgɔ nunu nana n'u ka boɲafɛnw ye. U nana u bila sarakabɔyɔrɔ nin kɔrɔ.

¹¹ Masaba y'a fɔ Musa ye ko: «Ɲamɔgɔ nunu bena to ka na kelen kelen loon o loon k'u ka boɲafɛnw di sarakabɔyɔrɔ kalifako la.»

¹² Mɔgɔ min nana n'a ta ye loon fɔlɔ la, o kɛra Zuda kɔmɔgɔ Aminadabu dencɛ Nasɔn ye.

¹³ Ale ka boɲafɛnw tun ye: tasa warigwɛlaman kelen ye, min gwiliya sera kilo kelen ni garamu kɛmɛ saba ma, ni jifilen warigwɛlaman kelen, min gwiliya fana sera garamu kɛmɛ wolonwula ma, ka kɛɲɛ ni Masaba ka sigiyɔrɔ warigwɛ jaticogo ye. U fila bɛɛ tun fanin be mugu tɛntɛnnin na k'o nɔɔni ni tulu ye min bena kɛ suman saraka ye,

¹⁴ ani filen sanulaman kelen, o gwiliya tun ye garamu kɛmɛ ye. A fanin tun be wusulan na.

¹⁵ A fana nana ni tura ye, ani sagajigi, ni sankelensaga, min bena kɛ saraka jɛnita ye,

¹⁶ ani hakɛ yafa saraka bakɔrɔnin,

¹⁷ ni misi fila, ani sagajigi duuru ni bakɔrɔnin duuru, ani sankelensaga deen duuru. O ka kɛ jɛnɲɔgɔnya saraka ye. O le kɛra Aminadabu dencɛ Nasɔn ka boɲafɛnw ye.

¹⁸ Loon filanan na, Isakari kɔmɔgɔw ɲamɔgɔ Netanɛli, Suwari dencɛ, nana n'a ta ye.

^19-23 Ale fana nana n'o boɲafɛn kelen kelen ɲɔgɔn ye.

²⁴ Tile sabanan loon, Zabulɔn kɔmɔgɔw ɲamɔgɔ Eliyabu n'o ye Elɔn dencɛ ye, ale fana nana n'a ta ye,

^25-29 o fɛɛn kelenw ɲɔgɔn lo.

³⁰ Loon naaninan na, Urubɛn kɔmɔgɔw ɲamɔgɔ Elisuri min ye Sedewuri dencɛ ye, ale fana nana n'a ta ye,

^31-35 o fɛɛn kelenw ɲɔgɔn lo.

³⁶ Tile duurunan loon, Simeyɔn kɔmɔgɔw ɲamɔgɔ Selumiyɛli, min ye Surisadayi dencɛ ye, ale fana nana n'a ta ye,

^37-41 o fɛɛn kelenw ɲɔgɔn lo.

⁴² Gadi kɔmɔgɔw ɲamɔgɔ Eliyazafu min ye Dewuyɛli dencɛ ye, ale fana nana n'a ta ye tile wɔɔrɔnan loon,

^43-47 o fɛɛn kelenw ɲɔgɔn lo.

⁴⁸ Loon wolonwulanan na, Efarayimu kɔmɔgɔw ɲamɔgɔ Elisama min ye Amiwudi dencɛ ye, ale fana nana n'a ta ye,

^49-53 o fɛɛn kelenw ɲɔgɔn lo.

⁵⁴ Manase kɔmɔgɔw ɲamɔgɔ Gameliyɛli, min ye Pedasuri dencɛ ye, ale fana nana n'a ta ye tile seeginan loon,

^55-59 o fɛɛn kelenw ɲɔgɔn lo.

⁶⁰ Loon kɔnɔntɔnnan na, Bɛnzamɛn kɔmɔgɔw ɲamɔgɔ Abidan min ye Gidewoni dencɛ ye, ale fana nana n'a ta ye,

^61-65 o fɛɛn kelenw ɲɔgɔn lo.

⁶⁶ Dan kɔmɔgɔw ɲamɔgɔ Ayezɛri, min ye Amisadayi dencɛ ye, ale fana nana n'a ta ye loon tannan na,

^67-71 o fɛɛn kelenw ɲɔgɔn lo.

⁷² Tile tan ni kelennan loon, Asɛri kɔmɔgɔw ɲamɔgɔ Pagiyɛli min ye Okiran dencɛ ye, ale fana nana n'a ta ye,

^73-77 o fɛɛn kelenw ɲɔgɔn lo.

⁷⁸ Loon tan ni filanan na, Nɛfutali kɔmɔgɔw ɲamɔgɔ Ayira, min ye Enan dencɛ ye, ale fana nana n'a ta ye,

^79-83 o fɛɛn kelenw ɲɔgɔn lo.

⁸⁴ Isirayɛlidenw ye boɲafɛn minw di sarakabɔyɔrɔ mɔnlon na k'a kalifa lon na Masaba ma, olu le ye nunu ye: tasa warigwɛlaman tan ni fila, jifilen warigwɛlaman tan ni fila, filen sanulaman tan ni fila.

⁸⁵ Tasa warigwɛlaman nunu kelen kelen bɛɛ gwiliya tun ye kilo kelen ni garamu kɛmɛ saba saba ye. Jifilen nunu kelen kelen bɛɛ fana gwiliya tun ye garamu kɛmɛ wolonwula wolonwula ye. Minan warigwɛlamanw bɛɛ lajɛnnin ka gwiliya tun kɛra kilo mugan ni naani ye ka kɛɲɛ ni Masaba ka sigiyɔrɔ warigwɛ jaticogo ye.

⁸⁶ Filen sanulaman minw tun fanin be wusulan na, olu kelen kelen bɛɛ gwiliya tun ye garamu kɛmɛ kɛmɛ ye ka kɛɲɛ ni Masaba ka yɔrɔ warigwɛ jaticogo ye. U bɛɛ lajɛnnin tun kɛra kilo kelen ni garamu kɛmɛ fila ye.

⁸⁷ Begɛn minw kɛra saraka jɛnita ye, olu kɛra tura tan ni fila ye, sagajigi tan ni fila, ni sankelensaga tan ni fila, ani u ka suman sarakaw, ani bakɔrɔnin tan ni fila, hakɛ yafa saraka ta.

⁸⁸ Begɛn minw bɔra jɛnɲɔgɔnya saraka ye, olu tun ye misi mugan ni naani ye, ni sagajigi bi wɔɔrɔ, ani bakɔrɔnin bi wɔɔrɔ, ni sankelensaga bi wɔɔrɔ. U ye tulu mɔn sarakabɔyɔrɔ kan loon min na k'a kalifa Masaba ma, o le tun kɛra boɲafɛnw ye.

⁸⁹ Musa tun donna Ɲɔgɔnkunbɛn fanibugu kɔnɔ tuma min na, ko a be kuma ni Masaba ye, a tun be kumakan dɔ mɛnna ka bɔ Ala ka layidu taamasiɲɛ kɛsu datugulan sanfɛ, *serubɛn fila nunu jaa cɛma. A tun be kumana Musa fɛ.