Jateri 4 - ALA KA KUMA

Levi kɔmɔgɔw ka baara

¹ Masaba y'a fɔ Musa ni Arɔn ye ko:

² «Levi kɔmɔgɔw cɛma, i ka Keyati deenw tɔgɔ sɛbɛn fadenyabolo la, gwaso gwaso,

³ k'a ta saan bi saba deen ma fɔɔ ka se saan bi duuru ma. Mɔgɔ minw bɛɛ be se ka baara kɛ Ɲɔgɔnkunbɛn fanibugu kɔnɔ.

⁴ «Keyati deenw bena to ka baara minw kɛ yen, o filɛ: u bena to ka janto minanw na minw saniyanin be kosɔbɛ.

⁵ N'aw be wili tuma min na, Arɔn n'a deenw le bena soo nin cɛtigɛfani bɔ, ka layidu taamasiɲɛ kɛsu datugu n'a ye.

⁶ O kɔ, golo dɔw be biri a kan minw ka kɛnɛ, ka tila ka fani bulaman la o kan, ka sɔrɔ k'a talɔgɔw don a la.

⁷ «U bena fani bulaman dɔ biri ne ka buru bilayɔrɔ kan, ka sɔrɔ ka tasaw ni filenw, ani jifilenw ni jidagaw la o kan, sarakaji be don minw na. U ka buru bila a bilayɔrɔ la min man kan ka ban yen fewu.

⁸ O kɔ, u be faniwulen dɔ biri minan nunu kan, ka sɔrɔ ka golo dɔw biri o kan minw ka kɛnɛ. O kɔ, u ka tabali nin talɔgɔw don a la.

⁹ «U bena fani bulaman ta k'o biri fitinɛ bilayɔrɔ kan, n'a fitinɛdaga n'a juru tigɛminanw kan, ni bugurigwɛ minanw, ani tuludagaw bɛɛ kan.

¹⁰ U bena fitinɛ nin n'a minanw bɛɛ don birifani dɔ kɔnɔ min ye golo ye min ka kɛnɛ. O kɔ, u be o la u tafɛn kan.

¹¹ «U bena fani bulaman le biri sarakabɔyɔrɔ sanulaman nin kan, ani ka golo dɔw la o kan minw ka kɛnɛ. O kɔ, k'a talɔgɔw don a la.

¹² «U be baara kɛ ni minan minw ye ne ka yɔrɔ la, u bena olu bɛɛ ta k'u meleke fani bulaman dɔ kɔnɔ, ka tila ka birifɛn gololaman biri o kan. O kɔ, u k'u la u tafɛn kan.

¹³ «U bena bugurigwɛ bɔ sarakabɔyɔrɔ dɔ nin kan fɔlɔ, ka sɔrɔ ka fani bulaman biri a kan.

¹⁴ O kɔ, u be sɔrɔ k'o yɔrɔ baarakɛminanw bɛɛ ta k'u la a kan, pɛluw fara a biɲɛw kan, ni takami bɔminanw, ani bugurigwɛ donminanw, o yɔrɔ minanw bɛɛ. U be sɔrɔ ka golo dɔw biri o kan, ka sɔrɔ k'a talɔgɔw don a la.

¹⁵ «Ni Arɔn n'a deenw ye Ala ka fanibugu minanw bɛɛ labɛn ka ban, aw wilituma ka bɔ aw sigiyɔrɔ la, Keyati deenw bena gwɛrɛ k'u ta. Nga u man kan ka maga minan nunu yɛrɛ yɛrɛ la, n'o tɛ, u bena sa. O le ye Keyati deenw ka baara ye Ɲɔgɔnkunbɛn fanibugu koo la.

¹⁶ «Sarakalasebaga Arɔn dencɛ Eleyazari le bena to ka fitinɛ tulu kɔlɔsi, ni wusulan, ani loon o loon suman sarakaw, ani mɔgɔ mɔntulu. Fɛɛn min kɛra fanibugu kɔlɔsiko ye, o be ale lo bolo, a kɔnɔnaminanw bɛɛ ka fara ne ka sigiyɔrɔ kan.»

¹⁷ O kɔ, Masaba kumana Musa ni Arɔn fɛ tugu ko:

¹⁸ «Aw ka banba janko fadenyabolo minw bɔra Keyati la, olu kana tunu ka bɔ Levi kɔmɔgɔw cɛma.

¹⁹ U mana gwɛrɛ ne ka yɔrɔ la, u mana gwɛrɛ olu la, aw bena fɛɛn min kɛ janko u be to nii na, o filɛ: Arɔn n'a deenw bena u kelen kelen bɛɛ minɛ k'u bila u ka baara la yen, k'u ka kɛtaw yira u la, ani u ka kan ka minan minw ta.

²⁰ U man kan ka don ka fɛɛn senumanw ye hali waati dɔɔni yɛrɛ. N'o kɛra, u bena sa.»

Gɛrisɔn deenw ka baara

²¹ Masaba y'a fɔ Musa ye ko:

²² «Gɛrisɔn deenw tɔgɔ sɛbɛn fana gwaso gwaso, u ka fadenyabolo la.

²³ Mɔgɔ minw bɛɛ be se ka don Ɲɔgɔnkunbɛn fanibugu kɔnɔ ka baara kɛ, i ka olu tɔgɔ sɛbɛn, k'a ta saan bi saba ma fɔɔ ka se bi duuru ma.

²⁴ U ka baara bena kɛ min ye, o filɛ:

²⁵ Fani minw be kɛ ka ne ka fanibugu dilan, olu le bena to k'o ta, ani Ɲɔgɔnkunbɛn fanibugu, ni golo min be biri a kan, n'a dalafani,

²⁶ ani fani minw kɛra ka luu kori, fanibugu ni sarakabɔyɔrɔ be min kɔnɔ, ni luu dalafani, ani juruw ani u ka baarakɛminanw bɛɛ.

²⁷ Gɛrisɔn deenw ka baara bɛɛ ka kan ka kɛ ka kɛɲɛ ni Arɔn n'a deenw ka fɔta ye, a kɛra minanw tako ye wo, walima baara wɛrɛ. U ka kan ka fɛɛn minw ta, walima ka baara wɛrɛ min kɛ, aw k'o to u bolo.

²⁸ Fadenyabolo minw bɔra Gɛrisɔn na, olu ka baara ye o le ye Ɲɔgɔnkunbɛn fanibugu kɔnɔ. Sarakalasebaga Arɔn dencɛ Itamari le ye u kuntigi ye.

Merari deenw ka baara

²⁹ «O kɔ, i ka Merari deenw jati fadenyabolo la gwaso gwaso.

³⁰ Mɔgɔ minw bɛɛ be se ka don ka baara kɛ Ɲɔgɔnkunbɛn fanibugu kɔnɔ, i ka olu jati k'a ta saan bi saba ma fɔɔ ka se bi duuru ma.

³¹ U bena to ka baara minw kɛ Ɲɔgɔnkunbɛn fanibugu kɔnɔ, o ye a lɔgɔw tako ye, ni banabiriw ni tutunanw n'u jusigilanw,

³² ni tutunan minw kɛra ka luu kori, ni olu jusigilanw, ani gweenw, ni juruw. Fɛɛn minw bɛɛ be kɛ k'o baara kɛ yen, aw bena o fɛɛn nunu kelen kelen bɛɛ tɔgɔ fɔ u ye ka sɔrɔ k'u tako don u bolo.

³³ Merari deenw ka fadenyabolo ka baara le y'o ye. O bɛɛ le y'u ka kɛta ye Ɲɔgɔnkunbɛn fanibugu kɔnɔ. Sarakalasebaga Arɔn dencɛ Itamari le ye u kuntigi ye.»

Levi kɔmɔgɔw tɔgɔ sɛbɛnko

³⁴ Musa ni Arɔn, ani jama ɲamɔgɔw ye Keyati deenw tɔgɔ sɛbɛn u ka fadenyabolo la gwaso gwaso.

³⁵ Mɔgɔ minw tun be se ka don Ɲɔgɔnkunbɛn fanibugu kɔnɔ ka baara kɛ, n'u sii ye saan bi saba ye fɔɔ ka se bi duuru ma, olu bɛɛ tɔgɔ sɛbɛnna.

³⁶ Ka kɛɲɛ n'u ka fadenyabolo ye, minw jatira ka sɔrɔ, olu kɛra mɔgɔ waa fila ni kɛmɛ wolonwula ani bi duuru (2 750) ye.

³⁷ O le ye Keyati deenw ka fadenyabolo mɔgɔda ye. Minw tun be baara kɛra Ɲɔgɔnkunbɛn fanibugu kɔnɔ. Ka kɛɲɛ ni Musa ka fɔta ye, Masaba tun ye min fɔ a ye, Arɔn ni Musa y'u jati.

^38-41 Musa ni Arɔn, ani jama ɲamɔgɔw ye Gɛrisɔn deenw tɔgɔ sɛbɛn u ka fadenyabolow la gwaso gwaso o cogo kelen na. U ye mɔgɔda min sɔrɔ, o kɛra mɔgɔ waa fila ni kɛmɛ wɔɔrɔ ni bi saba (2 630) ye.

^42-45 U ye Merari deenw tɔgɔ sɛbɛn o cogo kelen na fana. U ye mɔgɔda min sɔrɔ, o kɛra mɔgɔ waa saba ni kɛmɛ fila (3 200) ye.

⁴⁶ Musa ni Arɔn ani Isirayɛlidenw ɲamɔgɔw ye Levi kɔmɔgɔ minw jati ka kɛɲɛ n'u ka gwasow n'u ka fadenyabolow ye,

⁴⁷ n'u be se ka don Ɲɔgɔnkunbɛn fanibugu kɔnɔ ka baara kɛ, ani ka minanw ta, n'u sii ye saan bi saba ye fɔɔ ka se bi duuru ma,

⁴⁸ olu tun ye mɔgɔ waa seegi ni kɛmɛ duuru ani bi seegi (8 580) ye.

⁴⁹ Ka kɛɲɛ ni Musa ka fɔta ye, Masaba tun ye min fɔ a ye, u y'u kelen kelen bɛɛ ka baara yira u la, n'u ka ka kan ka minan minw ta. U y'u jati ka kɛɲɛ ni Masaba ka fɔta ye Musa ye.